نییه «گونئی آذربایجان، ایران دئییل» / داوود توران

ساوالان پورت : سه شنبه گونو، تراختور تیمی و الجزیره تیمی آراسینداکی اوینان فوتبال مسابقه سینده، آچیلان بیر پلاکارد اویونا دامغاسینی وورموشدور. بو پلاکاردا « گونئی آذربایچان ایران دئییل» شعاری یازیلمیشدیر. بو پلاکارد حاققیندا یازیلی و سوسیال مئدییالاردا بیر چوخ فیکیر اورتایا آتیلمایا باشلانمیسدیر. فارس مئدییاسی و خصوصی ایله حکومت طرفداری وبسایتلار بو پلاکارد حاققیندا یازالار یازمایا باشلامیش و خبردارلیق ائتمیشلردیر. بونون یانی سیرا اؤزلرینی دئموکرات اولاراق گؤرستمه یه چالیشان بعضی لری ده بو شعارین یئرسیز اولدوغونو و اونا قارشی اولدوقلارینی دیله گتیرمیشدیلر. هر ایکی آخیم دا عئینی ادبیات ایله مسئله یه یاخلاشمیدیلار. اولای هله تزه اولدوغو اوچون گلجک گونلرده ده بو پلاکارد حاققیندا یازیلار یازیلاجاقدیر. بو قیسسا دیرلندیرمه ده، بو شعارین وئردیگی پیامی، اونا قارشی اولانلارین توتومونو و ائتکی لرینی آچیقلامایا چالیشاجاییق.

شبهه سیز تراختورون آسیایی اویونلایندا آچیلان بو پلاکارد، گونئی آذربایجان میللی حرکتی سورجینده بیر دؤنوم نقطه سی اولاراق اؤز یئرینی آلاجاقدیر. آرتیق بو دؤنمدن سونرا گونئی آذربایجان تورکلرینین اؤز میللی کیملیکلرینی الده ائتمه سورچینده یئنی بیر مرحله ایله قارشی قارشییا اولدوقلاری تثبیتلنمیشدیر. تراختور پدیده سی حاققیندا یازدیغیم فارسجا یازییدا(1)، فوتبال اویونون، کیملیک بیلدیرمه ده و گوج گؤستریمینده بیر آراج اولودوغونو یازمیشدیم. بو اویونون دیگر اویونلار ایله فرقی بو ایدی کی، تراختور تیمی باشقا بیر اؤلکه نین تیمی ایله اویونو وار ایدی. بو دا آذربایجان میللی حرکتینه، اؤز حاقلی ایستکلرینی دونیا یا چاتدیرماق اوچون بیر فرصت ایدی. ایندی دوشونوله بیلر کی گونئی آذربایجان مسئله سینه دیققت چکمک اوچون هانسی شعار سئچیلمه لی ایدی؟ گونئی آذربایجان دا تورک دیلینین اوخوللاردا یاساق اولماسی، اینسان حاقلارینین اخلاللری، آسیمیلاسیون سیاستلرینه معروض قالماسی، آیریمجیلیغا تابع توتولماسی .... بوتون بو مسئله لر اؤز وارلیغینی اؤزت و گوجلو اولاراق «گونئی آذربایجان، ایران دئییل» شکلینده اورتایا قویموشدور. بو شعار گونئی آذربایجان تورکلرینین ان اینسانی ایسته گی اولاراق سهند استادیوموندا دالغالانمیشدیر. اگر اینسانلارین ایسته گینه سایغیلی اولارساق، او زمان بو شعار قارشیسیندا سایغی دان باشقا بیر عملین ایچینه گیرمک، دئموکراسی سؤیلمی چرچوسینده دوغرو دئییلدیر.      

ایندی نییه «گونئی آذربایجان، ایران دئییل» شعارینی اینجه لمه چالیشاق. گونئی آذربایجان هئچ بیر زامان ایران اولمامیشدیر. ایران جغرافیاسی ایچریسینده اولسا دا، توپلوسال روح و کیملیک اولاراق ایران ایچریسینده یئر آلمامیشدیر. گونئی آذربایجان، ایرانلی لاشدیریلماق ایسته نمیشدیر. سون یوز ایلدیر بوتون رسمی امکانلاردان فایدالاناراق بیر ملتین کیملیگی یوخا ساییلیب و اونو ایرانلی لاشدیرماق ایسته میشلردیر. چونکو اؤزلری ده بونا اینانیرلار کی آذربایچان ایران دئییل. اونون اوچون بوتون گوجلرینی سفر ائتمیشلر تا، گونئی آذربایجانی ایرانلی لاشدیرسینلار. ایرانلی لیق آدی آلتیندا اونون وارلیغی اایندن آلسینلار.

اگر آذربایجان ایران اولسایدی، اونون دیلی مکتبلرده اوخودولوردو.

اگر آذربایجان ایران اولسایدی، اونون آسیمیله ائتمه یه چالیشمازدیلار.

اگر آذربایجان ایران اولسایدی، آیریمجیلیغا معروض قالمازدی.

اگر آذربایجان ایران اولسایدی، اونون کولتورو یوخا ساییلیب تحقییر اولونمازدی.

اگر آذربایجان ایران اولسایدی، اونون تاریخی تحریف ائدیلمزدی.

اگر آذربایجان ایران اولسایدی، اونون کیملیگی انکار ائدیلمزدی.

.....

آذربایجانین ایران اولمادیغینی ذاتن سیز اؤزونوز گیزلی شکیلده دئییرسیز. ایندی بو میللت اؤزونون ایران اولمادیغینی دیله گتیردی.

بو شعار قارشیسندا جبهه آلان گروهلار ایسه، هله ده مسئله نین نه اولدوغونو آنلاماق ایسته میرلر. ایران حاکمیتی طرفداری مئدیا، پان فارسیزملر و سؤزده دئموکراتلار بو شعارا قارشی اولدوقلارینی آچیق شکیلده دئییرلر. بو گروهلار، شعارین کیچیک بیر اقلیت طرفیندن دستکلندیگینی ادعا ائدیرلر. اگر بو شعار بیر آزینلیق طرفیندن دیله گتیریلیرسه او زامان نییه یئری-گؤیو بیر بیرینه وورورسوز؟ اگر بو ایسته یین طرفداری یوخسا، ندن بیر تهلیکه اولاراق گؤرورسوز؟ ایران حاکمیتی طرفدارلارینی و پان فارسیزملری آنلاماق مومکوندور. چونکو اونلار هر تورلو اینسان حاققینا قارشی اولدوقلارینی عمللری و سؤزلر ی ایله ایثبات ائدیلر. اما سؤزده دئموکراتلارین بو شعار قارشیسندا سرت توتوملاری دوشوندوروجودور. بو مسئله یه قارشی اولدوقلارینی دیله گتیریرکن دیگر ایکی گروه کیمی مسئله یه باخیرلار. بو شعاری سسلندیرنلری آز قالیرلار کی دیگر ایکی گروه کیمی «از آنسوی ارس»(2) آدلاندیرسینلار. اونلارین مشکولو ایران-دا دئموکراسی فیلان دئییل، ایرانین بوتونلوگودور. اگر ایران-داکی میللی مسئله یه، اینسان حقوقلاری چرچوسینده دئییل، اؤلکه بوتونلوگو تهلیکه سی ایله یاخلاشیرسانیز، بو سورون هئچ بیر زامان حل اولمایاجاقدیر. بیرلیکده یاشامایا مجبور مویوق؟ آذربایجان، ایران اولماق مجبوریتینده می؟ البته کی خئییر.

  

(1) http://www.tebrizsesi.com/site/index.php?option=com_content&view=article&id=76:1388-11-07-16-41-54&catid=14:meqaleler&Itemid=29

(2)   «از آنسوی ارس» سؤزو یاخلاشیق 70 ایلدیر ایران سیاسی ادبیاتیندا، گونئی آذربایجان تورکلرینین میللی ایستکلرینی باسدیماق اوچون ایشله دیلن بیر تئریمدیر. گونئی آذربایجان دا میللی مسئله ایله باغلی بیر اولای اولدوغو زامان مخالفتی و اقتداری بو سؤزو ایشلتمه یه باشلار. گؤرسن ندیر بو آنسوی ارس؟