ساوالان پورت : ائلیمیزین تودوز گونو خورداد آیینین بیری گونئی آزربایجانین قهرمان تورک خالقی، بیرداها دوستاقدا قالان اولکه میزین، قیزیل کیتابینا بیر صحیفه داها آرتیب اونو داها زنگینله شدیردی. اورمو و تبریز شهرلرینده اولان ، اورمو گولونون قورولتماسینا اعتراض لاردا چوخلو گنج قیز و اوغلانلار فاشیستی فارس رئژیمی طرفیندن توتوقلانیب، دوستاقلارا آتیلدی لار. بو یازینی اورمو دا توتوقلانان قهرمان باجی لاریما کی او گون گرچکدن جسارت و وطن سئوگیسینی معنا ائله دیلر سونورام.
ای منیم تومروس عظمتلی باجیلاریم، بوگون سیز ظولم ائوینین دیرکلرین تیتره دیب، خالقیمیزین سارسیلماز گوجونو گوستردینیز. آنامیز تومروس توپراغا توخونانلارین باشینی کسیردیسه، سیز یاغی دوشمنی یئر اوزونده، اوزو قارا ائله دینیز. بوتون کایینات بوگون سیزی آلقیشلاییر ، جسارتینیز یازارلار قلمینده، شاعیرلر سوزونده و آشیقلار سازیندا دئییلیر.
قهرمانلیق لارینیز تکجه آزربایجاندا یوخ، بوتون توران ائللرینین یادداشلاریندا قالاجاق . بوتون قارانلیقلار سارسیلماز ایراده نیزین قارسی سیندا دیز چوکوپ یوخسوزلوقلارا بدل اولاجاق لار.
سیز دوستاقلاردا اولسانیزدا ، سئوگینیز هر بیر تورک آزربایجانلی نین اوره یین آلیب ، اونلارین کونلونده وطن سئوگیسی آدیندا یووا قوروب، سیزین اوچون سونسوز سئوگی بسله نیلیر. سیزین سئودالی لارینینیز سیزلر اوچون گوزل اورمودان آل آلما، قوجا تبریز دن دوز چورک ، یام - یاشیل موغاندان قیزیل گول عطرینی توحفه گتیریرلر. آل آلمایلا خالقیمیزا سئوگی، دوز چورک له خالقیمیزا حورمت و قیزیل گوللرین عطریله یوردوموزا آنل آچیقلیق قازانین. اولسون کی سیز ائلیمیزین آیدینلیق لارینا ایشیق ساچان گونش اولاسینیز. اونونلا آغلاییب ، اونونلا گوله سینیز. ائوینیزه چیراغ ، ائلینیزه دایاق اولاسینیز.
سایقی و سئوگی ایله : تئموچین سابوتای.
هیچ نظری موجود نیست:
ارسال یک نظر