بیرلشمیش میلتلر، اینسان حاقلاری شوراسی، ۱۹-جو دوزنلی اوتوروم
پارالئل توپلانتی: ایراندا آزلیق حاقلاری
اؤنجه، “اولوسلاراراسی آزلیقلار حاقلاری قروبو” (MRG) و “تمثیل ائدیلمه‌ین میلتلر و خالقلار تشکیلاتی”ندان (UNPO) بوتون دونیادا محروم خالقلاری مودافیعه ائتدیکلری و بو توپلانتینی کئچیردیکلری اوچون تشککور ائدیرم.
اورتادوغو و عرب دونیاسی اؤزل و اولاغان اوستو بیر دؤنم یاشاییر. فاسید حؤکومتلره قارشی چیخان سیویل آیاقلانمالار تخمینن ۲۰ اؤلکه‌نی بورویوب و بو اؤلکه‌لرده باشلایان توپلومسال حرکتلر بوتون دونیانین دیقت و آلقیشینی قازانیبدیر. دونیانین ایستقیرارسیز بیر بؤلگه‌سینده فاسید حؤکومتلرین چؤکدویو بیر زاماندا، هله ده ایقتیداردا اولان ایران حؤکومتی اینسان حاقلارینی پوزماغا دوام ائدیر و دونیا بو اؤلکه‌ده یاشایان آزلیقلارین دوروموندان خبرسیزدیر.
من بو آزلیقلارین بیری اولان و ایلکین اینسان حاقلاریندان یوخسون ساخلانیلان آذربایجانلیلار حاقیندا دانیشماق اوچون بوردایام.
آذربایجانلیلار، أن چوخ ایرانین قوزئی-باتیسیندا توپلانیب و اؤلکه‌نین ان بؤیوک غئیری-فارس قروبونو تشکیل ائتمکده‌دیرلر. ۱۹۲۵-ده پهلوی حؤکومتینین ایقتیدارا گلدیییندن بویانا، آذربایجانلیلار، ایراندا یاشایان باشقا غئیری-فارس میلتلرله بیرلیکده، عملده و قانوندا، عیرقچیلیق و کولتورل-ائکونومیک آیری-سئچکیلیکلره معروض قالیبلار. نئچه-کولتورلو ایران اؤلکه‌سینده، فارس دیلی، تک تحصیل دیلی اولماغا دوام ائدیر. آذربایجانلیلار یئترسیز دیل تحصیلی و سیستئملی آیری-سئچکیلیک سببی ایله، اونلارا میراث قالان یوخسوللقدان قورتولا بیلمیرلر. اونلار اؤز توپلوملاری ایچینده سوسیال و ایقتیصادی باخیمدان دورغون و حرکتسیز قالیرلار. آذربایجان خالقی سوسیو-ائکونومیک برابرسیزلییه سون قویماق و تورک دیلینی اوخوللاردا تحصیل دیلی ائتمک اوچون اوزون بیر موجادیله وئرمیشدیر.
اؤز ازیلمیش میلتینین حاقلاری یولوندا چالیشان، آذربایجان فعاللاری، او جومله‌دن؛ اینسان حاقلاری ساوونوجولاری، ژورنالیستلر، یازارلار و اؤیرنجیلر قانونسوز حبسدن امنییت گوجلری الی ایله اؤلدورولمه‌یه قدر اوزانان ریسکلرله قارشی-قارشییادیرلار. آذربایجانلیلارین کولتورل حاقلارینی ایستمک، سوسیو-ائکونومیک حاقسیزلیقلارا اعتیراض ائتمک و اؤز یاشام چئوره‌لرینی قوروماق اوچون کئچیردیکلری دینج گؤستری و آکسیالار شیدتله، بیر چوخ آذربایجانلینین توتوقلانماسی ایله بیرلیکده باسدیریلیر. اولوسلارآراسی عفو تشکیلاتینا گؤره، آذربایجان کیملییی و کولتورونو تبلیغ ائدن و دیل حاقلارینی ایسته‌ین اینسانلار "پان-تورکیزم پروپاقانداسی ایله اؤلکه گووهنلییی علئیه اینه چالیشماق" کیمی بلیرسیز و موبهم ایتتیهاملارلا سوچلانیرلار. محبوسلار روحی و جیسمی ایشکنجه‌لر آلتیندا ساخلانیلیب و ائتمه‌دیکلری ایشلره اعتیراف ائتمه‌یه مجبور ائدیلیرلر.
بو فعاللارین بیری آذربایجانلی اینسان حاقلاری ساوونوجوسو، ژوورنالیست سعید متین پور-دور. او باریشجیل یوللارلا اؤز توپلومونون حاقلاری اوغروندا چالیشمالاری اوچون ۸ ایل حبس جزاسی چکمکده‌دیر. اولوسلارآراسی عفو تشکیلاتی اونو ویجدان محبوسو آدلاندیریب.
ایران دؤولتی رسمی باسین و مئدیاسینین آذربایجان کولتورو، دیلی و کیملییینه سالدیریب، اونو آشاغیلادیغی گیزلی بیر شئی دئییلدیر. آذربایجان تورکلری سادهجه اؤزل مکانلار و ایش یئرلرینده دئییل، رسمی مئدیادا دا آشاغیلانیر، تحقیر اولور و مسخره ائدیلیرلر. ۲۰۰۶ ایلیندن، آداپ-ی قوردوقدان بویانا، من و امکداشلاریم، آذربایجان تورکلرینه قارشی آپاریلان داواملی عیرقچیلیغین چوخ ساییلی و چئشیدلی قایناقلارینی تثبیت ائتمیشیک. بونلارین بیرینجیسی و ان اؤنملی اولانی، ایران کولتورو و مئدیاسینین آذربایجان تورکلریندن اورتایا چیخارتدیقلاری تصویردیر. ۲۰۰۶ باهاریندا، "ایران" آدلی رسمی دؤولت قزئتی آذربایجان تورکلرینی حامام بؤجکلرینه بنزتدی. اورادا سادهجه دؤولتین دستکله‌دییی بیر عیرقچیلیق سرگیلنمه‌میشدی، بلکه عئینی زاماندا بوتون آذربایجان توپلومونو اورتادان گؤتورولمه‌سی تکلیف ائدیلمیشدی. عیرقچی کاریکاتورا قارشی، آذربایجان شهرلرینده آیاقلانمالار باشلاندیقدان سونرا، اونلار نفر اؤلدورولوب و بیر چوخ اینسان حبس ائدیلدی. باسدیریلمانین، ایران سئچیملریندن سونراکی اولایلار قدر، شیددتلی و وحشیجه‌سینه حیاتا کئچیریلدییینه باخمایاراق، دونیا توپلومونون ایلگیسی یوخ دئییله‌جک قدر آز اولدو.
دونیانین بیر چوخ یئرینده اولدوغو کیمی، ایرانداکی قادینلار هر گون شیدت و زوربالیق قوربانی اولورلار، آنجاق ایران عدلیه سیستئمی قادینین اوزلشدییی شیدت و انگللر علئیهینه چوخ آز و حتّی بعضاً هئچ بیر ایش گؤرمه‌مکده‌دیر. کولتورده قادین حاقلارینا سایغی دوغرولتوسوندا ایره‌لیله‌مه، ایرانین جینسییتچی و قادین دوشمانی قانونلاری و سیستئمی طرفیندن انگللنمکده‌دیر. ایرانین سیویل و جزا قانونلاریندا اولان آیری-سئچکیلیکچی یاسالار، کیشییه قادین علئیهینه زوربالیق ائتمه‌یه گوج وئریب، آیریجا، بو قانونلاری دهییشمک اوچون موجادیله ائدن قادینلار علئیهینه شوشه تاوان ایجاد ائتمکده‌دیر. آذربایجانلی شاعیر و قادین حاقلاری فعالی، فرانک فرید-ین سؤزلرینه گؤره، "عیرق، ائتنیک منسوبیت، دیل و کولتور، سوسیال صینیف، مذهب، یاشام بؤلگه‌سی، علیللیک و بو کیمی فاکتورلار برابرسیزلیک و آیری-سئچکیلییی اورتایا چیخاردیرلار. قادینلاریمیزین چوخو او آیری-سئچکیلیک فورملارینین چوخویلا قارشی-قارشییا اولورلار." بو ندنله، آزلیقلاردان اولان قادین ایکی دفعه قوربان اولماقدادیر، ویا باشقا بیر آذربایجان قادین فعاللینین دئدییی کیمی، "بیز هم قادین هم آزلیق توپلومونون عوضولریییک؛ ایران ایسلام جومهوریتینده بیز ایکی-قاتلی ظولم آلتینداییق."
آذربایجان توپلومونون بعضی فردلری، اؤزللیکله قادینلار، ایرانین تک رسمی دیلی اولان فارس دیلینی دوزگون دانیشیب، آنلایا بیلمه‌دیکلری اوچون، ایران جزا سیستئمینده چتینلیکلره معروض قالیرلار. بونون بیر اؤرنهیی، داشلاناراق اؤلوم جزاسینا محکوم ائدیلن آذربایجانلی قادین سکینه محمدی-دیر. خانیم محمدی-نین اوغلو و وکیلی اونون عدالتلی موحاکیمه اولمادیغینا اینانیرلار. اونلارین دئدییینه گؤره او باسقی و ایشکنجه آلتیندا اعتیراف ائتمیشدیر و آیریجا، سادهجه تورکجه بیلدییی اوچون اونونلا فارسجا دانیشان مأمورلارین سؤزلرینی، و محکمه‌ده گئدن صؤحبتلری آنلایا بیلمه‌میشدیر.
فارس کولتورو و شیعه مذهبی حاکیمییتینده اولان ایران اؤلکه‌سینده، سوننی-لر، علوی-لر، یهودی-لر، خریستییان-لار و باهایی-لر کیمی آذربایجانلی دینی آزلیقلار هر ایکی ائتنیک و دینی آیری-سئچکیلییه معروض قالیرلار. اونلار، یوکسک تحصیللرینی بیتیرمه شانسلارینین آز اولماسی، دینی مدرسه‌لر و سیویل توپلوم اؤرگوتلری قورما حاقلارینین اولماماسی، دؤولت ایداره‌لرینده ایش ایمکانلارینین چوخ آز اولماسی، و ایران جزا سیستئمینده عدالتسیزلییه معروض قالیب داها آغیر جزا آلماق کیمی آیری-سئچکیلیکلره معروض قالیرلار. آداپ-ین آذربایجانین سوننی و علوی توپلوملاریندان الده ائتدییی راپورلارا گؤره، او توپلوملارین نئچه فردی ساختا سندلر اساسیندا قورولموش عدالتسیز محکمه‌لرده اعداما محکوم اولوبلار. بو ساختا سندلر ایشکنجه آلتیندا آلینان اعتیرافلار و اطلاعات مأمورلارینین حاضیرلادیقلاری ماتئریاللارجا دوزه‌لیرلر. ۲۰۱۱-جی ایلده أن آز آلتی سوننی آذربایجانلی (کورهسوننی) اورمیه مرکز زیندانیندا قاچاقچیلیق سوچو ایله آسیلیبلار. باشقا بیر عدالتسیز محکمه اؤرنهیی اولاراق، آذربایجان علوی-لریندن اولان ۲۷ یاشلی مئهدی قاسیمزاده ۲۰۰۹ فئورال/شوبات آییندا "تانری-یا قارشی دوشمانلیق" ایتتیهامی ایله اعدام ائدیلدی.
آیریجا، راپورلارا گؤره، ایران دؤولتی سوننی و علوی آذربایجانلیلارین یاشادیغی کندلرده یئر-آلتی سولارین یؤنونون دییشدیره‌رهک، کندلری سوسوز بوراخیب اکینچیلری ایقتیصادی چتینلیکلره معروض قویور.
بو آرادا، ایراندا آذربایجان شهرلری، اورمیه گؤلونون قورودولماسی ایله اورتایا چیخان بیر چئوره فلاکتی ایله قارشی-قارشییادیرلار. اورمییه گؤلو دونیانین ان بؤیوک دوزلو گؤللریندن بیری و باتی آذربایجان ایله دوغو آذربایجان ایالتلرینین اورتاسیندا یئرلشیبدیر. آوقوست آیینین سونو و سئنتیابر آییندا، آذربایجانین اورمیه و تبریز کیمی شهرلرینده، اون مینلر نفر کوچه‌لر/خییاوانلارا چیخیب، گؤلو سوسوز حالا گتیرن ایران دؤولتینین یانلیش سووارما و سد وورما سییاستلرینه اعتیراضلارینی بیلدیردیلر. اعتیراضچیلار آغیر و شیدتلی پولیس هوجومو ایله سوسدورولدولار. پولیس سالدیریلاری بیر چوخ اینسانین یارالانماسی، مینلر نفرین حبسی و راپورلارا گؤره دؤرد نفرین اؤلومو ایله سونوجلاندی.
فئورال / شوبات ۲۰۱۲-ده بیرلشمیش میللتلر چئوره پروقرامی (UNEP) طرفیندن یاییملانان راپورا گؤر، "گؤلون سو سویه‌سی دوشدوکجه، گؤل یاتاغی دوزلارلا اؤرتولموش شکیلده بوراخیلیب و ۴۰۰ کیلومتر مربع بؤیوکلویونده بیر دوز چؤلو اورتایا چیخیر. بو دوز آلانلاری، اکینه ضرر وئریب، دوغال بیتگیلرین بؤیومه‌سینین قارشیسینی آلاجاق. دوزلار عئینی زاماندا یئللرله داغیلیب و "دوز فیرتیناسی" اورتایا چیخاردا بیلرلر. اورمو گؤلو ایله ۱۲۰۰ کیلومتر آراسی اولان آرال دنیزی قورودوقدان سونرا اورتایا چیخان فیرتینالار کیمی.
سون ایللرده، ایران دؤولتی گؤله آخان ۲۰-دن آرتیق چایین اوزرینده سد تیکیبدیر. چئوره قروپلاری و اوزمانلارا گؤره، بو سدلر، گؤلون اوستونه وورولان و اورمیه ایله تبریز شهرلرینی بیر بیرلرینی باغلایان کؤرپو ایله بیرلیکده گؤلون ایچینه و اونون آراسیندا سو جریانینین آزالماسینا ندن اولوبلار و گؤلون چوخو بوخارلاشیبدیر.
اورمو گؤلونون قوروماسی، ۱۳ میلیون یئرلی ساکینلری، و آیریجا آذربایجان جومهوریتی، تورکیه، عیراق و ائرمنیستان کیمی اؤلکه‌لری ده ائتگیلیه‌جکدیر. تئهران بیلیمیوردونون چئوره بیلیمچی پروفئسورو، اسماعیل کهرم-ون سؤزلرینه گؤره، اورییه گؤلو قورویارسا، "آلتی ایلا سککیز شهر، دوز لایه‌لری آلتیندا قالاراق، بوتونلوکله داغیلاجاقلار."
خانیملار و بهیلر، ایران آزلیقلارینین پروبلئملرینه اولوسلاراراسی توپلومو و مئدیا چوخ ایلگیسیز قالمیشدیر. دونیا ایجتیماعیتی و اولوسلارآراسی توپلوم بو پروبلئمی ایشیغا گتیرمه‌لی و ایران حؤکومتیندن:
اوخوللاریندا تورک دیلینده تحصیل و بو دیلده باغیمسیز مئدیا یارانماسینا ایزین وئریب، آذربایجان کولتورل و دیل حاقلارینی مودافیعه ائتدیکلری اوچون قانونسوزجا توتوقلانان آذربایجانلی ویجدان محبوسلارینی اؤزگور بوراخیب، دینج گؤستریلر کئچیردیب، آذربایجان حاقلاریندان دانیشان ژورناللارین امکداشلارینین حبس ائتمه‌سینه سون وئرمه‌سینی ایستهمه‌لیدیر.
ایران حؤکومتینی، آذربایجانلیلار و باشقا غئیری-فارس میلتلرین علئیهینه یئریدیلن سوسیو-ائکونومیک و کولتورل آیری-سئچکیلیک سییاستینه سون قویماغا چاغیرمالیدیر.
ایران ایسلام جومهوریتینی قادینلار و قیزلار علئیهینه اولان آیری-سئچکیلیکلری اورتادان قالدیرماق، و جینسییت ائشیتلییی/برابرلییی یاراتماق دوغرولتوسوندا اؤز اولوسلارآراسی گؤرولر/یوکوملولوکلرینی یئرینه گئتیرمه‌یه دعوت ائتمه‌لیدیر.
ایران مقاملاریندان غئیری-شیعه آذربایجانلیلار و ایراندا یاشایان باشقا ائتنیک و دینی آزلیقلارین، ایشکنجه آلتیندا آلینان اعتیرافلار اوزوندن عدالتسیز محکمه‌لرده وئریلن حؤکملر اساسیندا اعداملارینا سون قویولماسینی طلب ائتمه‌لی و ایران دؤولتینی آذربایجانلی دینی آزلیقلاری دینسل، سیاسال و توپلومسال فعالییتلرینده اؤزگور بوراخیب و اونلارین علئیهینه اولان تحصیل و شوغل آیری-سئچکیلیکلرینه سون قویماق اوچون تشویق ائتمه‌لیدیر.
اورمیه گؤلو بؤحرانینین اولوسلارآراسی بؤحران اولدوغوندان، آداپ دونیا توپلومونو و او جومله‌دن، UNEP بیرلئشمیش میلتلر چئوره پروگرامی و یونئسکو (بیرلئشمیش میللتلر تحصیل، بیلیم و کولتور تشکیلاتی)-نی موداخله و یول گؤسترمه‌یه دعوت ائدیر. بیز اینانیریق کی، اولوسلارآراسی توپلوم و تشکیلاتلار یئرلی خالقلار و ائتنیک آزلیقلارین یانیندا اولمالی، اونلارین سؤز آزادلیغی، توپلانما و دینج اعتیراض ائتمه حاقی ایله بیرلیکده اکین، گونلوک مصرف اوچون سو حاقلارینی قورومالیدیر.
اینگیلیسجه‌دن چئویری - آداپ
منبع پست : تبریز سسی
هیچ نظری موجود نیست:
ارسال یک نظر