ساوالان پورت : آذربایجان اؤیرنجی حرکتی یارانماغا باشلادیغی آندان گونوموزه قدر گئنیشلنمک و درینلشمک‌له یاناشی، آذربایجان توپلومو و میللی حرکت اورتامیندا گوجلو کؤک‌لره صاحیب‌لنمیش‌دیر. بیر زامانلار سایا گلر محدود اؤیرنجی‌لرین درگی یایینلاما، قورولتای کئچیرمه و تؤرنلر دوزنله‌مه یولو ایله باشلاتدیقلاری حرکت بوگون میللتیمیزین موختلیف کسیملرینه اؤز ائتکیسی‌نی بوراخماقدادیر.
بو گوجلنمک‌له یاناشی زامان-زامان حاکیمیت اؤیرنجی توپلومونون چالیشمالارینا انگل تؤرتمک اوچون گئنیش باسقی‌لار اویقولامیشدیر. رسمی فضالاردا چالیشما فورصتینی ایتیرن آذربایجان اؤیرنجی حرکتی، غئیر-ی رسمی فضالارا اویغون اولان مودئرن ایجتیماعی چالیشمالارا اؤنجه‌لیک وئرمک‌له اؤز یؤنتملرینده بیر سیرا دییشیک‌لیک‌لر وئرمیشدیر. باسقیلارا رغمن میللی دوشونجه‌نین کوتله‌لر ایچینده یایغینلاشماسی، حرکتین فیکری آلت‌یاپی‌لاری‌نین گوجلنمه‌سی و اؤیرنجی‌لرین سای باخیمیندان آرتماسی سونوجوندا اؤیرنجی حرکتی قاباقکی کیمی میللی حرکت و آذربایجان توپلومو ایله بللی بیر سینیرلارلا دایانمیش دئییل، بلکه ایچ-ایچه بیر حالا گلمیشدیر. میللی حرکتین ماهیتی و کئچیرتدیگیمیز دورومون تحمیل ائتدیگی بو گلیشمه‌لر یاراتدیغی دینامیک دوروما اولوملو بیر فورصت گؤزو ایله باخماغین یارارلی اولاجاغینا اینانیریق.
اوستونده تاکید ائتدیگیمیز گئرچکلر آذربایجان اؤیرنجی حرکتینی قاباقکی سنتی ذهنیت‌له دئییل، بلکه مودئرن یوللارلا آنالیز ائتمه‌نین گرکلیگینی گؤسترمکده‌دیر .
حساس گونلرده اؤیرنجی حرکتینین گؤرَوی
چئشیتلی ندنلردن دولایی بوگونه قدَر سیاسی گوج قازانما سوره‌جینده یئترلی قدَر باشاریلی اولا بیلمه‌دیگیمیز اوچون، میللی گوجون و ایجتیماعی پتانسیلین میللی منفعت‌لر دوغرولتوسوندا یؤنَدیلمه‌سینه بؤیوک احتییاجیمیز وار. سون ایللرده دونیادا و بؤلگه‌ده یارانان داواملی حساس و کریتیک دوروم ایسه بو احتییاجین یوکونه آرتیرماقدادیر. میللت‌لرین ایسته‌دیگی دئموکراسی‌نین یارانمایاجاغینا قدَر سوره‌جه‌یینی تخمین ائتدیگیمیز بو حساس دورومدا، سؤزو گئدن احتییاجیمیزین یئرینه یئتیریلمه‌سینده اؤیرنجی حرکتی ان آغیر گؤرَوی داشیماقدادیر.
بوگون آذربایجانا باخدیغیمیزدا ایسه میللی مسئله‌دن هئچ آییرا بیلمه‌دیگیمیز و گونوموزون ان اؤنملی سورونلاریندان بیری حالینا گلمیش اورمو گؤلو فاجیعه‌سینی گؤرمک‌ده‌ییک. حاکیمیت تاریخی شهریور اعتیراضلارینین آردیندان وئردیگی سؤزلرین، پلانلادیغی پروژه‌لرین هئچ بیرینی یئرینه یئتیرمه‌میشدیر. بونون اوچون اورمو گؤلونون گله‌جک کریتیک گونلرینی نظره آلاراق، خالقیمیزی بو حاقدا بیلگی‌لندیرمک و اولاسی بیر گئنل اعتیراضلار اوچون حاضیرلیق ایشلری آپارماق، بوتون میللی حرکت‌له برابر اؤیرنجی حرکتینین ده ایلک اؤنجه‌لیک‌لرده یئر آلمالی‌دیر.
سون اولاراق اوردیبهشت (قیزاران) آیی‌نین 19-و، "آذربایجان اؤیرنجی" گونونو تبریک ائتمک‌له برابر بوتون توتوقلو آذربایجانلی اؤیرنجی‌لرین و میللی چالیشقانلارین تئزلیک‌له آزادلیغا قوووشمالارینی آرزو ائدیریک.
امیرکبیر، تئهران، شریف، خواجه نصیر و علم و صنعت بیلیم‌یوردلاری‌نین تورک اؤیرنجی‌لری
هیچ نظری موجود نیست:
ارسال یک نظر