ماحمود فضلی اوچون- عباس نعیمی

ماحمود فضلی-نین ایلک دؤنه آدینی، خویون گولوستان باغیندا بالاقول اوینویان اوشاقلارین آدیندان ائشیتدیم. او زامان یاشیم آزیدی. گولوستان باغیندان بیزیم ائوه، یاخین ایدی. شهرین یاخشی بالا قول اوینایانلاری، نایلون توپو کسیب، ایچ-ایچه سالیب، هاوا قارانلیقلاشانا دک اوینایاردیلار. ماحمود، اوردا بیر توپ اوینایان یوخ، بلکه جسارتلی بیر گنج کیمی تانیتدیریلیردی. ماحمود گنج یاشیندا، جیبهه-ده قورخمازجاسینا ساواشیردی. بیر-ایکی یول یوللاری جیبهه-یه دوشن-لر، ماحمودون فرقلی بیری اولدوغونو وورغولایاردیلار. او زامانین گنج یاشدا اولوب جیبهه-ده ساواشانلاردان بیری، محمد ایدی. یاخشی والیبال اویناردی.

ماحمودون آدینی جسارت سیمگه-سی اولاراق چکردی. ساواش قورتولاندان سونرا، نئچه ایل ماحمودون آدینی ائشیتمه-دیم. ماحمودون آدینی، خویون مرزی(سینیر) بازارچاسی یولا دوشدویو واقتلار ائشیتدیم. بازارچا، خویون ایش-سیز گنجلرینه بیر اومود ایدی. بازارچادا نه قدر اولوب-اولمادیغینی بیلمیرم. آنجاق، او زامان یاخشی آدی چکیلیردی. هر یئره گئدیردی فرقلی ایدی. 76-جی ایلین قیشیندا یولوم تئهرانین عئلم-صنعت یونیورسیته-سینه دوشدوکده، ماحمود ایله اوتوروب دانیشدیق. ماحمود میللی دوشونجه ایله تانیش اولموشدو. اورتاق یولداشلاریمیز، میللی دوشونجه ایله تانیش اولسایدیلار دا، ماراقلی دئییلدیلر. ماحمود، خویون 78-جی پارلمان سئچگی-لرینده اسماعیل باوقارین سیتادیندا خویون باشقا میللی چالیشقانلاری، اؤزل-لیکله رحمتلیک ابراهیم جعفرزاده و باشقا بیر چوخ دیرلی یولداشلار ایله بیرگه بیر میللی ایستک-لرین کامپانیاسین یولا سالدیلار. باوقاری تکجه میللتچی-لر یوخ بلکه ایصلاحچیلارین بیر بؤلومو ده دستکله-ییردیلر. ایصلاحچیلارین بیر بؤلومو، باشقا بیر ایصلاحچی آدایینی(اؤنجه-دن نئچه دووره پارلمانا سئچیلن) دستکله-ییردیلر.

 ماحمود ایله ابراهیم گیلین دستکی ایله، باوقار ایکینجی دووره-یه قالماغی باشارا بیلدی. ایکینجی دووره-یه قالماغینا باخمایاراق، او بیری ایصلاحچی آدایین شیکایتینه دایاناراق، باوقارین بیر چوخ رأیلرینی آرادان گؤتورمک ایسته دیکده، شهرده بیر گئجه-لیک یاییلدی. گئجه-لیگین یاییلماغینا گؤره، ماحمود، ابراهیم ایله بیرگه نئچه نفری یاخالادیلار. ماحمودو یاخالاماغا گئتدیکده، ماحمودون دیرنمه-یینی گؤرنلر، اونون فرقلی اولدوغونو آغیزلاردا گزدیریردیلر. اوندان سونرا، ماحموددان چوخ ائشیتدیک. میللی حرکت یولا دوشدوکده، ماحمودون قورخمازلیغی، آوانگارد اولدوغو، تئز-تئز یاخالانماغینا ندن اولوردو.

ماحمودون قورخمازلیغی، اونا گؤره سؤز-ساووی دا اورتایا گتیرتدیریردی. آنجاق، ماحمود هئچ نه-یه باخمادان ایناندیغی یولدا آددیملامادان چکینمه-دی. ماحمود، درسینی بیتیردیکدن سونرا، یاخشی بیر ایش تکلیفی آلمیشدی. اونون بیر چوخ یولداشلاری ایله بیرلیکده رحمتلیک زئهتابی-نین ایل دؤنومونه گئتدیکده شبیترده توتولماغی، ایش تکلیفینین آرادان گئتمه-یینه ندن اولدو. ماحمود گیل تبریزین زیندانیندا، رحمتلیک امانی ایله تانیش اولوب، او رحمتلیگی بوتون آذربایجانا تانیتدیردیلار. ماحمود، یاشینین چوخلوغونا باخمایاراق، ائولی-لیک قورمامیشدی. بوتون واختی میللی اینانجا گئچیردی. ماحمودون تویو، تام بیر میللی توی ایدی. میللی دوشونجه-یه مالیک اولان هر بیر کسی، تویا چاغیرمیشدی. تویونو قورماق اوچون باسقی آلتیندایدی. تویو، گوجلو قورولدو. سکگیز یوزه یاخین قوناق گلمیشدی تویا. اونودولماز گئجه-لردن بیرینه چئوریلدی توی. او گئجه، شهر ایچینده چوخ اوزون زامان آغیزلاردا دئییلیردی. نوی ائله-دیکدن سونرا، عاییله-نی دولاندیرماق اوچون، بمده ایش توتوب، ایشله-مه-یه گئتدی. بمدن قاییدیب، تبریزده ایش توتاندان سونرا، ایشین اورتاسیندا یاخالانیر. ایش یاریدا قالیب، شریکینین الینه گئچیر هر نه، ائشییه چیخدیقدا یئنی-دن باشلاماق زوروندا اولور. ماحمودون دؤنه-لرله دوستاغا دوشوب-چیخماغی هر طردن باسقی گتیرتدیریر. قاراداغدا زلزله اولدوغوندا، باشقا آذربایجاچی-لار ایله بیرلیکئه گئجه-گوندوزو قاراداغدا گئچیر. قارداغدا ایشلر باشلاندیقدا، یئنه ایش گؤتورور. ایشین اورتاسیندا یئنه یاخالانیر. بو آردا، آتاسی نوخوشلویور. آتاسی-نین نوخوشلوغونو بیلیر، آنجاق نئجه حالدا اولدوغونو بیلمیر. آتاسی-نی گؤرمه-دن آتاسی دونیاسین ده-ییشیر. یولوندا اولان بوتون چتینلیکلر، اونو یولوندان قویمور. ایندی ده، آجلیق آکسیاسینا گئچیب-لر یولداشلاری ایله بیرلیکده. بئله بیر اینسانلاری، تاریخ آز یئتیشدیرر. بیزیم بو اینسانلارلا تانیش اولماق شانسیمیز اولوب. اومودوم وار جانلاری ساغ اولسون، حاقلارینا چاتا بیلسینلر سئویملی یولداشلار.

قایناق: عباس نعیمی فیس بوک صحیفه سی