یازی‌چی زومرود یاغمورون «دیریلری
باس‌دیرین» رومانی بو یاخینلاردا تورکییه‌ده آنادولو تورکجه‌سین‌ده («دیریلئری
گؤمون») چاپ‌دان چیخیب. بو ندن یازی‌چی ایله صحبتیمیزه کؤرپو سال‌دی. ایلک
سوالیمیز ایسه طبیعی کی، کیتابینین تورکییه‌ده چاپ ائدیلمه‌سی باره‌ده اولدو.
- زومرود خانیم، آنکارادا کیتابینیز
یاییملان‌دی، تبریک ائدیریک. فیکیرلرینیز نئجه‌دیر؟
- طبیعی کی، خوش اولدو. بو خاریج‌ده
درج اولونان بیرینجی کیتابیم دئییل، کئچه‌ن ایل گونئی آزربایجان-دا دا درج
اولونموش‌دو. بیر کیتابیم دا یاخین‌دا باشقا بیر اؤلکه‌ده درج اولوناجاق، خبرینی
گؤزلییرم. اما دوشونوره‌م کی، بونلار آزدیر. منجه، یئنی ادبیات یارادانلار، خصوصاً
ده آزاد سؤزون آرخاسین‌دا دورا بیله‌نلر داها چوخونو حاق ائدیر.
- معاصر ادبیات دئمیشکه‌ن، سیز قادین
یازارلاری ایچری‌سین‌ده ان آغیر و جسارت‌لی مؤوضولارا مراجعت ائد‌ن یازارسینیز. هم
ده سهو ائتمیریک‌سه، بؤیوک هجم‌لی اثرلرین مؤلفی کیمی ده گنج قادین یازارلاریمیز
آراسین‌دا تکسینیز. نئجه اولور، بیر خانیم یازار اوچون بو، آغیر دئییل کی؟
- عموماً رومان یازماق آغیردیر. شعیر
آنلیق‌دیر، دویغولارین آن ایچری‌سین‌ده‌کی توغیانی‌دیر، رومان‌سا زامانلا منتیقین
و دویغولارین وحدتین‌دن یارانیر. رومان‌چی‌لیق ادبیاتین فهله‌لیگی‌دیر. آغیرلیق
قادین یازار اولماقلا باغلی دئییل. یعنی من یازان‌دا نه آرتیق یونگوللوک هیسس
ائدیره‌م، نه ده آغیرلیق، همکارلاریم کیمی یازیرام. بیر ده رومانی یازماق دئییل،
اونو بیتکین حالا گتیرمک منجه، داها چتین‌دیر.
- «دیریلری باس‌دیرین» رومانینین
ماراق‌لی سوژئتی وار. ایکی زامان کسیی اثرین سونون‌دا مهارتله بیرلشدیریلیب. حادثه‌لرین
گئدیشاتی دا الا سونلوقلا بیتیب. اثرین اولین‌ده‌کی «دیکتاتورلارا اتحاف» کلمه‌سی،
سون‌داکی چومله، «دونیانین ان آخماق آدامی» ایله بیرلشه‌ن‌ده تام منزره اورتایا
چیخیر.
- ماراق‌لی‌دیر کی، منه گلن اوخوجو
مکتوبلارین‌دا دا محض بو، اثرین سونون‌دا ایکی زامان کسیینین بیرلشدیریلمه‌سی داها
چوخ بیه‌نیله‌ن مقام کیمی گؤستریلیر. بونو بیله‌رک‌دن‌می ائتمیشه‌م، بیلمیرم. اثری
باشلایان‌دا سون جمله‌نی بیلیردیم. اما محض ایکی زامانین بیرلشجیینی بیلمیردیم.
اوبرازلار اؤزلری بو سون‌لوغو حاضرلادی. من ده اونلارین آردین‌دان گئتدیم.
- زومرود خانیم، کناردان سیزی جدی و
مؤهکه‌م قادین کیمی تانیییرلار. بس حیات‌دا نئجسینیز؟
- ائله گؤروندویو کیمی. اما بو جدی
قادینین یعنی باشین‌دا دویغولو و کؤورک بیر قادین دولاشیر.
- آنجاق سیاسی کؤشه یازاری کیمی قله‌مه
آلدیقلارینیزدا قتییه‌ن دویغولو اولدوغونوز هیسس ائدیلمیر.
- آدی اوستون‌ده‌دیر - سیاسی کؤشه...
سیاست‌ده دویغو اولمور. ایکینجی‌سی ده من آذربایجان اقتدارین‌دان یازان‌دا، هر گون
حبسلردن، شرله‌مه‌لردن، دؤیولمه‌لر، تهدیددن یازان‌دا نئجه دویغولو اولوم. من هئچ
بیر سیاسی پارتییانین عضوو دئییله‌م. منیم اوچون آذربایجان وار، اونون گلجیی، گله‌جک
نسیلین داها آزاد و راحت یاشاماسی وار. و بونو، گلجیی انگلله‌مه‌یه چالیشان هر
کسه، هر شئیه قارشییام. بیر چوخ دیر کیمی حیاتیمیزا سوخدوغوموز ناقص‌لیکلره، توپلوم
کیمی کومپلئکس‌لی اولماغیمیزا، عادتلریمیزین بعضیلرینین اینسان فطرتینه یاد
اولماسینا... اما دوشونوره‌م کی، ایندی بونلارلا دئییل، بیزیم گلجییمیزی انگه‌له‌یه‌ن
اقتدارلا ساواشماق، بوتون ائنئرژینی اونا صرف ائتمک لازیم‌دیر. چونکی میکروبو
اؤلدورمک اوچون یارا قورودولمالی‌دیر و من امینه‌م کی، بیز ایندیکی اقتدارین
یوروتدویو سیاست‌دن قورتولا بیلسک، خالق هر شئیی اؤزو تنزیمله‌یه‌جک.
- گله‌جک دئدینیز. ندیر سیزین اوچون
گله‌جک؟
- ایندی ایله یاشایا بیلمک... کئچمیش‌دن
قوپا بیلمک و اونون گلجیی انگلله‌مه‌سینه ایمکان وئرمه‌مک.
- اینسانلاری سئویرسینیزمی؟
- بیلمیرم، بونون آدی ندیر، اما من
اینسانلارین آجی‌سینا دایانا بیلمیرم. اونلارا قارشی دوروست و مرهمت‌لییه‌م. بونون
آدی سئوگی‌دیرسه، دئمک سئویرم.
- بس اونلارا گووه‌نیرسینیز؟
- اینسانلارامی؟ یوخ، گومان کی،
یوخ... گووه‌نمک باشقا بیر شئی‌دیر و من مرهمت ائتدییم بیرینه بئله گووه‌نمه‌یه
بیلره‌م. نیه؟ چونکی اینسانلاری ظاهری یاشانتیلارینا گؤره دیرله‌ن‌دیرمیرم. مثلاً،
کاسیب، اللری قابارلی، اوزو گون‌دن یانمیش بیرینی گؤروب آجییا بیلره‌م، اما اونا
گووه‌نه ده بیلمره‌م. چونکی بو مزلوملوغون آرخاسین‌دان نه چیخاجاق، اونو بیلمیرم.
گوونمدییم بیرینه یاخشی‌لیق ائده بیلره‌م، اما او، حیاتیما گیرمه‌دن. بونلار فرق‌لی
شئیلردی.
- بس دونیا ایله آرانیز نئجه‌دیر؟
- دونیا منه گؤره یاشانیلاسی یئر
دئییل و ایمکانیم، گوجوم اولسای‌دی اونو ساخلادیب دوشردیم. بونو باجارمیرام، اوزین‌ده
زامانی دایاندیرماغا چالیشیرام.
- نئجه؟
- بیلمیرم. ایللر اؤنجه بیر دفعه
بونو باجارمیشدیم. دونیایلا، حیاتلا، اینسانلارلا دیل تاپا بیلمیردیم. عموماً، من
بو سایدیقلاریمین دیلین‌ده دانیشا بیلمیرم. بو دا زامان-زامان منی اینجی‌دیر. او
اوزده‌ن ده اونلارین دیلینی اؤیره‌نه بیلمدییم‌دن، اونلار منیم دیلیم‌ده
دانیشمادیغین‌دان زامانی ایچیم‌ده دایاندیریب سوسورام.
- نیه دیل تاپا بیلمیرسینیز؟
- دونیانین دیلی ریادیر، من‌سه بونو
باجارمیرام. ساختادیر، بولاشماق ایستهمیرم. یالان‌دیر، دانیشماق ایستهمیرم. و
بیلیرسینیز... فولکنئره هسد آپاریرام.
- نیه؟
- او دا دیل تاپا بیلمه‌دی. من‌دن
فرق‌لی اولاراق او، زامانی ایچین‌ده دئییل، حیاتین‌دا دایان‌دیرا بیل‌دی.
- ان چوخ نیی سئومیرسینیز؟
- یالانی...
- هئچ یالان دانیشمیرسینیز؟
- یوخ، دانیشمیرام. چونکی یالانین
یالان گتیردیینی بیلیرم. یالانلا خوشبخت اولونمادیغینی بیلیرم. یالانلا خوشبخت
اولماق اولمور. چونکی یالان حقیقت‌دن آشاغی‌دیر، اسکیک‌دیر و بیر گون موطلق اونا
مغلوب اولور. من بونا اینانیرام. یالانلا خوشبخت اولماق ان بؤیوک بدبخت‌لیک‌دیر.
- بس عدالت‌لی اولماق؟
- عدالت‌لی اولماق... بیلمیرم
باشقالاری نئجه یاشاییر، اما من «دیریلری باس‌دیرین» اثرین‌ده‌کی یول‌چو اوبرازین‌دان
اؤیرندیم بعضی شئیلری. اوللر عدالت‌لی اولدوغوم کیمی، باشقالارینین دا عدالت‌لی
اولماسینی ایستییردیم، بونو گؤرمه‌یه‌ن‌ده اوزولوردوم. سونرا اؤیرندیم کی، اؤزوم
عدالت‌لی اولسام یئتر، باشقالارین‌دان دا عدالت‌لی اولماغی طلب ائتمک حیاتین
داشلاشمیش قانونلارینا قارشی گئتمک‌دیر.
- بس پروبلئملری نئجه حل ائدیرسینیز؟
- باخ، بو چتین‌دیر و من ائله
یاخینلاردا بو حاق‌دا دوشوندوم. قیز قالاسینا قالخمیسینیزمی؟ اوردان آداملار،
ماشینلار بالاجا گؤرونور. من ده پروبلئملرین یوخاری‌سینا قالخماغا چالیشیرام کی،
اونلار منه بالاجا گؤرونسون. بو آسان دئییل، اما مومکون‌سوز ده دئییل، دئیه
دوشونوره‌م.
- پئشیمان‌چی‌لیقلارینیز وارمی؟
- وار طبیعی... نیه ائله گومان
ائدیرسنیز کی، من اللهین غضبینه گلمیشه‌م؟
- نئجه یعنی؟
- چوخ ساده. بیز اینسانلار ائله
گومان ائدیریک کی، الله بیزی آنجاق جانیمیز، مالیمیزلا جزالاندیریر. منجه، بئله
دئییل، اصل جزا ائتدیکلرینین مسولیتینی آنلاماماق، خجالت چکه، پئشیمان اولا بیلمه‌مک‌دیر.
او کی قال‌دی منیم پئشیماچی‌لیقلاریما، ۱۰ ایل
یازمادیم، بونا پئشیمانام. کیم بیلیر او ۱۰ ایلده
ایچیم‌ده نلر اؤلدو...
- زومرود خانیم، ایندی نه
یازیرسینیز؟
- «یاغیش قادین» رومانینی بیتیرمیشه‌م
و ائله اوردا دا محاربه‌لرین خالقلارین گلجیینی انگللدیینی قله‌مه آلمیشام. خوجالی
حادثه‌لری اساسین‌دا یازیلیب و بو رومان‌دا دا زامان بیر گونه سیغیشدیریلیب، اوچ
زامان کسیی بیر قادینین آجیلارین‌دا بیرلشیب. هله اوزرین‌ده ایشلییرم. یای‌دا تام
بیتیره‌جه‌یه‌م یقین.
- سیزه اوغورلار.
- سیزه ده تشککورلر.
هیچ نظری موجود نیست:
ارسال یک نظر