بو ایلگینی آختارانلار شخصی ایلگیلری یوخ بلکه بیر ایل آذربایجانین اولایلارین ایزله مه لیدیرلر. اوردیبهشتین 2-سی آذربایجان اؤیرنجی لرینین گزیسی، خوردادین 4-ده کئچیریلن سولدوز مراسیمی، ایبراهیم بی جعفرزاده نین یاس تؤره نی،عطییه خانیمین گؤروشونه گئدنلری، شهریور آییندا اورمو گؤلونون اعتراض لاری و باشقا گؤنلریمیزی ایزله سینلر. بودور بونلارین بیر-بیریله ایلگیسی، بیر ایل دفعه لرله توتوقلانانلارین توتولماسی.
روزبه، افشین، مهرداد، محمد کیملردیلر؟
85 حماسه سی آذربایجان میللی حرکتینده یئنی بیر تاریخ یاراتدی. او گون بیز ایران تورکلرینه مین ایللیک ایمپیراتورلوغوموزدان داها اؤنملی اولدو. مین ایل تورک ایمپیراتورلوغوندا یاشاساق دا، او گون کیملیگیمیزی اورتایا چیخارا بیلدیک. او گون میللی مسئله میزین اؤنه می، اینسانلاریمیزا اوزه چیخدی. او گون میللی حرکتیمیزین ایکینجی نسلی وار اولماسین قانیتلادی. روزبه، افشین، مهرداد، محمد و بونلارا تای دوستلاریمیز، 85-دن اؤنجه اویانسالاردا، او گون میللی کیملیگین اوغروندا چالیشماغین گرکلیگین دوشوندولر. بو نسل میللی حرکتی یئنی لشدیرمکده بؤیوک بیر رول اویناییب، آذربایجاندا باسقیلارا باخمایاراق دیل، تاریخ، اوسطوره و چئشیتلی قونولاردا کیلاسلار یولا سالمیشلار.
روزبه بَی سعادتی بو یئنی لشمه یین یئنی سیدیر، او بو نسلین اولدوزودور. مییانا شهرینده میللی مسئله نی جیددی صورتده گؤنده مه گتیرمکده دانیلماز بیر نقشی اولوبدور.
88-ین مهر آییندا دوستلارین بیریندن افشین شهبازی نین هله بیلیم یوردونا گیریب گیرمه میش حراسته چاغیریلماغین ائشیتدیم. او گون نده نین بیلمه سم ده آنجاق بو توتولمالاردا باشا دوشدوم. 2 ایل چئشیتلی- چئشیتلی یوللار ایله چالیشان حراست مأمورلاری افشین شهبازی نی دایاندیرا بیلمه میشلر.
بیر یاندان باسقی لار آرتیریلیردی او بیر یاندان گزیلرین سایی آرتماقدایدی. چاغیریلمالار چوخالیردی ایسه، دیل کیلاسلارین دا سایی چوخالیردی.
محمد، افشین، مهرداد اونلاری آیری گؤرمک ده اولموردو ائله بو گؤنده زینداندا بیردیلر.
اونلارین سوچو اینسان اولماقلارین دؤشونمک دیر، اونلارین سوچو حاقلارینین ایسته مه ییدیر.
بس ایبراهیم....؟
ایبراهیم دان یازماق چوخ چتیندیر یازماماق دا اولمور. عاریف بی کسکین دئمیشکن او آذربایجانین اینکار ائدیلمیش کیملیگینین جارچیسی دیر. اؤزو دئدیگی تک بوتون آذربایجانین شهرلری اونا دوغمالاشیب ائله ایبراهیمین اؤزگه لرین گؤزونده باغیشلانمایان گوناهی دا بودور. ایشاره اولدوغو بو یئنی نسلی اوزه چیخارتماق، اونلارین بیر-بیریله ایلگیسین یاراتماق شوونیسمین گؤزونده بؤیوک بیر گوناهدیر.
ایبراهیمی اینکار ائتمه یین نه درجه چتین اولماغین اونو دانانلار گؤزلجه سینه باشا دوشورلر. اونو دانماغا گرک تاریخی داناسان، کئچمیشی داناسان، گله جه یی داناسان.
بیز.......؟
قونشونو قونشوسویلا تانیش ائدن ایبراهیم بو گون زینداندادیر. بیز قونشولار ییغیشمالی ییق، جار چکمه لی ییک جارچیمیز اوچون.
اؤزو دئمیشکن "هله لیک میللتیمیزین طالیعی بودور، بو زیندانلاردان آزادلیغا دوغرو گئده جه ییک"
منبع : تبریز سسی
هیچ نظری موجود نیست:
ارسال یک نظر