ساوالان پورت :
توركجه‌ده يئته‌رليك
(ايقتيداري) فئعلين- اوچونجو شخص تكيل اولومسوز- نئچه بيچيمي واردير:
آلاماز (توركييه)؛ آلامماز، آلانماز، آلا بيلمه‌ز، آلابيلمه‌ز
(آزه‌ربايجان، ايران)
بونلارين كؤكه‌ني نه‌دير و هانكيسي دوغرودور؟ بو سورونو نئچه آشامادا يانيتلاماق گره‌كير:
١-اوماق فئعلي
اسكي توركجه‌ده اوماق
بيچيمينده و آنلامي ياپابيلمه‌ك، ائده‌بيلمه‌ك، موقته‌دير اولماق (فارسجاسي
توانستن) اولان بير فئعل وار ايدي. اوماق فئعلي اسكي توركجه متينله‌رده
چوخ ساييدا بيله‌شيكده ايشله‌ديلميشدير. اؤرنه‌يين: او.ديلار، او.يورلار،
او.قاي، او.قايلار، او.داچي، او.ماز، او.مازلار، او.سارلار، او.قوچا
ارسه‌ر، .... آلتاييستيك دوئرفئر`ه گؤره توركجه "او" (ماهير آنلاميندا)
كلمه‌سي، اسكي اوماق فئعلينده‌ن تؤره‌ميش (ياشا.ماق تؤره‌وي اولان ياشا.ر
كيمي)، داها سونرا ر حرفي ز`يه دؤنوشموشدور. او.ر-او.ز
-اوماق فئعلينين اولومسوز كيپي اوماماق، و آنلامي ياپابيلمه‌مه‌ك، ائده‌بيلمه‌مه‌ك، موقته‌دير اولماقدير.
-اوماق فئعلي گونوموزده بير سيرا آنادولو آغيزلاري ديشيندا اونودولموشدور.
-اوماق فئعلينين گئنيش زامان چكيمي: او.ر.ام، او.ر.سون، او.ر، او.ر.وق، او.ر.سونوز، او.ر.لار
-اوماماق فئلينين ز`لي گئنيش زامان چكيمي: اومازام، اومازسين، اوماز، اومازيق، اومازسينيز، اومازلار.
٢-ايكي فئعلين بيرله‌شمه‌سينده‌ن اولوشان بيرله‌شيك فئعلله‌ر:
توركجه‌ده ايكي فئعلين
بيرله‌شمه‌سينده ن اولوشان بيرله‌شيك فئعلله‌ر واردير. اؤرنه‌يين: آلي
قويماق، سالي وئرمه‌ك، اولو وئرمه‌ك كيمي. بورادا ايكينجي گله‌ن فئعل تمه‌ل
(وئرمه‌ك، قويماق، دورماق، يازماق، گلمه‌ك، گؤرمه‌ك، قالماق، ...) و ايلك
گله‌ن فئعل كؤمه‌كچي دوروموندادير. بو قورولوشداكي بيرله‌شيك فئعلله‌رده
ايكينجي گله‌ن تمه‌ل فئعل اؤز آنلاميني قوروركه‌ن، ايلك گله‌ن كؤمه‌كچي
فئعلله‌ر تمه‌ل فئعلين آنلامينا يئته‌رليك، تئزليك، سوره‌كليليك، ياخلاشما
كيمي تصوري ائديجي يئني بير آنلام اؤزه‌للييي قاتار.
-بو قاليبين ايلكين بيچيمي فئعل+ي فئعل ايدي: آل.ي وئرمه‌ك. ايلك فئعلين سونوندا –ي سون اكي گلير و ايكي فئعل آرالي ايدي.
-زامانلا ايكي فئعل بير بيرينه بيتيشيك اولموشدور: آلي‌وئرمه‌ك
-زمان
آخيشيندا اورتايا چيخان ايكينجي ده‌ييشيكليك، كؤمه‌كچي فئعلين سونونداكي
–ي (-ێ، -و، -ۆ، -و) سون اكينين بير چوخ دورومدا –ه (-ا) سون اكينه
دؤنوشمه‌سي اولموشدور:
گئدي دورماق- گئدي‌دورماق، گئده‌دورماق
دوشو يازماق- دوشويازماق-دوشه‌يازماق
باخي قالماق- باخي‌قالماق-باخاقالماق
يالواري گؤرمه‌ك- يالواري‌گؤرمه‌ك- يالواراگؤرمه‌ك
سؤيله‌ني گلمه‌ك- سؤيله‌ني‌گلمه‌ك-سؤيلهنهگلمه
٣-بيلمه‌ك فئعلي ايله اولوشان بيرله‌شيك فئعل- يئته‌رليك قاليبي:
ايكي فئعللي بيرله‌شيك
فئعل قاليبيني اولوشدوران فئعلله‌رين بيري ده بيلمه‌ك اولموشدور. بورادا
بيلمه‌ك فئعلي يئته‌رليك آنلامي قازانميشدير. بيلمه‌ك`له ياپيلان بيرله‌شيك
فئعل آشاغيداكي سوره‌جي ياشاميشدير:
آلي بيلمه‌ك- آلي‌بيلمه‌ك- آلابيلمه‌ك
گؤرو بيلمه‌ك- گؤروبيلمه‌ك-گؤره‌بيلمه‌ك
بو قاليبدا
بيلمه‌ك`ده‌ن اؤنجه گله‌ن –ه، -ا حرفي اصلينده اسكي و ايلكين –ي سون
اكيدير. –ي سون اكينين –ه سون اكينه دؤنوشمه‌سي كؤمه‌كچي فئعل سون اكينين
(-ي) اصيل آنلامي داشييان ايكينجي تمه‌ل فئعلين –مه‌ك سون اكينه اويماسي
نده‌ن اولموشدور (گئرييه اريمه)
-اورتايا چيخان آلابيلمه‌ك بيرله‌شيك فئعلينين اولوموسوز بيچيمي –ما سون اكي ايله ياپيلير: آلابيلمه‌مه‌ك، گؤره‌بيلمه‌مه‌ك.
-گونوموزده بيلمه‌ك`لي بيرله‌شيك فئعلي توركجه‌نين عيراق، آزه‌ربايجان و ايراندا اولان لهجه‌له‌رينده اولدوقجا يايقيندير.
-تاريخ
سوره‌جينده گليشه‌ن بيلمه‌ك`لي بيرله‌شيك فئعلي، تك بير كلمه اولاراق
ائوريلميشدير. دولاييسي ايله بو قاليبي آزه‌ربايجان رئسپوبليكاسيندا
اولدوغو كيمي ايكييه بؤلوپ ايكي آيري تيكه و "گله بيلمه‌ك" اولاراق يازماق
يانليشدير. دوغرو اولان بيتيشيك "گله‌بيلمه‌ك" بيچيميدير.
-بورادا
ايكي فئعل و آرالارينداكي اكين بيرله‌شمه‌سي سؤزقونوسودور و بير سيرا
شخصله‌رين ايدديعا ائتديكله‌ري كيمي –ه‌بيلمه‌ك دييه بير فئعل اولايي
يوخدور.
٤-اوماق فئعلي ايله اولوشان بيرله‌شيك فئعل-يئته‌رليك قاليبي:
اسكي توركجه‌ده اوماق فئعلي ده ايكي فئعلده‌ن اولوشان بيرله‌شيك فئعل ياپيميندا ايشله‌ديلميشدير.
اسكي توركجه‌ده
اوماق`لي قاليبي دا بيلمه‌ك`لي قاليبي كيمي هر زامان، -ي سون اكي ايله
ايشله‌ديلميشدير: آرتيقالي او.يورلار، كؤرگه‌لي او.ديلار، ساناقالي او.قاي،
تيرگه‌لي او.قايلار، اونتورگه‌لي او.داچي، بوتورگه‌لي او.داچي، تورو
او.ماز، توقورقالي او.ماز، توققالي او.ماز، ...
بورادا دا گينه عئيني
سوره‌ج ياشانميشدير: آلي اوماق- آلي‌اوماق-آلااوماق-آلاماق. آلي‌اوماق
بيچيمينين آلاماق بيچيمه دؤنوشمه‌سي، اوماق فئعلينده –او سسينين اؤندان
اؤنجه گله‌ن –ا اونلوسونون باسقين چيخماسي و اونلو اويومو دولاييسييلادير.
اورتايا چيخان آلاماماق بيرله‌شيك فئعلينين اولومسوز بيچيمي –ما سون اكي ايله ياپيلير: آلاماماق، گؤره‌مه‌مه‌ك، ...
اسكي توركجه‌ده بو بيرله‌شيك فئعلين هم اولوملو و هم اولومسوز بيچيمله‌ري (آلااوماق، آلااوماماق) قوللانيليردي.
بو بيرله‌شيك فئعلين
اولوملو حالي (آلاماق) گونوموزده قوللانماز و اونون يئرينه توركييه‌ده
"ياپابيلمه‌ك" بيرله‌شيك فئعلي ايشله‌ديلير. آنجاق بو قاليبين اولومسوز
بيچيمينين چكيمي (آلامام، آلامادي، ...) گونوموزده –بلكه ده سؤيله‌نيش
قولايليغيندان دولايي- عئينه‌ن ايستانبول توركجه‌سينده قورونموشدور.
بو قاليبين اولومسوز
چكيمي (آلاماماق، گؤره‌مه‌مه‌ك، ..) دوغو-گونئي آنادولو ايله آزه‌ربايجان و
ايران توركجه‌سينده آشاغيداكي اك ده‌ييشيمله‌ره اوغراميشدير:
آلاماماق-آلامماماق-آلانماماق
گؤره‌مه‌مه‌ك-گؤره‌ممه‌مه‌ك- گؤره‌نمه‌مه‌ك
سونوج و اؤنه‌ري:
اسكي توركجه‌ده
يئته‌رليك اوچ فئعلله گؤسته‌ريليردي: ١-اوماق فئعلي، ٢-اوماق`لي ايكي
فئعلده‌ن اولوشان بيرله‌شيك فئعل، ٣-بيلمه‌ك`لي ايكي فئعلده‌ن اولوشان
بيرله‌شيك فئعل
١-گونوموزده اوماق فئعلي، هم اولومسوز و هم اولوملو بيچيمله‌ري اونودولموشدور.
٢-بيلمه‌ك`لي بيرله‌شيك
فئعلي، اوفاق ده‌ييشيكليكله‌ره اوغراياراق (آلي بيلمه‌ك- آلابيلمه‌ك)،
اؤزه‌لليكله ايران و آزه‌ربايجان لهجه‌له‌رينده، اولومسوز و اولوملو
بيچيمله‌رين هر ايكيسي ده ايشله‌كدير: آلابيله‌ره‌م، گله‌بيلمه‌ديم، ....
٣-اوماق`لي بيرله‌شيك
فئعلينين اولوملو بيچيمي اونودولموش، اولومسوز بيچيمي ايسه (يئته‌رسيزليك)
اؤنه‌ملي ده‌ييشيكليكله‌ره اوغراياراق ايستانبول توركجه‌سينده قورونموشدور:
آلي اومادي- آلامادي. بو بيچيم ايران و آزه‌ربايجان توركجه‌سينده سس
ايكيله‌مه‌سي و اوره‌مه‌سينه اوغراميشدير: آلاممادي، آلانمادي، ..
بو باغلامدا:
١-اوماق فئعلييني ديرچه‌لتمه‌كده يارار واردير. بو فئعلين يئري گونوموز توركجه‌سينده بوش گؤرونور.
٢-بيلمه‌ك`لي يئته‌رليك قاليبي بيتيشيك يازيلماليدير. آلابيلمه‌ك و گؤره‌بيلمه‌ك دوغرودور، آلا بيلمه‌ك و گؤره بيلمه‌ك يانليشدير.
٣-يازيلي
ديلده آلامماز و آلانماز كيمي بيچيمله‌ر قوللانيلماماليدير، چونكو –مماز و
–نماز كيمي سون اكله‌رين وارليغي ايماژيني يارادير. اويسا توركجه‌ده بئله
سون اكله‌ر يوخدور. بيزجه يازيلي ديليميزده آلاماماق (آلامادي، آلاماز،
...) بيچيمي، توركييه‌ده اولدوغو كيمي منيمسه‌نمه‌ليدير.
هیچ نظری موجود نیست:
ارسال یک نظر