اؤیرنجی سسی نین سیاسی باخیشی؛میللی حرکت، میللی دگرلر، میللی اخلاق

اؤتن ۳۰ ایل ایچینده ایران ایسلام رئژیمینین آشیری (افراطی) باسقیچی و تک اَلچی (انحصارچی) داورانیشی سیاسی، اکونومیک و کولتورل سونوجلارینین یانیسیرا جیددی توپلومسال (اجتماعی) نتیجه لر ده یارادیبدیر. مع الاسف ایراندا یاشایان بوتون خالقلار آشیری باسقیلار و یاساقلار رژیمینین بیر نتیجه سی اولاراق گونوموزده بیر اینانج و معنویات بؤحرانی ایله قارشی قارشیادیرلار. دئمک اولار کی ایران دا دگرلر (ارزش لر) سیستمی بؤیوک اؤلچوده آلت اوست اولوبدور.

هئچ گیزلی دئگیل کی هانسی یؤنده اینسانلارین اوستونه باسقی قورولارسا بیر سوره (مدت) سونرا انسانلار او یؤنون ترسینه تپکی (عکس العمل) وئرَرلر و او یؤنو سورغولاماغا باشلارلار. ایران دا اؤتن اوتوز ایل ایچینده دین و معنویات آدینا قورخونج بیر باسقی قورولدوغو اوچون اینسانلار دین باشدا اولماق اوزره بوتون معنوی دگرلری سورغولاماغا باشلاییبلار. البته هانسیسا بیر شئیی سورغولاماق اؤز باشینا پیس بیر شئی دئگیل یالنیز اوزوجو طرفی بوراسی دیر کی ایراندا معنویاتی سورغولاماق سورجی بیر چوخ اینسانی بو معنوی دگرلردن اوزاخلاشماغا گتیریب چیخاردیبدیر. بو بیر گئرچکدیر کی ایران توپلوملاریندا آرتیق بیر چوخ حاللاردا دوزلوک، دوستلوق، فداکارلیق، یاردیملاشما، ایش بیرلیگی کیمی دگرلرین یئرینی پول، جینسللیک، شخصی باشاری و شخصی ائگولار کیمی شئیلر آلیبدیر.

البته کی بو دورومو مئیدانا گتیردیگیندن دولایی رژیمی گوناهلاندیرماق لازیم دیر اما گئرچکدن تک سوروملو رژیم می؟ بس بو فلاکتی یارادان رژیمی کیم اورتایا چیخاردیب؟ طبیعی کی توپلوم! او زامان دئمک کی توپلومون اؤزو ده سوچسوز دئگیل و تنقید اولونمالیدیر.

بیر توپلوم ایستر اؤزو اؤزونو ایداره ائتسین ایستر باشقا بیر توپلوم اونو ایداره ائتسین، اونا حاکیم اولان رژیم او توپلومون ذهنیتی و مانتالیته سینین بیر اورونودور. اؤزو اؤزونو ایداره ائدیرسه دئمک کی اؤز ایچیندن بیریلری اونا حاکیمدیر. باشقا بیر توپلوم ایداره ائدیرسه گئنه ده یؤنتیم (حاکمیت) حاققینی ایتیرن توپوم دا سوچسوز دئگیلدیر. چونکو کئچمیشده و حاضیردا اوز حاکیمتینی قورابیلجک ذهنیت و مانتالیته یه صاحیب اولمامیشدیر. یعنی کی، بیر حاکیمیتی تنقید ائدرکن، تنقیدی اؤنجه او حاکیمیتین یؤنتدیگی توپلومون ذهنیت و مانتالیته سیندن باشلاماق لازیم. توپلومون ذهنیتی و مانتالیته سی ساغلام ایسه حاکمیت ده ساغلام اولماق مجبوریتینده یوخسا فاسید حکومت دوان ائدجکدیر. ایراندا دا اگر سیاسی، اکونومیک، کولتورل و توپلومسال بیر بؤحران وارسا و اونون اوچون حاکیمیت تنقید ائدیلیرسه بیلینمه لیدیر کی بو تنقید توپلومون ذهنیتدین باشلامالیدیر.

مع السف گؤروروک کی گونئی آزربایجان دا بوتون بو بؤحرانلاردان اؤز پاینی آلیبدیر. گوئنی آزربایجان دا جهنمه دؤنوشن ایران ایله برابر یانماقدادیر. ملتیمیز چوخ یؤنلو بیر بؤحران ایله قارشی قارشیا دیر کی بو بؤحرانین کیملیکسل، اکونومیک، سیاسی، کولتورل و توپلومسال طرفلری واردیر. سئویندیریجی حالدیر کی میلتیمیز و اؤزللیکله گنجلریمیز آرتیق بو بؤحرانین فرقینده دیر لر حللی اوچون چابا صرف ائتمکده دیرلر. بونون اوچون ایران حاکیمیتی میلی گوجلریمیز طرفیندن جیددی تنقیدیه معروض قالماقدادیر حتی دئمک اولار کی میلی گوجلریمیز و آیدینلاریمیز سادجه دؤولتی تنقید ائتمکله قالماییب میلتیمیزین ذهنیتینده دگیشیکلیک (تغییر) یاراتماق اوچون چابا صرف ائدیرلر. البته دئمک اولار کی حله یولون باشینداییق و گؤرولمَسی گرَکن چوخ ایش وار. اما صیرف بو موجادیله نین باشلاماسی و بَللی اؤلچوده مصافه قطع ائتمه سی اؤزو بؤیوک اوغوردور.

یالنیز مع الاسف سؤیلمک لازیمدیر کی میلی موجادیله میز میلتیمیزین قارشیلاشدیغی توپلومسال بؤحرانی بؤیوک اوراندا (نسبت ده) اهمال ائتمکده یر. آپاریلان فعالیتلرین بؤیوک قیسمی سیاسی، کیملیکسل، کولتورل یاخود انسان حاقلاری و چئروه (محیط زیست) ماهیتی داشییر. اوزلشدیگیمیز توپلومسال بؤحرانلا باغلی هارداسا هئچ بیر چالیشما یوخدور حالبوکی حامی دا بو بؤحرانین فرقینده دیر. اونوتماماق لازیم کی ایراندا اورتایا چیخان و میلتیمیزین ده پایینی آلدیغی توپلومسال بؤحرانین بیر آن اؤنجه قارشیسینا کئچیلمز ایسه ائله بیر نکته یه گلیب چیخیلابیلیر کی بوتون اجتیماعی و انسانی باغلاریمیز قوپار و بؤیوک بیر میلی فلاکت یارانابیلر. توپلومسال چؤکوشه اوغرامیش و معنویات بوشلوغونا دوشموش بیر توپلوم آرتیق توپلوم دئگیل بلکه بیر بیری ایله علاقه سیز اینسانلار ییغینی دیر. آرتیق اورادا میلتدن و میلی وارلیقدان سؤز ائتمک چتیندیر و کیملیک ده، کولتور ده، سیاست ده اؤز آنلامینی ایتیرمیشدیر.

میلی حرکتیمیزخالقیمیزین اؤزلشدیگی توپلومسال بؤحرانا بیر اؤنجه چاره آراماغا باشلامالیدیر یوخسا گئج اولابیلر.

بیزجه توپلومسال بؤحرانلا موجادیله ائتمگین ایک آددیمی گنجلریمیزین اؤزللیکله ده میلی فعاللاریمیزین میلی-معنوی دگرلریمیزیه و میلی ویجدان و اخلاقیاتا صاحیب چیخمالاری و بوتون داورانیشلاریندا اؤزل یاشامدان توتموش سیاسی چالیشمالارینا قدر میلی-معنوی دگرلر، ویجدان و اخلاقیاتا باغلی قالمالاریدیر. نه یازیق کی باشقا ساحه لرده اولودوغو کیمی بو مساله ده ده ایران حاکیمیتیندن یاپیجی و دوزلتیجی آددیملار گؤزلمک عبث ایشدیر چونکو بو حاکمیت اؤزو قیرتلاغینا قدر فساد و اخلاقسیزلیغا باتیبدیر. البته کی بو قونودا رژیمی تنقید ائتمک و گوناهلاندیرماق لازیمدیر اما تنقیدی و دوزَلیشی اؤنجه اؤزوموزدن باشلامالی ییق.

ملی حرکتیمیز توپلومسال بؤحران مساله سینه قئیدسیز قالمامالیدیر. میلی دیلیمیزه، کیملیگیمیزه، ایقتیصادیاتیمیزا، سیاستیمیزه و چئورمیزه دویارلی (حساس) اولدوغومز قدر میلی-معنوی دگر و اخلاقیات قونوسوندا دا دویارلی اولمیاغیمیز لازیمدیر و بو دگرلره صاحیب چیخماق و باغلی قالماق نهضت یمیز بیر آن اؤنجه باشلامالیدیر.