ایران‌دا مکتبلرین آچیلیشی موناسیبتیله آمئریکانین سسینه
موصاحیبه وئره‌ن میللی فعال و قربی آذربایجان ویلایتی مکتبلرینین سابیق معلمی
جاواد عباسی ایران ایسلام رئسپوبلیکاسینین آذربایجان شهرلرین‌ده‌کی مکتبلرده
یوروتدویو سیاست، ائل‌جه ده آنا دیلین‌ده تحصیل آلماق‌دان محروم ائدیله‌ن تورکلر و
دیگر قئیری-فارس اوشاقلارین ایران تحصیل سیستئ‌می و حیاتلارین‌دا اوزلشدیکلری
پروبلئملری شرح ائدیر.
جاواد عباسینین فیکرینجه آنا دیلین‌ده تحصیل حاقین‌دان مهروم
ائدیله‌ن اوشاقلار مکتبه گیریب باشقا بیر دیل‌ده حاضیرلانمیش درس‌لیکلرله
قارشیلاشدیقلارین‌دا کولتورل شوک کئچیریرلر.
«اوشاقلار ساده‌جه آنا دیلین‌ده تحصیل‌دن محروم ائدیلمیر،
بلکه بوتونلوکله منفی یؤنوم‌لو بیر آسیمیلاسیون معروض قالیرلار. بونلار اوشاقلاردا
ضدیت‌لی شخصیت پروبلئ‌می یارادیر و حتی اونلارین مکتبته‌ن قاچیب، تحصیل‌دن
اوزاقلاشمالارینا سبب اولا بیلیر،» دئیه میللی فعالیتلری اوزون‌دن معلم‌لیک شوغلون‌دان
آتیلمیش گونئی‌لی فعال علاوه ائدیر.
سابیق معلمین دئدیکلرینه گؤره، بوتون درس‌لیکلرین فارس دیلین‌ده
اولماسین‌دان علاوه، ایران تحصیل ناظیرلیینین تعلیم نامه‌لری معلملردن شاگیردلرله
ساده‌جه فارس دیلین‌ده دانیشماقلارینی طلب ائدیر.
ایران ایسلام رئسپوبلیکاسین‌دا قئیری-فارس شاگیردلر اوچون
«ایکیدیل‌لی شاگیردلر» تئرمینی ایشلدیلیر، اونلارین پروبلئملری ایسه تحصیل سیستئ‌می
ایله باغلی تشکیل اولونان سئمینارلاردا «تحصیل‌ده ایکیدیل‌لی‌لیک پروبلئ‌می»
اولاراق تقدیم ائدیلیر.
«اونلار بونو پروبلئم اولاراق گؤرورلر آنجاق بیزیم گؤردویوموز
شکیل‌ده دئییل. اونلارین پروبلئم بیلدیکلری خصوص بودور کی، ندن بو مدت‌ده بو
اوشاقلاری آسیمیلاسیون ائتمیی باجارماییبلار. دؤولت بو پروبلئ‌می حل ائتمک اوچون
اوشاقلاری اساساً آنا دیللرین‌دن اوزاقلاشدیرماغا چالیشیر،» دئیه جاواد عباسی رس‌می
تئهرانین سیاستینه موناسیبت بیلدیریر.
«اؤلکه شاگیردلرینین ۷۰
فایزی ایکیدیل‌لی‌دیر. مکتبه گیریب، بیرینجی صینیفی بیتیردیک‌دن سونلا بئله
اونلارین آنا دیلی فارسجایا چئوریلمیر... بیرینجی صینیف‌ده تحصیل اوغورسوزلوغو
ایله اوزلشه‌ن بیر شاگیرد سونونا قدر ده موفقیتی الده ائده بیلمه‌یه‌جک،» دئیه ۲۰۰۹ و ۲۰۱۳ ایللری آراسین‌دا ایرانین
تحصیل ناظری اولموش همید رضا هاجیبابایینین قئیری-فارس مکتب‌لیلر حاقین‌دا سؤزلری
اؤلکه‌نین رس‌می خبر آگئنت‌لیگی ایسنا-دا نشر ائدیلیب.
میللی فعال آذربایجان تورکلرینین میللی-مده‌نی حاقلاری اوغرون‌دا
فعالیتلری اوزون‌دن معلم‌لیک ایشین‌دن آتیلدیغینی بیلدیریر. او، همچینین تهلوکه‌سیزلیک
مأمورلاری طرفین‌دن دفعه‌لرله نظارت آلتینا آلینیب و موهاکیمه ائدیلدیک‌دن سونرا ۲۰ آیا یاخین حبس‌ده ساخلانیلیب.
«شاگیردلردن ایستییردیم کی بعضی ائو تاپشیریقلارینی تورکجه
یازسینلار. سونرالار همین مسئله محکمه‌ده منه قارشی بیر اتهام اولاراق ایر‌لی
سورول‌دو،» دئیه حاضردا آمئریکانین ویرجینییا ایشتاتین‌دا یاشان گونئی‌لی فعال
سؤیلییر.
جناب عباسینین سؤزلرینه گؤره، «ایرانین آذربایجان شهرلری،
هابئله تورکلر و دیگر قئیری-فارس خالقلارین یاشادیغی باشقا بؤلگه‌لرده مکتبقدر
اوشاقلاری فارس دیلین‌ده تحصیل آلماغا حاضرلاماق اوچون پروقراملار تشکیل ائدیلیر.
قئیری-فارس اوشاقلاری مجبوری اولاراق بو پروقراملارا قاتیلمالی‌دیر.»
«دؤولتلر اؤلکه‌لرین‌ده یاشایان آزلیق جمعیتلرینین اؤز آنا
دیللرینی اؤیره‌نمک یا آنا دیللرین‌ده تحصیل آلمالاری ایستیقامتین‌ده لازی‌می
تدبیرلری آلمالی‌دیر،» دئیه بیرلشمیش میللتلر تشکیلاتی باش مج‌لی‌سینین ۱۸ دئکابر ۱۹۹۲-جی ایلده قبول ائتدیی بیاننامه‌ده
قئید ائدیلیر.
هیچ نظری موجود نیست:
ارسال یک نظر