پورفسور زهتابی نی تانیماق و تانیملاماق ساده جه بیر انسانی تانیماق و تانیملاماق دئیل. زهتابی نی تانیماق وتانیملاماق بوتون مادی ومعنوی وارلیغی یوخ ائدیلمک ایسته نن ،چیرکین و ایرکچی بیر آسیملاسیون سیاستی ایله قارشی- قارشی یا اولان و تحقیره اوغرایان بیر میللتین مجادیله سینی و دوروشونو دا تانیماق و تانیملاماق دیر.دقتور زهتابی نی تانیماق اوچون چئشیدلی یونلرده ن و چئشیدلی یونتم لر ایله مسئله یاناشماق اولار. دوقتور زهتابی نی داها دوزگون تانیماق اوچون دوقتورون مجادیله شکلی و ائیلم سللیگینده ن یولا چیخاراق اونو تانیملاماق بو یونتم لر ده ن بیری اولار بیلر. بو آختاریشدا دوقتور زهتابی نی یئنی ده ن بولماغین(کشف ائتمک) یانیندا، اؤزوموزوده (میللت اولاراق) گؤرمک ممکوندور. چونکو دوقتورون تیمثالیند ا، یئنیلمه میش(تام یئنیلمه میش) ،دیرنجی سیندیریلامامیش، شؤوونیزمه هن دئمه میش بیر میللتی گؤره بیلیریک.
دقتورون یاشام حیکایه سی اصلینده بیر میللت ین یاشام حکایه سی دیر.
دوقتورون یاشام حیکایسی ,ایلکین انسان حاقلارینی الده ائتمک, اوزونو یونتمک و دونیا اولسولاری آراسیندا حق ائتیگی یئری آلا بیلمک اوچون مجادله وئره ن بیرمیللت ین حیکایسی دیر.
بو حاق ایستکلری یولوندا اؤلدرؤله ن, سورگون ائدیله ن, دوستاق ائدیله ن بیر میلله تین حیکایسی دیر.
حاق ایستمک اوچون گنج یاشدا آیاقلانماق , بونون اوچون سورگون لرده یاشماغا مجبور قالماق , دوستاقلار و زورلا چالیشما کمپ لری و سون اولاراق وحشیجه اؤلدورلمه.
بو ساده جه دوقتورون باشینا گئلمز. میلیونلارجا آذربایجان تورکو بو یولو گئدر, گئتمه یه مجبور بوراخیلار. ایستر بو سورگون یئری تهران اولسون و یا هر هانسی فارس شهری و یا باکی (اسکی سوویت لر بیرلیگی و بو گون ) , ایران ایچینده یاشانان سورگون گؤنولو گورونسه ده, ایش اوچون گؤرونسه ده, بونو اساس دلیلینین آذربایجانلینی حاق ایستگینده ن گئری دؤندورمک اوچون اویقولانان پولیتیکالارین سونجو اولدغونو بیلیریک.
دوقتورون یاشامینی ایزله یرک بیر ساواشا, بیر حاق آلما ساواشینا , بیر ائشتلیک ساواشینا نئجه باشلاندیغینی, نئجه یئنلگیه اوغرادیغینی و نئجه یئنیده ن بو یئنلیگینین کولرینده ن دوغلودوغونو چوخ راحت گور بیلریک.
بو اینسانین یاشامینی ایزله یره ک بو دوغوشون نئجه اولدوغونو و هانسی آشامالاردان گئچدیغینی گوره بیلریک.
دوقتوریاشادیغی تجربه و دئنه ییم لرده ن حرکت ائد ره ک. ایستر ایران ،ایستر دوغو اؤلکه لری نین چوخوندا توپلومسال دئیشیملر و دئوریم لرده کی باشاریسیزلیقلارین تمل لینده, اؤلکه آیدین لاری نین و دئوریمجلرینین یاشادقلاری توپلومون گرچک لیک لرده ن اوزاق اولمالارینا باغلایردی. توپلومسال و حاق بیلینجینین یوخلوغونا باغلایردی. یانی اینسانلاراؤزحاقلارینی تانیمازلار. اینسانلارین حاقلارینی دین و سیاسی گوجو الینده توتانلارتانیملارلار. بو حاق اورتیمی هر گون گوج مرکزینین اورگانیک آیدینی و دین آدامی اولانلار آراجلیغی ایله یئنیده ن اورتیلر(تـولید اولار).
دیگر طرفده ن ایسه بو اؤلکه لرده کی آیدین و بوروکراتلارین تاسارلادیق لاری(پیلان لادیق لاری) توپلوم اوگولاری( مودل لری), یا باتیدان یاریم- یامالاق بیر تقلید و یادا دونیادان قوپوق ایچه قاپالی بیر توپلوم اولگوسودور. یانی توپلومون گئرچک لیکلرینده ن اوزاق تاسلاقلار. دوقتور بونلاردان یولا چیخاراق ائوره نسه لیک ایله یئره للیگی(محلی) قایناشدیرا بیله ن ، تئوریک بیلگیلری یاشادیغی مکانلا اویقونلاشدیرا بیله ن بیر ضیالی تیپینی ساوونماقدا ایدی.
او بو بیلینج ین آنا کؤکؤنو دیل و تاریخ بیلینجی اولاراق گورودو.
دوقتورو ساده جه بیر دیلچی و بیر تاریخچی کیمی کاراکتریزه ائتمک ،چرچیوه له ندیرمک یالنیش او لور.
او دیلچلیک و تاریخچلیک ایله یاناشی اوز توپلومونون گئرچک بیر آیدنیدی.
آیدین هر زامان ساده جه بیر آددیم کوتله ده ن اؤنده حرکت ائتمه لی دیر،چونکو حرکت لرینده تعجیل ائده نلری کوتله باشا دوشمه یه بیلیر دئیه ن: زهتابی اؤزوده هر زامان بئله بیر چیزگی یی ایزله میشدیر. نه کوتله ده ن اونلارجا کیلومتره اؤنده قاچان , کوتله ده ن خبر سیزو قوپوق، نه ده کوتله نین کوتله سه لینده بوغولان بیر آیدین .
دوقتورون یاشام حیکایه سی گئرچک بیر قهرامانلیق حیکایه سی ایدی.آذربایجان دمکرات فرقه سینین گنجلر قولوندا فعالیته باشلادیغی گونده ن اؤلدورلدوگو گونه قدر.
زهتابی یاشی نین ایرلیله میش چاغلاریندا بئله ساعات لارجا اتوبوس لاردا او شهر ده ن بو شهره، او کتده ن بو کنده گئدره ک انسان لاری آیدین لاتماق و بیلگیله ندیرمک اوچون هئچ یورولمادان اوسانمادان فیزیکی عمرونون سونونا قدر چالیشدی . یورولمادان, ایداسیز و دوغرو یونتم ایله چالیشما سونجو, گه لیشدیردییی آلترناتیو اؤیره تیم سیستئمینی و آلترناتیو اونیورسیته سینی گونئی آذربایجانین هر یئرینه یایدی.
دوقتورزهتابی نین بو قدر اینانیلماز باشاریلارینی ساغلایان (مومکون قیلان). اونون بیلیم سل یئته نه یی نین(استعداد) یانیندا هر زامان باشقالاری نین گؤروشونو دینله یه ن،ا ؤنمسه یه ن ، ده یرله ندیره ن، اؤزونو و اؤز دوشونجه لرینی سورغولایا بیلن ، گؤزده ن گئچیره بیله ن بیری اولماسیندان قایناقلانیردی. بونلارین یانیندا دوقتورون اؤز ائلیشدیری (اؤزونو تنقید ائتمک)، اؤز دونیاسینی یئنیلیه بیلمک جسارتی وچالیشقانلیغی گئرچکده ن اینانیلماز سوییه ده ایدی.
اونون اؤزون ائله شدیرمده کی جسارتی او قدر چوخویدو کی اونون بعضی دوستلاری بئله, زهتابی نین اوزونو بئله یوکسک سس ایله ائله شترمسینی قالدیرا بیلمیردیلر.
دوقتور ان کسکین و ان ائتکین مجادله سلاحی نی معاریفچلیک اولاراق گورودو.
چونکو معاریف چیلیک له دوناتیلمیش(مجهز اولموش) بیلینجلی یوردداشلاردان اولوشان بیر اؤلکه ده، توپلومسال، سیاسی و دیگر ساحه لرده کی قوروم و قورولوشلارین اؤزه لیک ایله دئولت قوروم لاری نین بوتون عمل لری دانایشیلیب- دارتیشیلب مباحثه وتنقید ائدیلیرو بئله لیکله توپلومدا هر جور سؤمورو(استثمار)، آیریمجلیق، حاقسیزلیق سو اوزونه چیخار و اینسانلار غیر دموکراتیک اولقولاری و قوروم لاری راحاتلیقلا تانییب قارشی قویما ایمکانینا صاحیب اولورلار و یا قارشی قویا بیلیرلر، یانی سایدام (شفاف) بیرتوپلومون اورتایا چیخما ایمکانی یوکسک اولور.
هر دئولت سیاسال، ائکونومیک، سوسیال وکولتورل اولقولارین بیرله شمه سینده ن دوغماقدادیر. هر دئولت بو اولقولاری بللی بیر ایدولوژیک سؤیله مه (گفتمان) دایاناراق یاراتمیشدیر و یا یاراتیماغا چالیشیر. سیاسال سیستمه یؤنه لیک بوتون تنقید، اؤنری و مخالفت کاناللاری نین باغلی(قاپالی) اولدوغو ایران کیمی توپلوم لاردا دئولتین رسمی سؤیله می(فارسچلیق وفارس شیعچلیغینی) دیشینداکی سؤیله مه لری سیاسی سئویلم و سیاسی ایستک ایله دیله ندیرمک هارداسا امکان سیزدیر. بوردادیر کی معاریف چیلیک حرکت لری رسمی اؤیر ه تیه(آموزش)رسمی ایدئولوژیه قارشی بیر آلترناتیو اؤیره تی یاراتماق اوچون بیر یول- یؤندم اولاراق اؤنم قازانیلار.
زهتابی بونو آچیق گوره بیله ن آز سایدا آیدینلاردان بیریدی. ائله اونا گؤره ده بوتون گوجونو آیدنلاتما و معاریف چلیگه قویماقدایدی.
دوقتور زهتابی کیملیک سیزله شدیریلمک ایسته نیله ن، یوخ ائدیلمک ایسته نیله ن، اینسان ییغینی( انسان سورو) حالینه گتیریلمه ک ایسته نیله ن ،اؤز کیملیی دئییل, بیر باشقا سینا زورلا بنزه تیلمه ک ایسته نیله ن و هوییت سیزله شدیریلمه ک ایسته نیله ن بیر میللت ین آیدینی اولدوغونو چوخ یاخشی بیلردی. ائله بونا گؤره ده بوتون اثرلرینده , بوتون چالیش مالاریندا آغیرلیغی هویت مسئله سینه وئرمکده دیدی. او بو هویت سیزله شدیریلمه یه قارشی معاریف چی لیی أن ائتگین قارشی قویما شکلی اولاراق اؤنمسه مه که یدی. میللتین هویتی نی , اؤز منلیگینی قازانماق و اینکیشاف ائتیرمک اوچون کولتوره ل و سوسیال چالیشمالارا آغیرلیق وئریردی. او بیلیردی کی بیرئیسل(فردی) منیلگین ان اونملی اؤگه و عنصرلرینده ن بیری دیل و اولوسال بیلینج دیر.
او بیلردی کی منلیگینده ن یوخسون بوراخیلان ,منلیگی باشقالاشان انسان دیکتاتورلارین ماشاسی و ایدولوژیلرین سورغولامایان عسکری اولاجاقدیر.
اونا گؤره ده زهتابی آیدنلانمانین ایلک آدیمینی دیل و تاریخ بیلینجینده گورودو. چونکو دیل و تاریخ بیر ایدولوژیک سویله مین ایکی اؤنملی قایناغی , تملی و سونجودور. فارسلارین بیزه دایاتماق ایستدیکلری دیل و تاریخ فارچلیق و فارس شیعه چلیگی دیر. فارسچلیق وایران شیعه چلیگی و ایرانچلیغین وار اولان رسمی دیلین و رسمی تاریخین تملی, قایناغی و سونجودور. منجه بونو ان درین آنلایان آیدینلاردان بیری زهتابی ایدی.
بو ایکی آراجا یانی رسمی دیل و رسمی تاریخ وار اولان سؤمور ایلیشکسینی هر گؤن یئنیده ن اورته ر. بو ایکی آرجا دایاناراق رسمی مذهب ده هر گؤن و هر تاریخی دؤنمده بو سؤمورو ایلیشکسینین دوامی اوچون یئنی شئکیل آلیب بو ایرقچلیغین بیر آراجی حالینه گه لر.
رسمی دیل , رسمی تاریخ و رسمی ومذهب بوتون آلانلاری اوزه لیک ایله رسمی آلانلاری ایشقال ائده رک توتالیتر بیر سیستمه دوغرو یول آلار. بو توتالیتر سیستم او قدر گوج قازانار کی توپلومسال بیر آغیل توتولماسینا یول آچار. بوردا دیر کی رسمی سویله مین دیشندا قالمای باشارن و بو آغیل توتولماسی خسته لیگنه یاخلانمایانلارین توپلومون بو خسته لیگینی خاطرلاتمالاری اونم قازانار. بودا دیر کی معاریفچلیک حرکتلری توتالیتر سیستملرده بئله اؤزله رینه یئر آچابیلیرلر. بودا دیر کی معاریفچلیک حرکتلری اینانیلمازی باشاریلار. بوردا دیر کی معاریفچلیک حرکتلری ان ائتکین مجادله سیلاحینا چئوریله بیلیرلر.
چونکو معاریف چیلیک، سیویل توپلومون(جامعه مدنی) قورولماسیندا أن اؤنملی آراچ دیر
سیویل توپلوم و سیویل توپلوم قورولوشلارینی قوراما بیلمه میش, کوتله لرینی بیلینجلی حاله گتیره بیل مه میش بیر توپلومدا ، توپلومسال ده ییشمه ده ن, دئوریم دن سؤز ائدیله بیلمز. بئله نچی بیر توپلومدا آرتیق دئیشیم و دئوریمدن دئییل، شورش دن سؤز ائتمک مومکون دور. شورش ایسه زوربالیغا(خشونته) دایاندیغی اوچون اونون دوغوراجاغی و گتیرجه یی سیستم ده خشونتی، زوربالیغی ایچه رجه کدیر.
بئله لیکه له بیر زوربالیق دؤنگوسو(چرخه سی)اولوشاجاقدیر. بئله نچی بیر توپلومدان هئچ بیر زامان باروت و قان قوخوسو اسکیک اولمایاجاق دیر. بوتون دئیشیم لراینتیقام ودوشمانلیق دونگوسونو(چرخه سی) یئنی دن اوره ته جه کدیر.
منجه دوقتور زهتابی نین أن مهتشم و عئینی حالدا اینانیلماز درجه ده ائتگین اولان اثری گئجه گوندوزونو قویاراق یاراتغی آلترناتیواؤیرتیم و آلترناتیو اؤنیورسته سی ایدی. کیمسه اینانمیردی کی او ائولرده , ایش یئرلرینده بئش آلتی گنجی یغیب دیل و تاریخ درسی وئره رک ایرانین او باسقجی و عرقچی رژیمینه قارشی ان ائتگین مجادیله شکلی نی اویقولایر.
آمما اونو قوردوغو آلترناتیو ائیتیم سیستیمی و آلترناتیو اونیورسته سی گئدره ک یایلدی و اوز سونجلارینی دا دوغوردو.
اونون بو تمل لی چالیشمالاری و اورتایا قویدوغو یونتم آذربایجان میللی حرکتی نین بینؤوره لرینی ساغلام یئره باسماسیندا ومیللی حرکت اوچون دمکراتیک آنلایشلی میللی کادرولارین یئتیشدیریلمه سینده اهمییتی گون گئچدیکجه داها یاخشی گؤرونمک ده دیر.
دیلی نی، تاریخی نی ، کولتورونو اؤیرنمه سی، یئنی دن اورتمه سی (باز تولید ائتمک) یاساقلانمیش , هر شئی ساختالاشدیریلمیش. بوتون معنوی وارلیغی خیخ (ایرگن مه لی) اعلان ائدیلمیش بیر میللتین، شووونیزم ایله کیرله نمیش، میردارلانمیش رسمی ائیتیم سیستیمینه قارشی, قورولان آلترناتیواونیورسته نین درس کیلاس لاری آذربایجان اوچون بیر اویانیش ایدی. بو آلترناتیو اونیورسته و ائیتیم سیستمیوحشی فارس شووونیزمینه قارشی بیر مدنی و بیلنج دیرنیشیدی.
اوز جهالت و چرکین عرقچلیقیندا بوغولموش و او توپاراقلاردا یاشایانلاری بو جهالتین ماشاسی و بئینی بوش عسکرلری یاپماق ایسته یه ن فارس عیرقچلیغینا قارشی آتیلان بو تمل بو گون بام باشقا بیر نقطه ده دیر ایسه اگر, شوبهه سیز کی زهتابی نین پای دانیلماز و گوز یومولمازدیر.
دوقتور ائشسیز (تایسیز،بنزری اولمایان) جسارتی ایله یانلیش تانیملانان ، بیچیمله ندیریله ن و شووونیزمین بیلیم دؤنو گئیدیردیی ایرانداکی تاریخ تئوریسینه وآنلایشینا ایلک هجوم ائدنلرده ن و سورغولویانلاردان ایدی.
زهتابی وحی آیه لری کیمین قبول ائدیله ن بو تاریخ تئوریسینین نه قدر ایچی بوش تمل لره دایاندغینی اثبات ائتمک ایله قالمایب بلکه ایران تاریخ آنلایشینین یئنی ده ن سورغولانماسی اوچون بیر یول آچدی.
زهتابی نین دیل درسی ساده جه بیر دیلی تکنیک اولاراق اویرتمک دئیل دی. اونو دیل کیلاسیندا اوتوران هر اویرنجی ایستر- ایستمز تورک دیلینین ادبی وارلیغی ایله, تاریخی سورجی ایله و میللتینین یاشادیغی تاریخی سورج ایله تانیش اولوردو.
ادبیات دونیاسی فارسجا یازارلار حافظ؛ سعدی؛… . بلکه ده بیر نئچه یابانجی شاعر و یازاردان اولوشان گونئی آذربایجان گنجی اونون دیل کیلاسیندا اوتوراراق دده قورقوت؛ قوتادغوبیلیک؛ ناظیم حکمت ؛نباتی ؛گنجعلی صباحی ؛ سهند و… ایله تانیشاراق دونیاسی گئنیشله یردی.
او بیلردی کی گونئی آزربایجان تورکلرین حاقلی مجادیلسی آنجاق بیلینج ایله قازانیلاجاق . او ان بویوک سیاستی دیل و تاریخیمیزی اویرنمک و اویرتمک ده گورودو و منجه بو گون بئله بو یونتم گونجلینی قوروماقدادیر.
او بویوک اویرتمنی هر زمان سایغی ایله آنماقدان قورور دویوموشام و دویاجاغام.
بو یازینی ۲۰۰۸ استانبولدا یازمشدیم ۲۰۱۳ ده یئنده ن گوزده ن گئچیره ره ک پایلاشما گره یی دویدوم.
یازینین ائدیت ائدیلمه سینده یاردیملاریندان دولای سایین پرویز بئی احمدزاده یه سونسوز تشکورلریمی بیلدیرمک ایستریم.
اومود ائوره ن
۲۰۱۳ لاهه
هیچ نظری موجود نیست:
ارسال یک نظر