تبريز شهرينده توتولموش آذربايجانلي، 32 ياشلي ايبراهيم ساوالان تخمينن 5 گون اؤنجه ايران کشفيات ناظيرليگينين تبريز بؤلمه‌سيندن عاييله سينه زنگ ووروب و هله‌ليک اورادا ساخلانديغيني خبر وئريب، آما نه واختادک اورادا قالاجاغيني بيلديرمه‌ييب. بو باره‌ده ببج آذربايجانجايا اونون قارداشي اولدوغونو و اردبيل شهرينده ياشاديغيني دئين جلال رشيدي تئلئفونلا خبر وئريب.
او دئييب کي، ايبراهيم بي توتولدوغو ايلک 15 گون عرضينده آجليق آکسيياسي کئچيريب، آنجاق عاييله سينين و دوستلارينين تکيديله آکسيياني دوردوروب.
قارداشينين دئديگينه گؤر، توتولمازدان اؤنجه سون آيلاردا ايبراهيم ساوالان ائولرده ديل، ادبيات و سوسيولوگييا درسلري کئچيردي. "تام مدني حرکتينه گؤره اونو توتوبلار".
ايبراهيم ساوالانا قارشي هله‌ليک ايتتيهام اوخونماييب. "اونون هانسي اساسلا توتولدوغو آيدين دئييل" – جلال رشيدي دئييب.
ايختيصاصجا موهنديس اولان ايبراهيم ساوالان (رشيدي)، آذربايجان ديلي و سوسيولوگييا اوزره معليمدير، شهريار ادبيات درنگينين قوروجولارينداندير.
اونون يازيلاري ايرانين آذربايجان عيالتينده درج اولونان بايرام،لاچين و بير چوخ ديگر درگيلرده چاپ ائديليب.
تزييقلر
ايبراهيم ساوالان ايراندا توتولان آذربايجانليلاردان يالنيز بيريدير، اوندان اول و سونرا ده بير چوخلاري حبسه آلينيب. بو باره‌ده ببج آذربايجانجايا ايراندان 7 آي اؤنجه قاچميش، حاضيردا تورکييه‌ده ياشايان رامين جاببارلي معلومات وئريب.
"من ايراندا يازار-ژورناليست اولاراق چاليشيرديم، ائولرده و درنکلرده ديل درسلري کئچيرديم. ديل درسلرينه داها چوخ اينسانلارين مئيليني گؤرنلر ايرانين آذربايجان تورکلرينه و فارس اولمايان ميلتلره قارشي سيياستي نتيجه‌سينده همين فعالييته قارشي چيخيرديلار. درگيلر ده آذربايجان تورکجه‌سينده چاپ اولوندوغو اوچون هسساسياتي آرتيريردي".
او، ايراندا "ايقرچيليگين حاکيم اولدوغونو" ايديعا ائديب.
آنجاق ايراندا يالنيز آذربايجانليلارين دئييل، عوموميتله اينسان هاقلارينين پوزولماسينا داير بين الخالق تشکيلاتلارين بير چوخ حساباتلاري مؤوجوددور.
ايراندا درج اولونان و نشري دايانديريلان آذربايجانديللي لاچين ادبيات درگيسينين رئداکتورو اولموش رامين جاببارلي ايسه دئيير کي، ميلليتجه فارس اولمايان ميلتلرين اينسان حاقلاري پروبلئملري "ايکي قات آغيردير".
"بلي، ايراندا وطنداش حوقوقلاري پوزولور، آما ميلتلره گلديکد، بونونلا ياناشي اونلارين ميللي حاقلاري دا تاپدالانير. بير فارس اوچون ديل و کولتور ياساقليغي اورتادا يوخدور. اونون ديلي، موسيقيسي اوچون قوروملار وار. باشقا ميلتلرين ايسه مدني باخيمدان اينکيشافي اوچون هئچ بير ايمکانلار يوخدور".
ايران قانون وئريجيليگينده اؤلکه‌ده ياشايان ميلتلرين ديل حوقوقلاري تسبيت اولونور. بعضي اونيوئرسيتئتلرده آذربايجان ديلي فنن اولاراق مؤوجود اولسا دا، رامين جاببارلي دئيير کي، اورتا مکتبلرده بو ديل تدريس اولونمور.
2006-جي ايلده ايران بويونجا آذربايجانليلارين اعتيراضلاري باشلاياندان سونرا آذربايجان ديلينده قزئت و ژورناللار، ائلجه ده درگيلر باغلاندي، آذربايجان ديلي موعليملرينين فعاليتي مهدودلاشديريلدي، بونو رامين جاببارلي دئيير.
اونون سؤزلرينه گؤر، آذربايجان ديللي درنکلرده ايشتيراک ائدنلر و ائولرده ديل و ادبيات درسلري کئچنلره تزييقلر ائديلير و اونلار حبسه آلينير.
او، ايراندا اونا تزييقلر ائديلديگيني و سونرادان حبسه آلينديغيني دئييب. عاقيبتينين ديگرلري کيمي اولماسيني ايستمه‌يهن رامين قونشو اؤلکه‌يه اوز توتوب.
جاببارلي ايراندا آذربايجانليلارين اساسن اؤز آنا ديللرينده درس دئديکلري، آذربايجان مدنيتيله باغلي پروقراملار حاضيرلاديقلاري - "مثلا، آذربايجان ديلينده يازيلميش کيتابلارين موختليف شهرلرده سرگيلرينين کئچيريلمه‌سي" - آذربايجانليلارا قارشي "آيري سئچکيلييه" و "ايقتيصادي باخيمدان آذربايجان بؤلگه‌لرينين گئريده ساخلانيلماسينا" اعتيراض ائتديکلري اوچون حبس اولوندوقلاريني ايديعا ائديب.
سعيد متين پور...
سعيد متين پور ايران آذربايجانليلاري آراسيندا تانينميش ژورناليستدير. 2006-جي ايل عوصيانلاري زاماني زنجاندا چيخيش ائدنلردن و 21 فئورال "آنا ديلي گونو"نون قئيد اولونماسينا چاليشانلاردان بيريدير. "اونون فعاليتيني دوردورماق اوچون ايران حاکيميتي اجنبيلرله علاقهمه‌سه له‌سيني اورتايا چيخاريب" - رامين جاببارلي دئيير.
اونون ايديعاسينا گؤر، ايران حاکيميتينه قارشي دوشونجه‌لري اولانلارين "خاريجيلرله علاقه سي" ايتتيهاملاري هر زامان ايره‌لي سورولور. "سعيد بيين تورکييه‌يه گئديب-قاييتماسيني اجنبيلرله علاقه کيمي گؤردولر".
سعيد متين پور 2008-جي ايلده حبس اولوناراق ائوين حبخساناسينا کؤچورولوب و همين ايل اونا 8 ايلليک حبس جزاسي کسيليب.
سعيد متين پورون ايشي بين الخالق ديقته سبب اولوب. بو ايل فئورالين اولينده کانادا سئنات پالاتاسيندا سئناتور دئننيس گلئنن اونو مودافيع ائدن بيانات اوخويوب. او، متينپورون "يئگانه جينايتينين" ايفاده آزادليغينين و ميللي آزليقلارين حوقوقلارينين دينج يوللا مودافيعه سينه قالخماسي اولدوغونو دئييب.
"او، ايرانين تورک اوشاقلارينين مکتبلرده اؤز آنا ديلينده اوخوماسيني ايسته‌ديگي، اونلارين اؤز ديلينده يازماق و دانيشماق ايمکانين اولماسيني طلب ائتديگي اوچون ايرانين اينقيلاب محکمه‌سيني قيجيقلانديريب" – سئناتور دئييب.
دئننيس قلئنن متين پورون حبسخانا حاکيميتي طرفيندن ايشگنجه‌يه معروض قالدغيني و اورک ايفليجي کئچيرديگيني، آغجيير اينفئکسيياسينا توتولدوغونو قئيد ائديب و اونون درحال آزاد اولوماسيني طلب ائديب.
...و ديگرلري
ايران آذربايجانليلارينين يايديغي معلوماتلارا گؤر، 2012-جي ايلين يانوار آييندا ديگر آذربايجانلي فعاللار - افشين شهبازي، روزبئه سادتي، محمد احدي ده توتولوب.
افشين شاهبازي تبريز اونيوئرسيتئتينين طلبه‌سيدير. او، تورک ديلي موعليمي کيمي طلبه‌لر طرفيندن ياراديلميش کورسلاردا درس دئييب. يانوارين 23-ده تبريزده توتولوب.
تبريز اونيوئرسيتئتينين داها بير طلبه‌سي، تورک ديلي تدريسچيسي روزبئه سادتي يانوارين 24-ده مييانا شهرينده توتولوب.
تبريز اونيوئرسيتئتينين مأذونو، آذربايجانلي فعال کيمي تقديم اولونان محمد احدي ده يانوارين 24-ده مييانادا توتولوب.
آذربايجان تانيتيم اوجاغينين کئچميش کاتيبي مئهرداد کره‌مي 2011-جي ايل دئکابرين 24-ده تبريز شهرينده توتولوب.
بير نئچه فعالين ايسه حاضيردا آختاريشدا اولدوغو و گيزلنديگي بيلديريلير.
حاضیرلایان: اؤیرنجی کؤچورو قروپو
هیچ نظری موجود نیست:
ارسال یک نظر