بو سیاستین داوامی وتأثیری نتیجه سینده رژیمی دیزه چوُکوروب واوُنون دئوریلم سینه سبب اوُلا بیلرمی ؟ 33 ایللیک پروسئسده ایران دئیلن اوُلکه نین ثروت لرین آمانسیز جاسینا غارت ائدن آیت الله لار، واوُنلارین آرخاسیندا دوران و رژیم باشچیلارینا گیزلی آشکار یوُل گوُسترن ایمپریالیست قووه لر بو رژیمین داغیلماسینا راضی دیرلارمی ؟
آمئریکا وایسرائیل باشدا اوُلماقلا ، غرب دوُولت لری بو گونه قدرایران آدلانان اوُلکه ده اینسان حاقلارینین هرساحه ده فاشیست جئسینه پوُزولماسینا عمدی اوُلاراق گوُزیوموب ، تکجه رژیمین آتم پروگرام لاری نینا دائیر ایکراه ایله اورانیوم زنگینلئشدیرمه پروگرامی نین دایاندیریلماسیندان دانیشسالاردا، آنجاق ایران دئیلن اوُلکه ده اینسان حاق لاری ومیللیت لرین حاق و حقوق لاریندان جیددی و تأثیر ائدیجی شئکیلده دانیشمیرلار. حبس خانالاردوُلوب داشماقدا ، آزادلیق یولوندا مجادیله ائدن میللت لرین قاباقجیل فعاللاری هرگوُن اویدوروجو بهانه لر و اتهاملارلا توتوقلانیب ، اشکنجه اوُلونوب ، گیزلی آشکار اعدام اوُلونورلار و فاشیست فیتوالار دورمادان داوام اتمئکده دیر.
تهران رژیمی نین آتم وفوزه مرکزلری نین هاوادان وورولماسی موقت اوُلاراق بیرضربه اوُلسادا ، آنجاق راسیست رژیم دئوریلمه دیگی حالدا ، هجوملاردان سوُنرا داها آرتیق وحشی لئشیب ، گوُجلئنمه سینه و میللیت لره قارشی داها بوُیوک جینایت لرینه یوُل آچا بیلر. تحریم لروهاوادان وورولان آغیرضربه لر رژیمین اساسین داغیدمادیقدا اوُنو بوتونلوکله یوخ ائده بیلمه دیکده ، آیدین دیر کی رژیمین باشچیلاری ، آیت الله لار اوُنون اینتقامین وحشی جه سینه یوُخسوللوق ، ایش سیز، فلاکت ایچینده چیرپینان مظلوم خالقلاردان سیلاح گوُجونه آرخالاناراق آلاجاقلار.
بوگوُن اوُز مقام ومنافع لری خاطیرینه ولایت فقیهی مدافعه ائدن قاچاقچی اوُغرو پاسدارلار و ثروت ایچینده بوُغولان آیت الله لار دوُنیا نین أن گوُجلو مالی ، ایقتصادی مافیالارینا چئوریلمیشلر. آردیجیل ایفشاء اوُلونموش سندلرده بو عمامه لی ، عمامه سیرغارتگر اوُغرولارین آمئریکا ، کانادا ، آوروپا وحتی چین و روسیه یه قاچیردیقلاری یوزمیلیاردلارلا دوُلارلار ، اوُیرولار ، پوندلار بوتونلوکله خالقلارین قانی واوُلکه نین ثروت لری دیر.
رژیمین دئوریلمه سیندن کیملر قورخور، کیملر وحشت ائدیرلر؟
رژیمین دئوریلمه سیندن قورخوب وحشت ائدنلر و یا هرجور نیظامی هجوما قارشی اوُلانلار، باشدا عمامه لی ، عمامه سیز موللالاراوُلماقلا ، پان ایرانیست لر، شاهچیلار، تمامییت ارضی طرفدارلار، ایرانچی فدرالچیلارواوُز کیملیک لرین ایتیرمیش مانقورت لاردیرلار. بوعنصرلر رژیمه ورولاجاق ضربه لر حئیاتا کئچئرسه ایران دئیلن یئرین پارچالانماسینا و خالقلارین آزادلیقینا و اوُز سرنوشت لرینه حاکیم اوُلمالارینا قارشی دیرلار و دورمادان أللریندن گئلن تخریباتلارا مشغول دورلار.
ایللردن بئری آتم سیلاح تکنولوزوسونون اوُنئملی ماتریاللارین هانسی دوُولت وکیملرین واسیطه سی ایله تهران رژیمینه وئریب و نه مقصده گوُرا ؟
اینقلاب آدلانان دئوریمدن سونرا 33 ایللیک پروسئسده ، غرب ایستعمار چیلاری ایله بیرلیکده ، روسیه ، چین ، شمالی کره وباشقا بویوک کیچیک غارتچی شیرکت لرایران دئیلن یئرین آچیق رنگارنگ سفره سین غارت اتمئگ اوچون بیرـ بیرلری ایله یاریشا باشلادیلار، هر ایل میلیاردلار دوُلار آمبّار لاریندا قالمیش ، چوروموش ماللارین و یا سیرادان چیخمیش سیلاح لارین چوخ یوکسئک قیمت لرله موللا ، پاسدار واسیطه چیلرین ایش بیرلیگی ایله ایرانا ساتیب صادیرائدرئک، عوضینده نفت، گاز، قیزیل ، گوُموش ، آلمینیوم، میس ، نادیرمرمرداشلار ، خاویار، قیمتلی خالی لار خالچالار و چوخ دئییرلی نادیر اشیاء لاری و ثروت له دوُلو معدنلری أله کئچیرمئگ اوچون امتیازلار آلیب ، معاهیده لر باغلاماقلا چوخ اوجوزقیمت لرله غارتگرلره ساتیب ، هم اوُزلری نین و هم اوُنلارین جئبلرین ، بانکلارین دوُلدورورلار. بو فاجعه لی غارت هئله ده تام سرعت له داوام اتمئکده دیر. بو گوُن ایران دئیلن یئرده اوُن مینلرله بوُیوک ، کیچیک خاریجی سومورگه چی شیرکتلرموللا لارا ، پاسدارلارا بوُل ـ بوُل رشوت لر وئرمئکله قوندارما معاهیده لرباغلایب گئجه گوندوز سئس سیز صداسیز آمانسیزجاسینا فعالییته و غارته مشغول دور لار، چوخ سایلی چئشیدلی شیرکت لرین ، بانکلارین قارشیسندا تکجه بیرجاواب ده وار، اوُدا موُلا رژیمی نین باشچیلاری دیر.
آیدین دیرکی رژیم هر سببه گوُرا داغیلدیقدان سوُنرا مختلیف بوُلگه لرده ، اوُز اراضی لرینده یاشییان میللت لرمیللی ایستقلالا نائیل اوُلدوقدان سونرا هر ساحه ده بویوک دئیشیکلیکلرده باش وئره جئک . غارتگر دوولت لرین ایران ایسلام رژیمیندن مدافعه اتمئکلری ده ائله بو سببدن دیر.
اوُ جومله دن : بو رژیمی دئوریلدکدن سونرا تک مرکزلی ایسلام رژیمی ایله باغلانمیش اسارتلی معاهیده لر طبیعی اوُلاراق لغو اوُلوناجاق. هربیر خاریجی دوُولت ایسلام رژیمی نین یئرینده قورولموش دوُولت لرله تیجارت و آلیش وئریش ایستقامتینده یئنی دن عدالتلی معاهیده لر باغلاماق مجبورییتینده قالاجاقلار. بونا گوُرادا گوُنئی آذربایجان میللتی رژیمین آرخاسیندا دوُروب اوُنا گیزلی ده یوُل گوسترن دوُنیا غارتگرلری نین هئچ بیر یالانچی وعده لرینه و آلدادیجی اوُیون لارینا اومید ائدیب بئل باغلامادان ، تکجه فارس راسیسمی نین ایشغالیندا ومستعمره سینه چئوریلمیش گوُنئی آذربایجانین آزادلیقی ، قورتولوشو وایستقلاییتی یولوندا داها آرتیق بیرلئشیب تشکیلات لانیب و هر بیرباش وئره جئک حادیثه قارشیسیندا حاضیرلیقلی ، آییق ، ساییق اوُلمالی دیرلار.
کئچمیشه قیسا باخیش .
گوادلوپ کنفرانسی و جیمی کارتر.
دفعه لرله ایفشاء اوُلدوقو کیمی هئله اینقلابدان قاباق 25 دسامبر 1978 اینجی ایلده فرانسانین گوادلوپ آداسیندا (جزیره سینده) آمئریکا دان جیمی کارترـ انگلیس دن جیمز کالاهان ـ فرانسادان ژیسکاردستن ـ فدرال آلمانیادان هلموت اشمیت جنابلاری نین گیزلی کئچیریکلری کنفرانسدا ، نهایت شاهین ایراندان اوزاقلاشدیریلماسینا و اونون یئرینه ایللر قاباق (15 خرداد 1342) ایلدن نظرده آلیب حاضیرلادیقلاری خمینی کیمی جبّار بیرموُللانی حاکیمییته گئتیریلمه سینه بیرلیکده راضی لاشیب ، سئس وئریرلر.
ایدین دیرکی آدلاری گئدن دونیانین بوُیوک و گوجلو دوُولت لری قاباقجادان اوُزمنافع لری نین تأمین اوُلماسینا دائیر هرجور تدبیرلری گوُروب وخمینی دن لازیم اوُلان تضمیناتی آلمیشدیلار. 28 مرداد 1332 کودتاسیندان سوُنرا ایران جامعه سینده خالقلارین آمئریکایا قارشی بوُیوک نیفرت یارانمیشدی ، بهمن اینقلابی آدلانان اوُیوندا خمینی جامعه نین محروم کوتله لری آراسیندا کوُک سالمیش همان آنتی آمئریکا ذهنییات دان سوء ایستفاده ائدرئک ، اوُزون چوخ آتشین ضید ایمپریالیست ، خصوصی ایله ضید آمریکا و ضید ایسرائیل گوُسترمئکله ، اوُیونلاردان خبرسیز اوُلان خالقلارین فیکرینده اوُزونه یئرآچماق هدفی ایله ، داواملی اوُلاراق هرگوُن وهردانیشیقیندا شیدت له آمئریکا یا ایسرائیله قارشی شعارلار و فیتوالار وئرمئگه باشلییر و همان اویونلار بو گونده اوُنون جانیشینلری اوُلان حیله کار آیت اللاه لارین گونده لیک سیاسی شیوه لری اوُلاراق داوام اتمئکده دیر ، بیر حالداکی ایللر بوُیونجا موللالارین ، پاسدارلرین اوُغرولادیقلاری یوزلرله میلیارد دولار پوللارآمئریکا ، کانادا ، فرانسا ، آلمان ، اینگلیس ، و باشقا غرب اوُلکه لرینین بانک لاریندا دیر.
اینقلاب عرفه سینده ایسرائیل سیفارتی نین فلسطینلی لره وئریلمه سی و آردیجا آمئریکا سیفارتی نین بوُیوک های کوی له ایشغالی و بو سیفارت لری جاسوسلوق یوواسی آدلاندیرمالاری همان آلدادیجی سیاستین آچیق ـ آیدین نمونه لری ایدی .
خمینی نین تحریکلری ایله باشلانان "ایران ـ عراق" ساواشی و ساواش پروسئسینده باش وئرن سونرا کی حادیثه لر ، اوُجومله دن ظاهیرده آمئریکا و ایسرائیل علیه اینه وئریلن شعارلارا رغمن ، گیزلی ده ایسرائیل و آمئریکا مأمورلاری ایله آپاریلان گوُروشلرده ، خمینی نین راضی لیقی ایله استاندارد قیمت لردن نئچه قات آرتیق سیلاح آلماق و همان سیلاح لاری گیزلی واسیطه لر وسیله سی ایله ارزاق و یا اتومبیل یدک لری عنوانی ایله گوُزلردن اوزاق اوُلاراق بندر عبباس وباشقا جنوب لیمانلارینا داشیماق ، رژیمین مهارتلی آلدادیجی اوُیونلاری نین نه قدر یالان وحیله کارلیق اوُلدوقون گوُستریردی .همان آلدادیجی حیله کار اوُیونلارا دائیر بو گون أللرده یئترلی قدر اینکار اوُلونمازسندلروار ، بیرلئشمیش دوُشمانلارین ایللر بوُیو گوُجلو تبلیغات لاری نئدنیله ، تأسوفله هئله ده چوخ سایداد ساده اینسانلار وارکی یالنیش لیقلا تصور ائدیرلر "ایران " رژیم باشچیلاری ایله آمئریکا ، ایسرائیل دوُولت لری آراسیندا حقیقتن دوُشمان چیلیق وار ؟ ! . بیرحالداکی حقیقت بئله تصورلرین عکسینه دیر. باخین ایفشاء اوُلموش سندلره اوجومله دن : ایسرائیل " موساد " مأمورواوُلان ( ارین بن مناشه ) آدلی شخصین ( پول خون ) آدلی کیتابیندا ایفشاء اوُلونموش مطلب لره بو کیتاب ایللر قاباق دکتر مسعود انصاری آدلی شخصین وسیله سی ایله فارس دیلینه ترجومه ائدیلدکده ، چوخ دهشتلی گیزلی ماجرالار ایفشاء اوُلونموش دور.اوُجومله دن : محاربه ایللرینده مهدی کروبی ، سید مهدی کاشانی ، مهدی هاشمی ، مک فارلن ، هاشمی رفسنجانی ، منوچهر قربانی فر ، دکتر محمد علی هادی ، محسن کنگرلووباشقالاری آمئریکادا ، آوروپادا ایللر بوُیو یئرلئشمیش فارس شوینیست لری نین تلاشلاری ایله ، محاربه ایللرینده هم ایسرائیلدن و هم ایسرائیلین واسیته چیلیگی ایله آمئریکادان 80 میلیارد دولارلیق سیلاح آلینمیشدیر " اری بن مناشه" نین آچیقلاماسیندا آیدینجاسینا اعتراف اوُلونور، بو تکجه " ایران ـ عراق " محاربه سینه عاید اوُِلان مبلغ دیر.
بو گوُن گوادلوپ ، مک فارلن ، ایران گیت ماجرالارینا دائیر چوخ سایدا سندلری اینترنت سایت لاریندا آچیق ـ آیدین گوُرمئگ اوُلار. ( گوادلوپ) آداسیندا کئچیریلمیش 3 گونلوک کنفراسدا ایشتراک ائدنلرین عمللری نین فاجعه لی نتیجه لری .
ایندی سئوال بوردا دیر: بوُلگه ده دائمن و آردیجیل اوُلاراق فیتنه ، ترور، جینایت ، محاربه قورخوسو یارادان و بو سببدن یوزمیلیاردلارلا دولارغرب دن و روسیه دن ، چین دن سیلاح آلیب داغلارین آلتین دوُلدوران رژیمین دئوریلمه سینه راضیلیق وئرئرلرمی ؟ گیزلی ده بیربیرلری ایله راضیلاشان دوُولت لر، موللا لارین حاکیمییتین ایلک گوندن جور به جورآلدادیجی اوُیونلار و گیزلی آشکار تاکتیک لرله گوُجلئندیریب عومرونون داوامینا یاردیم گوسترنلر، بو رژیمین آرادان گئتمه سینه راضی اوُلارلارمی ؟ 33 ایللیک پروسئسده دونیا غارتگرلری نین جئب لرین ، بانکلارین بوُل ـ بوُل ـ میلیارد ـ میلیارد دولارلار و قیزیل لارلا دوُلدوران واوُنلاری ایفلاسدان قورتاران ، قایماقلی ، یاغلی سود وئرن اینئگین باشین کئسرلرمی ؟
بو گون گوُزلریمیز اوُنونده گوُروروک کی تحریم لرنتیجه سینده أن آغیر و بوُیوک ضربه لره ، آجلیقا ، یوخسوللوقا و جوربه جور فسادلارا معروض قالان میلیونلارلا محروم یوخسول اینسان لار اوُلموشلار. یوخسا رژیمین باشچیلارینا هئچ بیرضربه وورولمایب ، عکسینه اوُلاراق رژیم باشچیلاری و اوُنلارین أمرینده اوُلان ساتیلمیش ، مانقورت لاشمیش ، اینسانلیقدان اوزاقلاشمیش ، مقام ، ثروت خاطیرینه هربیر جینایته أل آتانلار جنـّت (بهشت ) حئیاتی یاشییرلار.
گونئی آذربایجان میللتی ایله بیرلیکده ، میللی وارلیق لاری تاپدالانمیش ایران دئیلن یئرده یاشییان میللت لرین تک بیر قورتولوش یوُل لاری ، بو اینکار اوُلونماز یول تکجه فارس راسیست رژیمی نین دئوریلمه سی و هر میللتین اوُزاراضی سینه و میللی سر نوشتینه صاحیب چیخماسی دئمئکدیر . باش وئره جئک هر حادیثه ده حاضیرلیقلی ، آییق ، ساییق اوُلمالییق .
یاشاسین بیرلیک ، یاشاسین آذربایجان ـ 2012 / 3 / 17 ـ آذرخش
هیچ نظری موجود نیست:
ارسال یک نظر