اینسانلار دا بینالار کیمی‌دیر...
اونلارین دا تالئیی، کئچمیشی، بو گونو، صاباحی وار. بلکه اونلاردان دا هان‌سی‌سا
بیر گون اولمایاجاق، لاپ اینسانلار کیمی. بیر تاریخی پایتاخت شهری واردی. بو
شهر مئمارلیق عابده‌لری، قدی‌می بینالاری ایله فخر ائدیرمیش کیمی قورورلو
گؤرونوردو. بونا حاقی دا واردی، چونکی همین قدی‌می‌لیگی، تاریخی‌لیگی، معمارلیق
قورولوشو اونو باشقا پایتاخت شهرلردن فرقله‌ن‌دیریردی. باشقا پایتاخت شهرلردن بورا
گلن قوناقلار شهره هئیران قالیردیلار، گئدیب بیر ده گلیردیلر، پایتاخت شهر اؤز
گؤزل‌لیگی، فرق‌لی‌لیگی ایله اونلاری جلب ائدیردی.
زامان کئچ‌دی، بو شهرده دییشیک‌لیکلر
باشلادی. شهرین رهبرلیگی، اهالی‌سی، سوسیال-اقتصادی دورومو دییش‌دی. شهر ده اینسان
کیمی پوللان‌دی، اما بو پول اونون خئیرینه ایشله‌مه‌دی، شهر ساده، گؤزل، ایستی
کاراکتئرینی دییش‌دی. کؤهنه بینالاری گؤی‌ده‌له‌نلر اوز ائتمه‌یه باشلادی. او
بینالار بیر-بیر اوچورول‌دو، یئرین‌ده اوجال‌دیلان اوتئللر، رئستورانلار گئجه‌لر
برق وورماق‌دا گؤی‌ده‌کی اولدوزلارلا بحثه گیردی.
بیر گون گؤردوک کی، شهرین کئچمیشین‌دن
یالنیز بیر-ایکی خاطره-قدیم بینا قالیب. اونلار دا گؤی‌ده‌له‌نلرین کؤلگه‌سین‌ده
چوخ میسکین گؤرونور. ائله بیل او گؤی‌ده‌له‌نلر یوخاری‌دان آشاغی بو قوجامان
بینالارا باخیب ایستئهزا ائدیردی اونلارا: «بونا باخ، بو دا آدینی بینا قویوب، بیر
تپییمه بنددیر کی، اوچولوب یئرله یئک‌سان اولسون». تاریخی مئمارلیق عابده‌سی کیمی
بیر واختلار قارشی‌سین‌دا نؤوبه یارانان بینا ایسه هر گون بو وضعیتین‌دن ائله بیل
بیر آز دا سیخیلیر، بوزوشور، آلچالیردی.
بیر گئجه یئر-گؤی لرزه‌یه گل‌دی. شهر
اسیم-اسیم اسدی، آز قالا دنیزه قرق اولاجاق‌دی. گئجه‌نین قاران‌لیغی و یئرین او
یان-بو یانا اویناماسی شهری واهیمه‌یه گتیردی. نلر اولدو، بیر گئجه بیل‌دی، بیر ده
الله.
سحر گونش شؤله‌لرینی شهرین اوستونه
سالان‌دا او شؤله‌لر آلتین‌دا یالنیز توز دومانی گؤرون‌دو، شهر یئرله یئک‌سان
اولموش‌دو. دونه‌ن گؤزل‌لیگی ایله اؤیونه‌ن بینالارین یئرین‌ده هره‌سینین اؤزو بوی‌دا
تپجیک قالمیش‌دی.
او تپجیکلر آراسین‌دا مغرورو-مغرور
کؤهنه شهردن و ایندی هم ده تزه شهردن یادیگار قالان ایکی بینا گؤرونوردو. بیر آز
کدرلی، هم ده سئوینج‌لی، قوجامان، مغرور و قورورلو مئمارلیق اوسلوبون‌دا تیکیلمیش
قوجامان ایکی بینا...
اینسانلار دا
بینالار کیمی‌دیر... اونلارین دا تالئیی، کئچمیشی، بو گونو، صاباحی وار. بلکه ده
اونلاردان هان‌سی‌سا بیر گون اولمایاجاق، لاپ اینسانلار کیمی.
KULIS
هیچ نظری موجود نیست:
ارسال یک نظر