آذربایجان‌لی سوسیولوق و گونئی آذربایجان سوسیو-کولتورل آراش‌دیرمالاری
(گوناسکام) وئب صحیفه‌سینین رئداکتورو داوود توران آمئریکانین سسینه موصاحیبه‌ده
تورکییه و مصرده باش وئره‌ن سیاسی اولایلارین بو اؤلکه‌لرین یاخین شرق سیاستین‌ده‌کی
روللارینا تأثیری، ایرانین تورکییه‌ده‌کی کوتلوی اعتراضلار و مصرده‌کی سیاسی
دییشیک‌لیک‌دن یارارلانما احتیمالینی شرح ائدیب.
تورکییه و مصرده‌کی اولایلارین بؤلگه‌نین سیاسی خریته‌سی
اوزرین‌ده اؤن‌م‌لی تأثیر بوراخاجاغینی سؤیله‌یه‌ن داوود توران خصوصیله تورکییه‌نین
حاکم پارتییاسینین سورییا سیاستین‌ده جدی پروبلئملرله اوزلشدیینی قئید ائدیب.
اونون دئدیکلرینه گؤره، بو اولایلاردان اؤنجه مؤتدیل ایسلام مرکزلی یئنی بیر سیاسی
دوزه‌ن بؤلگه‌ده میدانا گلمیش‌دی و تدریجه‌ن گوجله‌نیردی، آنجاق تورکییه‌ده آکپ
اقتدارینا قارشی باش قال‌دیران کوتلوی اعتراضلار و مصرده موسلمان قارداشلارینین
اقتداردان دئوریلمه‌سی بو پروسئ‌سین قارشی‌سین‌دا جدی مانعه‌لر تؤردیب.
اما خوی‌لو سوسیلوق بؤلگه‌ده مؤتدیل ایسلام مرکزلی سیاسی
جرهیانین ضعیفله‌نمه‌سی اوزون‌دن رادیکال ایسلامین گوجلنجیی احتیمالینی قبول
ائتمیر: «رادیکال ایسلامچیلیغین بؤلگه‌ده گوج‌لو سیاسی بازاسی یوخ‌دور و من مؤتدیل
ایسلام‌دان دا اؤت‌یه دئموکراتیک حرکتلرین گوجلنجیینی دوشونوره‌م.»
جناب تورانین فیکرینجه، ایران ایسلام رئسپوبلیکاسی اؤز سیاسی
نفوذونو آرتیرماق اوچون بؤلگه‌ده‌کی حادثه‌لردن معین درجه‌ده یارارلانا بیل‌سه ده،
خاریجی سیاست‌ده تورکییه و آذربایجان رئسپوبلیکاسی اوزرین‌ده هر هان‌سی بیر
اوستونلوک الده ائده بیلمه‌یه‌جک.
«ایرانین یئنی
پرئزیدئنتی حسن روحانی پرئزیدئنت احمدی‌نژاددان چؤکموش بیر اؤلکه‌نی تهویل آلیب و
گله‌جک دؤرد ایلده بو اؤلکه‌نین قارشی-قارشییا اولدوغو بیر چوخ پروبلئ‌می حل ائتمه‌لی‌دیر.
او، اؤلکه‌نی نووه بحرانین‌دان چیخارتماق، ائل‌جه ده ایرانین اقتصادیاتی و خاریجی
سیاستینین دورومونو نورمال بیر سوییه‌یه گتیرمک اوچون چالیشمالی‌دیر،» دئیه،
آمئریکادا موهاجیرت حیاتی یاشایان گونئی‌لی سوسیولوق سؤیله‌ییب.
علیرضا قولونجو
درود فراودن: متاسفانه بقدری {ترکی" عربی" } سخت است .که هرگز نمی توان حس واقعی را از مطلب گرفت.لطفآ{ ترکی"لاتین} بنویسید.
پاسخحذف