"قادین گولرسه بو ایسسیز موحیطیمیز گوله‌جک،
سوروکله‌نن بشریت قادینلا یوکسه‌له‌جک."
«حوسئین جاوید»
قادین مسئله‌سی، دونیانین مسئله‌سی
قادین مسئله‌سی دونیانین موختلیف توپلوم‌لارینین گوندمینده اولان مسئله‌دیر. بو مسئله بوتون دونیانین مسئلهسیدیر. بئله کی، دوغو (شرق)، خوصوصن ایسلام اؤلکه‌لرینده قادینلارین دورومونون آغیر و اوزونتولو اولدوغو بیر گئرچک اولسا دا، بیر چوخوموزون ساندیغیمیزا رغمَن هله ده باتی (غرب) اؤلکه‌لرینده جینسی برابرلیک تام شکیلده تامین دئییلدیر. دونیادا قادین مسئله‌سینی تام شکیلده چؤزه بیلمیش بیر توپلومون وار اولدوغونو سانمیرام!
قادین مسئله‌سی بیر دونیا بویو مسئله اولدوغو ایله یاناشی، بو دونیادا وار اولان میلّتلرین، توپلوملارین، ائتنیکلرین و باشقا چئوره‌لر و واحیدلرین ده مسئلهسیدیر. بوتون بو واحیدلر، ایجتیماعی موناسیبتلرین تنظیمینده اؤز یئرَل (بومی) موختصات و اؤزللیکلریندن ائتکیلنمیشلر. بو واحیدلرین هر بیرینین اؤزونه مخصوص قادین – کیشی ایلیشکیلری بیچیمی واردیر. بو گئرچک قادین مسئله‌سی‌نین فرقلی توپلوملاردا فرقلی مودئللرله اؤزونو اورتایا قویماسینا ندَن اولور. بئله‌‌لیکله جینسی برابرلیگی الده ائتمه سورَجینده هم دونیا پرئسپئکتیوینی (چشم‌اندازینی)، هم ده ایچینده اولدوغوموز توپلومون اؤزللیکلرینی نظره آلاراق قاباغا گئتمک زورونداییق.
قادینلیغین پوتانسییئل‌لری
نظرده آلین بوگون سوریه‌ده‌کی ایختیلافین ایکی طرفی ده قادینلار اولسایلار. اوندا یئنه ده می بو قدر ساواشین و قان توکولمه‌سینین شاهیدی اولاجاقدیق؟!
نظرده آلین اؤلکه‌لرین سیاست اورتامیندا قادینلار اَن آز کیشی‌لر قدر سؤز و گوج صاحیبی اولسایلار. اوندا یئنه ده می بو چکیش – برکیشلی، داوا – شاوالی، بعضن ده اینسانلیق دیشی (غئیر-ی اینسانی) سیاست آتوموسفئرینده نفس آلماق مجبوریتینده اولاجاقدیق؟!
نظرده آلین توپلومون گوندمینده، کوچه-بازاردا، ایش یئرلرینده، کیشی‌لر قدَر قادینلارین دا حوضورو اولسایدی. اوندا یئنه ده می بو قدر قانون پوزونتولاری (قانون شکنی) و اخلاقسیز حرکتلر و سویوق موناسیبتلرین شاهیدی اولاجاقدیق؟!
جینسی برابرلیک قادینلارین حاقّی اولسا دا و اونون تامین ائدیلمه‌سی بشریت مجموعه‌سینین گؤرَوی اولسا دا، اؤزو ایله برابر چوخ گوجلو و دیَرلی پوتانسییئل‌لری ده توپلوما تزریق ائده‌جک. دونیانی داها دا گؤزللشدیره‌جک. سوروکله‌نن بشریتین یوکسه‌لیشینه یول آچاجاق.
گوناهکار کیمدیر؟ مسئول کیمدیر؟
بو قونوندا معلوم بیر طرفی گوناهکار گؤرستمک هئچ یاخشی دئییل. چونکی فایداسی یوخدور. نه قدر قادینا حاق تانیماغین اؤنونده دایانان جاهیل کیشی‌لر وار، او قدر ده کؤله حالیندا یاشاماغی منیمسه‌ییب، هئچ نه‌یی دَییشمک ایسته‌مه‌ین جاهیل قادینلار وار. گوناهکاری آختارماق یئرینه مسئله‌نین ندَنی آختارماق لازیمدیر. جینسی عدالتسیزلیگین بیر گوناهکاری وارسا او دا ائله بشریت مجموعه‌سی‌دیر، قادینلی – کیشیلی بشریت.
قادین مسئله‌سی ساده‌جه قادینلارین دئییل، بوتون بشریتین مسئلهسیدیر. اورتادا اولان جاهیللیک قارانلیغی رفع ائدیلمه‌لی‌دیر. بو مسئله‌نین حلینده کیشیلی-قادینلی هامی چالیشمالی‌دیر. بو قونودا کیشی‌لرین چالیشماسی نه عاییبدیر، نه ده اوتاندیریجی، بلکه مسئله‌نی باشا دوشه‌نینه بیر گؤرَودیر (وظیفه‌دیر).
آذربایجان و قادین مسئله‌سی
آذربایجان میلّی حرکتینده، قادینلار حاقدا یایغین بیر مونفعیل یاناشما طرزی وار. سونّتی اولاراق بیر میلّتچی‌دن قادینلار حاقدا فیکیرلرینی سؤیله‌مه‌سینی ایسته‌سن، میلّی دویغولو بیر طرزله، تورکون مؤحتشم تاریخینه روجوع ائله‌مک‌دن سووای بیر ایش گؤرمه‌یه‌جک. باشلاییب، تومروس آنادان و تورک میلّتینده قادینلارین دا کیشی‌لر کیمی دؤیوشکن اولدوغوندان دئیه‌جک. دده‌قورقود بویلاریندا قان‌تورالی’نین سلجان خاتینا "قیزلارین یولو اوّلدیر" دئمه‌سیندن سؤز ائده‌جک. سورا دا "غربلی‌لر "Ladies First" سؤزونو بیزدن آلیبلار ها!" دئیه‌جک. سونرا سؤز آلیب فارسلاردا، اؤزللیکله فیردووسی’نین دئییشینده قادینلارین نه قدر آلچاق گؤستریلدیگینی آچیقلایاجاق. بئله ده داوام ائده‌جک.
بونلاری دئیه‌جک ده ساده‌جه تاریخده قالدیقلارینی دئمه‌یه‌جک. بو تاریخی گئرچکلری گونوموز اوچون یارارلی بیر پوتانسییئله چئویره بیلمه‌دیگیمیزدن دئمه‌یه‌جک. بوگون قادین حاقلاری ایستانداردلاری و نورملاری اساسیندا قونشو توپلوملارین بیر چوخوندان اؤرنه‌یین فارسلاردان گئری‌ده اولدوغوموزو سؤیله‌مه‌جک. تورک قادینی‌نین فلاکتلی دورومونو آنلاتمایاجاق. بلکه ده بیلمیر هئچ بونلاری، هئچ دوشونمه‌ییب بو حاقدا. بلکه ده هئچ دویماییب بو ائحتیاجلاری!
دوغروسو، قادین حاقلارینین نه اولدوغونو بیلمه‌ین اوغلوموز دا گوناهکار دئییل، اؤز حاقلارینی تانیمایان یاری‌کؤله یاشاما آلیشمیش قیزیمیز دا. بونلارین ایکیسی ده بو یانلیش آنلاییشی ایچینده یاشادیقلاری توپلومدان الده ائتمیشلر. غلط قایدالی توپلوموموز بو غلط دیَرلر سیستئمینی بیزه آشیلامیش (تزریق ائتمیش).
آذربایجان‌مرکز حرکت اؤزونو تورک-آذربایجان توپلومونون سعادتی و ریفاهینا گئدن یولدا بوتون مولّیفه‌لر و ساحه‌لر اوزره سوروملو (مسئول) حیس ائدیرسه، بو حاقدا دا اؤزونو مسئول گؤرمه‌لی‌دیر. بیز توپلوموموز ایچیندن حرکت ایچه‌ریسینه داشیدیغیمیز بو یانلیش قاوراییشی (درک)، حرکت ایچینده ایصلاح ائدیب، یئنی و دوغرو آنلاییشی توپلوما تزریق ائتمه‌یی باجارمالی‌ییق. اونسوز دا سون زامانلار مودئرلشمکدن چکینمه‌ین میلّی حرکتیمیزده بو یؤنده دیَرلی چالیشمالار باشلادیلمیش. آما بونو قبول ائتمه‌ییمیز لازیمدیر کی قادین مسئله‌سی میلّی حرکتده ایستراتئژیک پلانلار سوییّه‌سینه یوکسه‌لمه‌یینجه بؤیوک اؤلچولو ایره‌لیله‌ییشی گؤزله‌یه بیلمه‌ریک.
سؤزلریمی سون زامانلار گؤردویوم، چوخ ائتکیله‌ندیگیم و آذربایجان میلّی حرکتی ایله چوخ باغلانتی‌لی گؤردویوم بیر جومله ایله بیتیریرم:
"قادینلارین اولمادیغی بیر موجادیله باشاری‌یا (موفقیته) چاتماز."
داغ درگیسی‌نین 16-جی سایی‌سیندان
م.قوشاچایلی
م.قوشاچایلی
هیچ نظری موجود نیست:
ارسال یک نظر