بو قیسیتلی و محدود ایمکانلاریمیزا باخاراق سیاسی محبوسلاریمیزی داها دوزگون ساوونماق اوچون نهلر ائتمهلی و نهلر اتتمهمهلیییک؟!
سوروملولوقلاریمیزین بیلینجینده اولمالیییق. گونئی آذربایجان میلی حرکتی ایچریسینده یئرلشن شخصلر، قروپلار و پارتیلر اولاراق، سیاسی محبوسلاریمیزی ساوونماق، عاییلهلرینه یاردیم ائتمک سوروملولوغونداییق.
بو سوروملولوغون تامامینی سادهجه بعضی قروپلارین، اؤرنهیین اینسان حاقلارینی ساوونان تشکیلاتلارین، اوزرینه آتماغیمیز منطیقلی و دوغرو دئییلدیر. بو تشکیلاتلارین بوتون بو یوکوملولوکلری اوستلمنهلری منطیقن ایمکانسیزدیر؛
بیلگیلری توپلاماق:
توتوقلانان و حبسده اولان فعاللار حاقیندا دوغرو بیلگیلری، اونلارین عاییله عضولری، یاخین دوستلاری، اونلارلا عئینی شهرده یاشایان یا عئینی قروپدا چالیشان حرکتچیلر توپلایا بیلرلر. اینسان حاقلارینی مودافیعه ائدن شخصلر و قروپلار دا ذاتن گرکن بیلگیلری بو قایناقلاردان آلابیلرلر. ایران کیمی بیر اؤلکهده بو تیپ بیلگیلری یاسال و قانونی یوللاردان ألده ائتمک مومکون دئییلدیر.
آیریجا، سیاسی پارتی آدی آلتیندا فعالیت گؤسترن قروپلارین بو خصوصدا پلان و پروقلاملاری اولمالیدیر. بو پارتیلرین یوکوملولویو، اؤز محبوس و توتوقلو اویهلرینین بیلگیلرینی اینسان حاقلاری تشکیلاتلارینا چاتدیرماق و یا چاتدیریلماسینی ساغلاماقدیر. (سیاسی قروپلارین چوخو بو خصوصدا اینسان حاقلاری تشکیلاتلاری ایله هر هانسی بیر ایش بیرلیکده اولماز، آنجاق عینی تشکیلاتی اونلارین عضوو حاقیندا یئترینجه ایش گؤرولمهدی دئیه سوچلارلار.)
چئشیدلی دیللرده راپورلارین حاضیرلانماسی:
فرقلی اؤلکهلرین دیلینده، اونلارین سیاسی اتموسفئرینه اویغون راپورلار حاضیرلانمالیدیر. بئله بیر راپورلارین اؤزللیکله تورکیه، آمئریکا بیرلشمیش دؤولتلری و آوروپا مئدیاسیندا یاییلمالاری چوخ اؤنملی و واجیبدیر. سیاسی محبوسلار حاقیندا دویغوسال سؤزلر و باشقالارینی بو محبوسلاری مودافیعه ائتمهیه چاغیرما شکلینده یاییلان یازیلار البته گؤزل و حرکتیمیزده دوستلوق و صمیمیتی چوخالتما آچیسیندان تقدیره لاییق حرکتلردیر. آنجاق أن اؤنملیسی آدلاری چکیلن اؤلکهلرین یوکسک سویهلی مئدیاسیندا یایینلاجاق یازیلار و راپورلارین حاضیرلانماسیدیر. اؤزللیکله گوجلو مئدیایا صاحیب اولان قارداش اؤلکه تورکیهده بونو باشارماق مومکوندور.
یئرسیز سوچلامالاردان ساقینماق:
بعضی سیاسی قروپلار و شخصلر محبوسلاری مودافیعه ائتمک یئرینه، باشقا تشکیلاتلار و شخصلری دوزگون چالیشماماقلا سوچلاییب و اونلاری محبوسلاریمیزی داها گئنیش شکیلده مودافیعه ائتمهیه چاغیریرلار؛ باشقالارینین سوروملولوقلارینی اونلارا خاطیرلاتماق کیمی بیر چالیشما طرزی!
بو تیپ یئرسیز سوچلامالاردان ساقینماق لازیمدیر. آذربایجان میلی حرکتی اساساً کونوللو چالیشانلارا باغلی اولان بیر حرکتدیر. بئله بیر حرکتده، باشقالارینا گؤرهو بیچمک و سونرا اونلاری سوچلاماق، اینسانلاری سویودوب و بیزدیرمکله سونوجلانا بیلر. باشقا تشکیلات و قروپلاری محبوسلاریمیزی مودافیعه ائتمهیه چاغیرانلار بعضاً ده او تشکیلاتلارین بو چالیشمالاردا داها تأثیرلی اولدوقلارینا اینانیرلار. بئله بیر مسئله سؤز قونوسو اولدوغو زامان، أن یاخشیسی او تشکیلاتلارا یاردیمجی اولماقدیر. سوچلاماق دئییل، بیلگی توپلاماق، راپور حاضیرلاماق، و کامپانیالارینا قاتیلماق شکلینده اونلارا دستک وئرمک لازیمدیر. اینسان حاقلاری تشکیلاتلارینین راپورلاریندا اکسیک وارسا، اونلارا سالدیرماق دئییل، اکسیکلری تاپیب راپورو تاماملاماق أن دوغروسودور.
منبع : تبریز سسی
هیچ نظری موجود نیست:
ارسال یک نظر