ساوالان پورت : دین نوماینده لرین گؤروشونه گؤره دونیادا هر بیر اولوش ( پدیده ) دان کی سؤز گئده نده و عیمومیت ده بوتون بشرین خئیرینه کئچیریله ن قانون لار هامیسی و هامیسی باتی نین الینده بیر حربه کیمی بیزیم علیه یمیزه ایشده نمیش اولاراق شریعتـــه اویمورموش.
م.الوان اوغلو
باتی دا قادین لارین حقوقو اوزره اطرافلی تشبوثلر آپاریلیب تاکی یاسالاندیریلمیش اولسون . کؤک آتــــان یاسالار ( قانون لار ) اؤزه ل اورقان و اؤرگوتلر ( سازمان لار ) جومله ده ن آزاد مطبوعات طرفینده ن گؤز آلتیندا اولاراق قورونور ، ائله کی بو سایالیقجا ( سادگی ) اونون ـ بونون سؤز صؤحبتی ایله پوزولماسینا ایمکان یارانماز. بو گونکو عصیرده اویقارلی ( متمدن ) اؤلکه لرده چوخ غریبه دیر کی بیری قادین لارین حوقوقونو تانینمیش اولمایا و یاکی اونلارا قارشی دوروب آچیقدان ( آشکارا ) من سیزین آیریتمانی یاساقلاندیرما قانونونا ( قانون منع تبعیض ) قارشییام دئسین! بئله بیر آداما غیررسمی مؤوقع ده ن ده اولور اولسون یا گوله رلر یادا سانارلار روح خسته لیگینه اوغرامیش دیر کیمی یاناشارلار ، باخمییاراق کی کیم دیر ، هانسی دین یا حؤکومت آدیندان دانیشیر !! بو ان عادی مسئله دیر . آمما قادین لار مسئله سی حله قالسین ، ایلده مین لرجه اینسان ائله بو اؤلکه لرده یوروش لر ( تظاهرات ـنوماییش) کئچیرمکله حتتا حیوانلارین حاققینی دا ساوونماق (مدافعه ) ایسته ییرلر ! بو اؤلکه لرده ایت ، پیشیک و ساییره حیوانلار ائله ایمکان و قانون لاردان یارارلانیرلار کی چتین اولار آیریتما نی ( تبعیض ) حتتا اونلارین حاققیندا دا اولوم لاشدیرماق (عملی ائتمک ) !
عجبا بو گئدیش له، بیزیم اؤلکه ده ، کی یاری دان چوخ نوفوسو ( جمعیت ) نو دا قادین لار اولوشدورموش ( تشکیل ائتمیش ) اوتانیلاجاق ( شرم آور) دئییل کی حله تؤره نلی ( رسمی) تریبونلاردان ، باسین لاردان ، تئلئویزییا و یا عیموم خالق چاتدیریجی لاردان ( رسانه های همگانی ) دوروب دورماز اعلان اولونسون کی « قادین لاری آیریتمانی یاساقلاندیرما کونوانسیونو » ( کنوانسیون منع تبعیض علیه زنان )« استکبارین یئنی قورغوسو ( توطئه ) دور » یا سؤز گلیشی شریعت قانونونا اویمادیغی ایچون ( متناسب اولماماسی ) اونو پیسله ییب و مجلیسی اونو اونایلاماسی ( تصویب ) ایچون قیناسین لار ؟! اصلینده گره ک قارشی چیخمالار( اعتراض ) بونا گؤره اولایدی کی نه یه گؤره ایران کیمی گلیشله نمیش (مدرن ! ) بیر اؤلکه ده بو گونه کیمی بئله یاسالار یوبانمیش الده ن اله قالمیش دیر و توپلومون ( جامعه نین ) ان بؤیوک نوفوسو یعنی قادین لارا گؤره یاراشیقلی و اونلاری مدافیعه ائده جک قانون لار کئچیریلمه میشدیر .
دوننه کیمی ، همین کیمسه لر « ایشگنجه نی یاساقلاندیرما قانونو » نو دا ائله بئله یاوا ( واهی ) بهانه لرله آخساتدیردیلار . نه بیلیم اونودا شریعته قارشی بیلدیلر ، چونکو جنابلارین گؤتوروشو شریعت ده ن تعزیرله شاللاق لاماقدان باشقا عیبارت دئییل، حال بو کی ایستیکبارین قورغــــولو قـــــــــــانونونا گؤره هئچ شراییط ده اینسانلاری شاللاقلاماق یا ایشگنجه یه معروض قویماغا ایزین یوخدور . و بو گون ایسه قادین لاردان آیریتمانی (تبعیضی) گؤتوروب یاساقلاندیــــرماق دینـــــــی خوجالار (روحانی لر) طرفینده ن عئینـــی داورانیش لارلا قارشیلانمیشدیر .
بورادا من ائله بیر سؤیله نتی نی خاتمی ده ن نقل ائتمک ایستیره م کی مشهور بیر دانیشیقیندا دئمیشدی « اگر بیر گون اؤزگورلوک ( آزادی) له دین قارشی قارشییا دورسالار من امینم کی اؤزگورلوک غلبه چالار … » ائله اوندا ایدی کی بو دئدیکلرینه گؤره بوتون باتی نین آغزی آچیق قالدی . حله بو سؤزلری باشقاسی دئمیش اولسایدی مو طلق باشینا نه اویون چیخاداجاقلاریندان سؤز ائتمیرم فقط بیز باشا دوشمه دیک خاتمی جنابلاری بو سؤزو دینچی لره می سؤیله میشدی یوخسا دین سیزلره ! چونکو آرتیق بیزلره معلوم اولموش کی بیرجه اؤزگورلوک دئییل که گویا دین له قارشی قارشییا دورموش ، همین دین نوماینده لرین گؤروشونه گؤره دونیادا سؤزو گئده ن هر بیر یئنی اولوش ( پدیده ) و عیمومیت ده بوتون بشرین خئیرینه کئچیریله ن قانون لار( اؤرنک ایچون اینسان حقوقو ، سؤز و یایینلاما آزادلیغی ، ایشگنجه نین دوردورماسی ، دین لی و یا دین سیزلیک حقینه مالیک اولما و … نهایت قادین لاری آیریتمانی یاساقلاندیرما ) هامیسی و هامیسی باتی نین الینده بیر حربه کیمی بیزیم علیه یمیزه ایشده نمیش اولماق ایچون دور و هئچ بیری ده شریعتـــه اویمورموش .
بئله ایسه بئله گلیر کی خاتمی نین دئیه ن گونو یاخلاشمیش ! چونکو آرتیق کوچه باشینداکی باققال دا بیلیر اگر ائله بو « ایستیکبار ین حربه سی (!) » اولماسایدی همین شریعت چیلر ایندیه جن باشیمیزا نه اویون گتیرمیشدیلر . بیر آز گؤزوموزو آچمیش اولساق دونیا اؤز سئچیمینی باشدان کئچیرمیش . چوخدان دیر کی چوروموش فیکیرلرین سوموگونون شاققیلتی سی قولاقلاردا شاققیلداییر.
منبع : قادینلار
هیچ نظری موجود نیست:
ارسال یک نظر