گئتمک لر سن قوخور
شهرین یالانجی اوغولتولاریندا
زامانسیز دوشله مه له رین آردیندان
وار اولموشوق، یوخلوقلاریمیزدا
کیم بیلیر هانسی یالانا آداخلییق
کبم بیلیر هانسی ساخته خیالدا اوچماغا حاضیرلانیریق
شهر بیزی اوتقونور
سوچلاریمیزی، میدانلاریندا
اوسلوجا ازیب کئچر قارانلیق خیاوانلاریندا
اوزان بویونجا یانیمدا
بیر ایستیین قالینتیسیندا یاشاد منی
سئوگیمه گئجیکمیش باخیشیندا
توم یاساقلی حوجره له ریمده
یاساقلارا بوغولموش دوشله ریمده
وار اول یئشره ن کؤکله ریمده
بیر اووج توپراق کیمی
ایستی و گیزلی
اوتانماق فعلینده ن سیل دوشله ریمی
توت الیمده ن
سیخی توت کی دوشمه یه لیم بو بیلینمه زه کؤپروله رده (ا.ا)
گئدیش بلکه ده ائله یاشاماقدیر ... سن یاشامدان قاچماق اوچون گئدیشه ساریلدین... یاشام اولماماق اوچون یاشامسیزلاماق... بیر بوتوندور کائنات... وارلیغین و یوخلوغون اینجه تئلیدیر بلکه ده... عصیان ائتمک کیمیدیر گئدیشلر... ایده اللرین بوغولدوغو بیر اؤلکه ده... یاشایان نه اینسانلاردیر... نه کؤلگه لر... آنلاملار بئله یاشامیر آرتیق... یاشایان تکجه آنلامسیز سؤزجوکلر و باخیشلادیر... اومودم بیتیشی دئییل البت گئدیشلر... اومودا آنلام وئرمک اوچوندور بلکه آددیم آتماق... جسارت ایله یاشاق.. جسارت ایله دانیشماق.. جسارت ایله گئدیش... ساخلادیغین دونیالار... بیر یالان اولماقدان قورخماق... یالان اولماماق اوچون گئدیش یولونو سئچمک... بلکه یاشاماق نئجه که بیر مجبوریتدیر... ائله کئدیش ده بعضا سنین تک بیر یولوندور... هارداسان بیلمیرم... نئجه دیر اورالار بیلمیرم... وار اولوب اولمادیغین بئله بیلمیرم... سن یئنه یورغون روحونلا عاییدیت آرقاسیجا اولاجاقسان بلکه ده...
هئچ سؤیله مه دییم بیر یالان وار ایچیمده
فیرتانالی بیر گئجه آردیندان
ایچیمده دوغوب، ایچیمده سوسموش
سن او سیرالاردا یوخلوقلاریمدا
فیلیزله نیردی آدین دوش آغاجیمدا
دانس ائده ره ک گیرمیشدیم او هاوالارا
ساخته لیییمی آینالارین آغلار اوزونده بوراخمیشدیم
آی ایشیغی اوخشامیشدی دوداغیمدان
سرخوشلوقومودون او گئجه
بولودلارین یوخ اولدوقو اؤلکه ده
موزیک نوتالارینا حسرت بیر کوچه ده
شهرین قارانلیق اللرینده
دوشونله ساریلمیشدیم گئجه یه
گولومسه میشدین سون آندا
سونرا
اوزاقلاشان بیر کولگه
کوچه نین معصوم ساعاتلاریندا
اولدوزلار
دالمیشدیلار او بالاجا اللریمیزده غایب اولان سیجاقلیقا
کوچه
آلیب بؤیوده جه ییدی منی
قارانلیغینا آلیشدیراجاقدی شهرین
او دارماداغین سؤوود داللاریندا
گئده رکن وار اولموشدون
ساخته دئییلدی اللریمین تیتره ییشی
آما او یالان دوغماقدایدی ایچیمده
بیر اوتوپییا !!!
الچاتماز بیر دونیا
آغلامیشدیم
گئجه گؤزله ریمده اریمیشدی
آچیق بیر دنیز هوسینده
اومود ائتمیشدیم
آرتیق او قوجامان یالانین فرقینده یدیم
یوخوموش ائله بیر اوتوپییا
.
.
.
گئتمه ک ایسته ییره م
بیر بیلسه ن نئجه
نئجه اوزاقلاشماق ایسته ییره م
بیر هیچقیریقدیر یاشام
آجیلاریم ایسه بیر وارلیقدیر
آدین یوخلوغوندا بیر وارلیغیم اولدوقو کیمی
گلمه یه جه کسه ن
فیرتانالار قوپمایاجاق آرتیق
قالدیریملاردا بیر من وارام
بو پاس توتموش شهرین
بیرده آیا کؤچمه ک ایسته یه ن اینسانلارین ایزی
من هیچ بیر بؤلگه یه عایید اولمایان
یورغون بیر روحام
و سن ...
یالانیما بولاشما هئچ (ا.ا)
بئله دیر دوستوم بیزیم وارلیق حیکایه میز... هئچ بیر زامان گؤرمه دیگین و هئچ بیر زامان گؤره بیلمه یه جگین بیر دوستون گئدیشی ده جان آجیتابیلر...
هیچ نظری موجود نیست:
ارسال یک نظر