بوگونلر تورکییه آیری تاریخ یاشاماق‌دادیر. ایستانبولون تاکسیم
میدانی باشلانغیج‌دا اولدوغو کیمی یالنیز دئییل، بو گون بوتون تورکییه بؤیوک بیر
میدان‌دیر - خالق میدانی. بیر آغاجین کسیلمه‌سیله باغلی آذربایجان‌داکی اولایلار
یادا دوشور. باشلانغیج بیر آغاج اولدوغو کیمی، بوتون خالقین، بوتون اؤلکه‌نین
قالخیم ندنلری ده اوخشاردیر: میللی من‌لیک دویغوسو، اؤزگورلوک ایستیی، بوتون
بونلارلا باغلی ایللرله یاشانان، ایللرله سوره‌ن سیخینتیلار...
بیزده‌کی تانینمیش پولیتولوقلاردان بیری اردوغانین بو اولایلاردان
قالیب چیخاجاغینی سؤیلییر. من بونون ترسینی دوشونوره‌م. منیم دوشونجه‌مه گؤره،
اردوغان بو اولایلاری قاباقجادان اودوزموش‌دو، گؤستردیی آشیری پولیس سرت‌لیگی ایله
بیر داها اودوزدو. بوتون دیکتاتورلاری، دیکتاتورا گؤرسنیشلرینی کسکین‌لیکله
قینایان اردوغان گرک‌سیز یئره دیکتاتور دوستو ایلهام الیئوین ائتدیینی ائتدی:
یانلیشینی پولیس گوجونه دوغرولتماغا چالیش‌دی. بونونلا دا اردوغان گئرچک کیملیینی
اورتایا قوی‌دو، بیر ده منیم ایللردن بری اونونلا باغلی یازدیقلاری‌می دوغرولادی.
تورکییه‌ده ده، بیزده ده اردوغانا ائیفوریک تاپینما چاغلارین‌دا من
اونو الش‌دیره‌ن، اونون یانلیش یول‌دا اولدوغونو گؤستره‌ن چوخ‌لو سای‌دا یازی
یازمیشام. بلکه، تورکییه‌نینی اؤزون‌ده ده کیم‌سه اردوغانا قارشی بیر ائله یازی
یازماییب. من او یازیلاری تورکییه‌ده ده، آذربایجان‌دا دا کیملرین‌سه اوغورلوق
پولیتیکا گریینه، یالان فورمولونا چئویردیی «بیر میللت - ایکی دؤولت» فاکتینا
باغلی‌لیق آخارین‌دا یازمیشام. گؤستریله‌ن فورمول‌دان یاناشماقلا بیلملیگیک:
تورکییه‌ده یورودوله‌ن یانلیش دؤولت پولیتیکالاری آذربایجانین، ائل‌جه ده
آذربایجان‌دا یورودوله‌ن یانلیش دؤولت پولیتیکالاری تورکییه‌نینی ایتکی‌سی دئمک‌دیر.
بو باخیم‌دان تورکییه‌نین دؤولت پولیتیکاسین‌داکی یانلیشلارا بیزده‌کی،
آذربایجانین دؤولت پولیتیکاسین‌داکی یانلیشلارا تورکییه‌ده‌کی سئچکینلر (ائلیتا)
سویوققان‌لی یاناشمامالی‌دیر. اونلاردا دا، بیزده ده بئله یاناشما دوزگون
ساییلمازسا، اوندا «بیر میللت - ایکی دؤولت» دئیی‌می کیمه، نیه گرک؟!
اردوغانین سوچو نه؟ اردوغان تورکییه‌نی ائکونومیک باخیم‌دان ۱۶-جی یئره قالدیرب. باشقا جور دئسک،
تورکییه‌نی وارلاندیریب، خالقی چؤره‌یه چاتدیریب بونا گؤره، سؤزسوز، سایغی حقوقونا
ییلنیب - بونو کیم‌سه دانمیر، دانا بیلمز. آنجاق... «اینسان یالنیز چؤرکله
یاشامیر». چؤرک اینسانین مینیموم ایستکلرینین اؤدونجودور. بس اینسانین ماکسیموم
ایستکلری؟ سیاسی تئرمینولوگییا ایله دانیشساق، چؤرک بازیس‌دیر، بس اوستقوروم؟
ققاباقلار دؤنه-دؤنه یازدیغیم کیمی، تورکییه‌نی آتاتورک‌چو دوشونجه سیستئمین‌دن
اوزاقلاش‌دیرما چالیشمالاری اردوغانین باغیشلانماز سوچودور. بیزده آتاتورک‌چو
دوشونجه سیستئمینین نه اولدوغونو بیلمه‌یه‌نلر اردوغانین تورکییه‌نی ایر‌لییه
آپارماق اوچون آتاتورک آدینا باغلی دوقمالارا قارشی چیخدیغینی دوشونورلر. آتاتورک
دئییردی: «من معنوی میراس اولاراق هئچ بیر دوقما... قویمورام. منیم معنوی میراسیم
بیلیم‌دیر، عقل‌دیر». اردوغان نه ائتدی؟ اردوغان آوروپا بیرلیینه قاتیلماق
باشوورولاری ایله یاناشی، تورکییه‌نی آتاتورکون یؤنلتدیی چاغداش دؤولت‌چی‌لیک
یولون‌دان توربان‌لی خیلافت یولونا یؤنلت‌دی.
اردوغانین سون چاغلارداکی چیخیشلاری آوتوریتار لیدئر چیخیشلاری ایدی.
موخالیفت لیدئرلری ایله هر گون رینقه چیخماغی اردوغان اؤزونون باش باخان بورجونا
چئویرمیش‌دی. اونون بیر-بیرین‌دن تیکان‌لی چیخیشلاری، دئمک اولار، تئلئویزییالارلا
هر گون بوتون اؤلکه‌یه یاییلیردی. تورک کاراکتئری بئله آشیری داورانیشلارلا
باریشماز - اردوغان بونو چاغین‌دا آنلاییب گئری چکیلمک یئرینه، گئتدیکجه داها
آرتیق سایمازلیق سرگیلییردی. بئله‌جه، گونلرین بیر گونو او، آچیق-آچیغینا میللتی
هئچه سایان چیخیش‌دا بولون‌دو. بئله‌لیکله ده، او، موخالیفت لیدئرلرینه اؤلکه بویو
گئنیش میدان وئردی. اردوغان بو چیخیشی ایله آتاتورک دوشونجه سیستئمین‌ده اؤنجول
یئر توتان بیر پرینسیپه - میللی هئگئمونلوق پرینسیپینه قارشی چیخیردی.
بیر آی، آییاریم قاباق باخچالی ایله قیلینجداروغ‌لو بوتون اؤلکه‌نی
گزه‌رک اردوغانین میللته «حقارت ائتدیینی» بیلدیریر، بؤیوک تورک خالقینین بونا
دؤزمیجیینی دئییردیلر. اردوغان‌سا اؤز ایشین‌ده ایدی: یول وئردیی داها بیر یانلیشا
گؤره باغیشلانماغینی ایسته‌مک یئرینه، هر گون تئلئویزییا ائکرانلارینی توتوب
موخالیفت لیدئرلرینی الش‌دیریردی...
آزادلیق قزئتسی
هیچ نظری موجود نیست:
ارسال یک نظر