ساوالان پورت : تخمینَن
کئچن ایل بو زامان‌لار ایدی کی اوزون مدت تئهران بیلیم‌یوردلاری‌نین
اؤیرنجی چالیشقان‌لاری و ائله‌جه ده بوتون میللی فعال‌لار آراسیندا دانیشیق
و تارتیشما قونوسو اولان میللی بیرلیک مسئله‌سی، "گوج بیرلیکده‌دیر..."
باشلیق‌لی بیلدیری‌ده داها عملی و اویغون بیر چرچیوه تاپماغا باشلادی.
اؤیرنجی‌لر
بیلدیری‌ده اورتادوغو و بوتون دونیادا گئدن سرعت‌لی پروسئس‌لره توخونا‌راق
بیرلیگین اؤنمینه دقت چکیب، 1390-جی گونش ایلی‌نین "میللی بیرلیک" ایلی
اولا‌راق ائعلان اولونماسی اؤنرگه‌سینی وئردی‌لر. باشدا گونئی آذربایجان
اؤیرنجی حرکتی اولماق‌لا، میللی حرکتین چئشیتلی شخص، قوروم و
تشکیلات‌لاریندان بیلدیری‌یه گلن دستک بئله بیر اؤنرگه‌نین یئرسیز
اولمادیغینا و اونون مؤوجود پروبلئم‌لریمیزی چؤزمه یؤنونده تأثیرلی اولا
بیله‌جه‌یینه وورغو یاپدی. دئمک اولار میللی حرکتده اورتاق احتیاج‌لارین
یاراتدیغی دینامیک فضا، بئله بیر اورتاق دویوم و دوشونجه‌یه ندَن
اولموشدور.
ایندی
ایسه 1390-جی ایلی گئری‌ده بوراخماقداییق. بو ایل آذربایجان و میللی حرکت
اوچون چوخو اولوم‌لو، آزی اولوم‌سوز دَییشیم‌لرله یاددا قالدی. بو
باخیش‌دان اؤتن ایلین اَساس حادیثه‌لری کیمی، ایل عرضینده یوزلرجه میللی
فعالین زنجیرواری توتوقلانماسی‌نی و قوروماقدا اولان اورمو گؤلونون
آجینا‌جاق‌لی دورومونا اعتراض اولا‌راق کئچیریلن گوجلو آکسیا‌لاری آد
آپارماق اولار. یایین سون آییندا کئچیریلن اورمو گؤلو اعتراض‌لاری
اجتماعی-سیاسی سویه‌ده میللی بیرلیگین مؤحتشم گؤرونوشونه (تظاهورونه)
دؤنوشدو. بو اعتراض‌لار سیراسیندا میللی منفعت‌لریمیز اوغروندا چالیشان
اینسان‌لارین دورومونو دوشونه‌رک و توپلومسال (جمعی) شعورا اویا‌راق اوخشار
توتوم سرگیلمه‌سی میللی بیرلیگین آنلامینی یوکسک کئیفیتده هر کس اوچون
آشیلادی دئسه‌ک یانیلمامیشیق.
میللی
بیرلیک بیلدیری‌سی‌نین سون بؤلومونده وورغولاندیغی کیمی اویغون بیرلیگین
یارانماسی اوچون اؤنجه‌لیکده عملی شکیلده پلورالیزم و چئشیت‌لی‌لیگه
اینانیب، سونرا ایسه دیالوق‌دان چکینمه‌مک بیر شرط‌دیر. ائله بو اَساسدا
میللی حرکت اورتامیندا بیرلیک اطرافیندا گرَکن فیکری فضانین یاراندیغین‌دان
سونرا، بیرلیگین ماهیتی‌نی، نه شرایط‌ده یارانا بیله‌جه‌یینی و نئجه اولا
بیله‌جه‌یینی (بیرلیک مئحورلری) صمیمی و دئموکراتیک بیر دیالوق ایچری‌سینده
بلیرله‌مه‌یه یاردیم ائتمک اوچون "میللی بیرلیک دوشرگه‌جیگی" یاراندی. هله
یولون اولینده اولان بو دوشرگه‌جیک چئشیتلی فیکیرلره صاحب شخص‌لر و
تشکیلات منسوب‌لارینا اوخشار سورغولار وئره‌رک، آرادا بیر ایسه بعضی
باخیش‌لاری یازی شکیلنده یایا‌راق، بیلدیری‌نین ترسیم ائتدیگی آماج‌لار
دوغرولتوسوندا حرکت ائتمکده‌دیر.
گرکن
اویغون بیرلیگین یارانماسینا داها اوزون بیر زامانین لازیم اولدوغونو
دوشونه‌رک ایلین بیتدیگینه رَغمن، چیزیلن گؤرونوم اساسیندا، میللی بیرلیک
یؤنونده چالیشما‌لار داوام ائده‌جک. یئنی ایلده ده میللی بیرلیک اوغروندا،
میللی بیرلیک دوشرگه‌جیگی اوزریندن داها دوزنلی و مونتظم شکیلده
موصاحیبه‌لر و یازی‌لار یایینلاناجاق.
بئله‌لیکله
یئتیشَن یئنی ایل موناسیبتی ایله میللتیمیزی تبریک ائتمک‌له برابر، کئچن
بیر ایل سوره‌سینده یاردیمجی اولان بوتون سویداش‌لاریمیزا
میننت‌دارلیغیمیزی بیلدیریب، اؤنوموزده‌کی سوره‌ده بوتون میللی
چالیشقان‌لار و تشکیلات‌لاردان اولوم‌لو قاتیلیم و صمیمی یاردیم
دیله‌ییریک.
گوج بیرلیکده‌دیر
قایناق : تبریز سسی
هیچ نظری موجود نیست:
ارسال یک نظر