روبئرت اویئن
آدلی بیر اینگیلیس – دوزدور، هئچ بیر تانیشلیغیمیز یوخ‌دو – توی‌دا دیندارلارلا
آتئیستلرین آراسین‌دا دوشه‌ن داوادا دئییب کی، یا بوتون آداملار خوشبخت اولمالی‌دیر،
یا دا هئچ کیم!
و گیریب آرایا
تاریخ‌دن گولمه‌لی بیر نومونه ده گتیریب. دئییب آیه، هئچ بیلیرسینیز آتئیزمین دین
سوییه‌سینه اوجالدیلدیغی سووئت دؤنه‌مین‌ده آتئیست کومسومول زهمتکئشلر دیندارلارلا
نئجه موباریزه آپاریردیلار؟ دالاشانلار دئییب یوخ. روبئرت قاییدیب کی، آی بدبختلر،
آتئیستلر مسجیددن دیندارلارین آفتافالارینی اکیشدیریب، گویا، اونلاری ترکسیلاه
ائدیردیلر. سیز ایسه بیر-بیرینیزین اتینی دیدیرسینیز.
ایران‌دا
آذربایجان‌لی خانیم عالیمه‌میزین حبس اولونماسی خبرینی و سایتلارین بیرین‌ده سورییه
لی عصیان‌چی گنجلرین حکومت عسگرلرینی اسیر گؤتوروب گولله‌له‌مه‌سی گؤرونتولرینی
گؤره‌ن‌ده یادیما ۱۹۸۹ – ۱۹۹۰-جی ایللر دوش‌دو. او واخت ۱۱-۱۲ یاشیم واردی. خالق شیمالی
آذربایجانلا جنوبی آذربایجان آراسین‌داکی تیکان‌لی مفتیللری سؤکه‌ن‌دن سونرا ایران‌دان
بیز طرفلره ایران-عراق محاربه‌سینین ایشتیراک‌چیلاری اولان سینیق-سالخاق، اوز-گؤزو
چاپیق خئی‌لی کاسیب ایران وطنداشی گلیردی؛ کیمی قاچاقمال‌چی‌لیق یولویلا سیقارئت،
آراق، آلومینیوم قاب-قاجاق آلوئرینه گؤره، کیمی بو تای‌داکی قوهوملارینی تاپماق‌دان
اؤترو، کیمی ده، ساده‌جه، موللا رئژیمینین اوخودوغو حؤکم‌دن قورتولماق اوچون قاچیب
بیزیم کندلرده‌کی تؤوله‌لرده، سامان‌لیقلاردا گیزله‌نیردیلر، روسلار اونلارا
«ایشپیون» دئییردیلر. کندلر بو «ایشپیونلارین»، قاچاقمال‌چیلارین ییرتیلیب آیاغین‌دان
چیخان پالچیق‌لی اوجوز «کروسووکا»لاری ایله دولو ایدی. هاردا جیریق آیاققابیلار
گؤروردوک‌سه، او دقیقه بیلیردیک کی، بوردان ایران وطنداشلاری کئچیب.
بو آداملارین
بیزیم ائولرده ائتدیی ان ماراق‌لی صحبتلر، سؤزسوز کی، ایران-ایراق محاریبسیله باغلی
اولوردو. بو صحبتلردن بیرینی – آفتافایلا، داها دوغروسو، آفتافادان سلاح کیمی
فایدالانماغین محاربه‌ده نه کیمی اوغورلار الده ائتمه‌یه رواج وئرمسیله - باغلی
اولانینی خاتیرلادیم: مؤوزوموزا دخ‌لی اولدوغو اوچون. او واخت او تای‌دان گلنلر
دانیشیردیلار کی، سوباشینا چیخدیغی اوچون اوستون‌ده سلاح گؤتورمه‌یه‌ن بیر ایران
سربازی (فارسلار عسگره «سرباز» دئییر) قفیل‌دن عراق کشفیات‌چیلاری ایله
قارشیلاشیر. ایشلرین شولوق اولدوغونو گؤروب «یا الله، اؤزون دادا یئتیش» – دئیه‌رک
آفتافاسینی کؤینیینین آلتین‌دا گیزله‌دیر، یالنیز لوله‌سینین اوجونو چؤله چیخاریب
قفیل‌دن چؤمبلدیی گندلاش کولونون دالین‌دان قالخیر و یالان‌چی «سلاحینی» دوشمه‌نه
توشلاییب قیشقیریر کی، اللر یوخاری! ایراق‌لیلار گئجه واختی اونون قولتوغون‌دان
باخان سویوق لوله‌نین آفتافا یوخ، حقیقی سلاح اولدوغونو ظن ائدیب، تسلیم اولورلار.
آدام قولتوغون‌دا آفتافا بیر دسته عراقلینی قاباغینا قاتیب اوردو قرارگاهینا
گتیریر و یوخاری کوماندانلیغا تحویل وئریر. بو صحبت بوتون جبهه بویو یاییلیر و
آفتافالی عسگره اوردئن-مئدال، فخری آد وئریلیر. حتی دانیشیردیلار کی، ایران
مطبوعاتین‌دا الین‌ده آفتافا بیر دسته عراقلینی اسیر گؤتوره‌ن سربازین
کاریکاتورالاری دا یاییم‌لانیر؛ ایراق اوردوسونا روحی-پسیخی تأثیر گؤسترمک اوچون.
یئنه عنعنوی
حیکمت‌لی شرق خیالپرورلیگی اؤز سؤزونو دئییر: تکی وطنه محبت حیس‌سی گوج‌لو اولسون،
دوشمه‌نه آفتافایالا، اوخلوولا، چؤمچیله، خکندازلا دا قالیب گلمک اولار.
نسه،
اوخوجولاریمیزی یورمایاق، کئچک سؤزوموزون موستافایی آغاسینا. ۲۱-جی عصرده هر هان‌سی بیر ایدئیانی -
ایستر دینی اولسون، ایستره‌سه ده سیاسی - حیاتا کئچیرمک اوچون توپ-توفنگه ال آتماق
نه درجه‌ده ائففئکت‌لی‌دیر، گؤره‌سه‌ن؟ حتی دونیانین ان معاصر حربی
تئخنولوگییاسینا مالیک اؤلکه‌لری بئله آنلاماغا باشلاییبلار کی، ایسته‌نیله‌ن سلاح
اینسان ایراده‌سی قارشی‌سین‌دا آجیزدیر. لاپ توتاق کی، الیتاپانچالی، ائوی سلاح‌لی
بیر زیرراما اؤز دینی-سیاسی آرزوسونا چات‌دی، گل‌دی حاکمیته. آخی اونون خالق اوچون،
جمعیت اوچون خئییر گتیره‌جک، اینسانلاری خوشبخت، آزاد، فیراوان حیاتا قوووش‌دوراجاق
هان‌سی ایدئیاسی، آرزوسو وار کی، گلین ساندیغی کیمی خالق‌دان، جمعیت‌دن گیزله‌دیر؟
او هان‌سی موترققی ایدئیادیر کی، دوغرودان دا، هره علینه بیر تاپانچا گؤتوروب
بیر-بیرینی قیرسا، میللت داها دا آغ گونه چیخاجاق؟ بئله گؤزل ایدئیالار، آرزولار
وارسا، نه اوچون قزئت، اینتئرنئت صحیفه‌لرین‌ده یاییم‌لانمیر؟ نه اوچون خالق
سیاسته، دینه قورشانمیش اؤولادینین فیکیرلرین‌دن، خیاللارین‌دان بیخبر اولمالی‌دیر؟
بو قدر قاران‌لیق مقصددن ایشیق‌لی نسه گؤزله‌مک اولارمی؟
بو گون شرق
اینسانینی تؤوله دامین‌دا گیزلدیلمیش تاپانچانی یاغلاماقلا یوخ، بئیینلرده اویویان
موترققی فیکیرلری اویاتماقلا خلاص ائتمک مومکون‌دور.
فاکت بودور کی،
بین لادئنین «کلاشنیکووف» بیلل قئیت‌سین زکاسی قارشی‌سین‌دا آجیزدیر.
PUBLIKA
هیچ نظری موجود نیست:
ارسال یک نظر