گونئی آزربایجانین سویوق ماحالی ساراب شهرینین ادسیز
زیندانیندا بیر گنج یاتیر. ییرمی دؤرد یاشلاریندا ادعاسیز بیر گنج، ایده اللری
اوغروندا سسیزجه تنهالیق زیندان گونلرین کئچیریر. آدی حامد ملک ابادی دیر. آدی
یاشیندان بؤیوکدور. اوغروندا مجادله وئردیگی توتساق یولداشلاریندان اوزاقدیر.
تبریزین قالابالیق گونئی آزربایجان محبوسلاریندان اوزداقدا یاتیر. ائوین و یا رجای
شهر زیندانیندان دا اوزاقدیر اونون دؤرد دوواری. بلکه ده تبریز زینداین اؤزله ییر.
عزیز پورولی دن مجادله تجربه سی آلسین، مهدی حمیدی شفیق ایله تئوریک بحثلر ائله
سین، سعید متین پوردان مقاومتی اؤیکوسو دینله سین، یئنی گاموح لاردان عصیانی
ائشیتسین ایسته ییر بلکه ده.
گونش 92 ایلینین
یای مئوسیمی اوندا دؤرد دووار اولاجاق عؤمور بویو. اوشاقلارینا با یایی کؤلگه لر و
اومودلار اولاراق آنلاداجاقدیر.
دئدیلر اومود دولتی ایش باشینا گلیر، ائله اومود دولتی
گلیرکن گونئی آزربایجان ین گنج اومودلاریندان بیریسینی محکوم ائتدیلر 6 آی
زیندانا. سوچو ایسه یاشیندان بؤیوکدور. مینلرجه ایللیک دئدیکلری دولت و مدنیته
تهلیکه لیمیش حامد. 24 ایل 2500 ایللیک تاریخه باسقی گلدی. 2500 ایللیک تاریخی 24
ایللیکدن قورخدو. اونو محکوم اتئدی یاشادیغی عؤمرون قیرخ سککیزده بیریسین ایچریده
کئچیرسین.
ساراب زیندانیندا بیر حامد یاتیر. گؤزلرینده ساراب سویوغو
دئییل، حیات سیجاقلیغی واردیر اویسا. اونون ایچینده دوغماقدا اولان گونش قارانلیق
اوتاغینی آیدینلادیر. گلجه یی دوشونور. اسیر بیر ملته، گنج یاشینا باخمایاراق چیخیش
یوللاری اختاریر. تاریخی دینله ییر. اینسانلارین حیاتینا باخیر، اوتاغینین پنجره
سیندن. زیندانداکیلره حیات درسی وئریر و دوشونور ندن بو اینسانلار بورادا دییه...
بعضن دئییل، بیر چوخ زامان قیسقانیرام حامدی. من زیندان
گؤرمه دیم، هئچ تک بئله قالمادیم. بوتون یایلارین گونشینی گؤردوم. اما ایچیم هر
زامان قارانلیق اولدو. اویسا حامد گنج یاشیندا تانیش اولدو مجادله سورجینده کی
دوراقلارین ان اؤنملیسینده.
ساراب زیندانیندا بیر گنج یاتیر... یاخیشیقلی بیر دلی
قانلی... آدی حامد... سوی آدی ملک آبادی...
هیچ نظری موجود نیست:
ارسال یک نظر