بعضی اینسانلار واردیر کی حیاتلاریندا معنالی
یاشاماغی اؤزارینه بیر غایه اولاراق سئچیب گلجه یه ایز بوراخیرلار. بو اینسانلار
یاشادیقلاری توپلومون ایچینده، بعضن عصیان ائدرلر، بغضن ده سسیز یاشارلار. بو
سسیزلیکلرینده ده آنلایانلار و دویماق ایسته ینلر اوچون عصیانلار یاتار. بو تیپ
اینسانلارین سسیز عصیانلاری یازماق و اورتمکدیر. بلکه ائله بونداندیر کی چوخ آز
اینسان علی ظفرخواه-ی تانیر. آخی او دا سسیز یاشایان اینسانلارداندیر. ظفرخواه خوی
شهرینده یاشایان و فیکریمجه 70 دن چوخ یاشی اولان بیر فولکور آراشدیرماجیسی، یازار
و شاعیردیر. بو گونه قدر آزربایجان فوکلورو حاققیندا؛ 1- آتا بابا لار دئييب
لر (تبريز – 1370)، 2- فولكلور خزانه سي (تبريز – 1379)، 3- ائل
بيليگي ثروتيميز (تبريز – 1383)، 4- دَيَر لي ائل
ميراثي (تبريز - 1386) کیتابلارینی یایینلادیبدیر. آیریجا
«سئوگی» آدلی شعیر کیتابی دا 1384 ایلینده یایینلانمیشدیر. آزربایجان تورک
کولتورونو الیندن گلدیگی قدر یازیلاشدیران و یاشاتمایا چالیشان بو اینسان یاشایان
بیر ده یه ریمیزدیر.
14 یاشیندا تانیدیم علی ظفر خواه-ی. دبیرستانین
بیرینجی ایلینده هندسه اؤیرتمنیمیزدی. اینجه، آریق، آز ساققاللی، یاشلی بیر کیشی
ایدی. هر زامان چرخ ایله گلیب گئدردی اوخولا. چوخ آز گولردی. بلکه ده هئچ گولمزدی.
بیلمیرم. میللتینین بونجا آجیسینی گؤروب نئجه گولسون کی؟ چیلله و بایراملاردا بیزه
بیر دفتر گتیریب و اونون ایچیندن شئعیر اوخوردو بیزلر اوچون. 30-40 ارگن گنجین
اولدوغو بیر کیلاسدا، آزربایجان تورکلویوندن و دیلیمیزدن دانیشاردی. و بیز ارگن
گنجلر ایسه باشقا هاوالاردا ایدیق. فارس کولتورونون بیزه وئردیگی تک دیل فارسجا
ایدی. تورکجه بیزه ناغیل و بایاتیدان
باشقا بیر شئی ایفاده ائتمیردی. اونلار دا یئنی یاییلمایا باشلایان پوپولر کولتورون
قارشیسیندا گوجسوز ایدیلر. آما علی ظفر خواه اومودلو ایدی. گلجه یه توخوم اکیردی.
بو توخوملارین بیر گون بیر یئردن یئشره جه گینی بیلیردی. او باسقین کولتورون
قاباغیندا الینده کی دفتری و سؤزجوکلری ایله مئیدان اوخویوردو.
او کیشی یه چوخ چکدیردیک . بوگون او کیشینین
کیلاسیندا اولدوغوم اوجون هم موتلویام هم ده اوتانیرام. موتلویام چونکو بؤیوک بیر
اینسان گلیشمه مده ائتکیلر بوراخدی. اوتانیرام چونکو او کیشینی زامانیندا آنلایا
بیلمه دیم. تکجه فرقلی بیر شئیلر اولدوغونو فرق ائتدیم. بلکه ائله اوندادیر کی او
زاماندان باشلادیم یازمایا...
ظفرخواه کیمیلری توپلوموموزدا چوخدور. اونلار
بیزیم سسیز قهرامانلاریمیزدیر. سیاسته و منم منملیگه قاریشمادان اونلار میللی
مجادله لرینی دوام ائدیرلر. ائله اونا گؤره ده ظفر خواه، اؤز یاشادیغی شرایطه
اویقون مجادله یؤنتمی بلیرله ییب و او یولدا فعالیت ائدیر. مینلر اؤیرنجی آراسیندا
میللی کیملیک روحو اسدیریر و گؤزلور کی اونلارین آراسیندان بیریلری چیخیب اؤز
میللی وارلیغینی یوکسک سسله هایخیرسین. علی ظفر خواه تمیز بیر آزربایجان تورک
چالیشقانی اولاراق یولونا دوام ائدیر. اؤز کؤشه سینده بیزیم گلجه ییمیزه سؤزلر
خزینه سی توپلور. اوراق کندلره گئدیر و ائشیتدیگی سؤزلری یازیر و اونلارا حیات
وئریر. چونکو او دا یاخشی بیلیر کی سؤزسوز گلجک اولماز.
ظفرخواه قالابالیقلاردان قاچیر، آغیرلاما
تؤرنلرینی سئومیر، تنهالیقدا یازاراق و یاراداراق وار اولدوغونو حیس ائتدیریر
بیزلره. او کیشینین یارادیجیلیغی حاققیندا اوزون مقاله و آراشدیرمالار یازیلمالیدیر.
بو ساده جه بیر خاطیرلاتما ایدی.
بلکه بیرگون حضورونا گلیب او سؤزجوک قوخان
ایللرینی اؤپدوم. بلکه ده هئچ گلنمه دیم. یولون آچیق، عمرون اوزون اولسون اؤیتمه
نیم.
نوت: بو یازینی یازارکن دوستلار واسیطه سی ایله
چوخ چالیشدیم علی ظفر خواه-ین شکلینی ده یایینلادیم. آما اوستاد هئچ راضی
اولمادی... شکیلسیز اولسا دا کؤلگه سی بیزیمله دیر البته ...
هیچ نظری موجود نیست:
ارسال یک نظر