دئموکراتیک اؤلکه‌لرده سئچگی‌لر نتیجه‌سینده اورتایا چیخان پارلمانین توتدوغو یول اؤلکه سیایستینی و گرکیرسه یاسا، آنایاسا و باشقا دئییشیک‌لیک‌لری قان‌سیز قادا‌سیز حیاتا گئچیریر. آنجاق، دیکتاتورلوقلا ایداره ائدیلن سیستئم‌لرده، حاکیمیت‌لر خالقین سسینی، گوج ایشله‌ده‌رک توپ- تانک و پلیس گوجو ایله بوغدوغونا گؤره دوروم فرق‌لنیر. باشقا ایفاده ایله بو اؤلکه‌لرده مرکزی حاکیمیتین ضعیفلمه‌سی اوچ آیری یوللا گرچکلشیر.
۱- اوستون بیر خاریجی گوجون موداخیله‌سی
۲- داخیل‌دکی موخالیف قوه‌لرین بؤیوک ازیت‌لره قات‌لانا‌راق گئنیش چاپ‌لی یوروش‌لری
۳- سلاح‌لی موباریزه
بو اؤلکه‌لردکی اجتماعی-سیایسی-اقتصادی و ائتنیک دورومون تأثیری آلتیندا یوخاریدا آدی گئچن دئییشیم مودئل‌لری فورمالاشیر و خالقین عمومی ایستیینه چئوریلیر. بیزی ایلگیلن‌دیرن، گونئی آذربایجان پروبلمی‌نین حلی اولدوغونا گؤره، دونیا‌داکی اوزاق ویا یاخین گئچمیشده، یوخاری‌داکی مودئل‌لرله دئییشن اؤلکلررده خالق‌لار و میللت‌لر اؤز ایستیینه چاتیپ-چاتماماسی بیر تجروبه اولسا دا اساس مسئله ایران آدلانان اؤلکه‌دکی دوروم‌دور. او جوغرافیادا اوزاق گئچمیشده باش وئرن حادثه‌لرده، تورک میللتی اولا‌راق باشیمیزین بؤرک‌سوز قالماسی‌نین سببی میللی کیملیگیمیزدن خبرسیز، آریا ایرقینا دایانان فارس شووینیزمی‌نین یالانچی تبلیقاتی نتیجه‌سینده میللی دوشونجه‌دن اوزاق قالمامیز اولسا دا یاخین گئچمیشده و بوگون آلدانماغیمیزین سبهی فرق‌لی‌دیر. گئچن یوز ایلده او اؤلکه‌ده یوخاریدا آدی چکیلن هر اوچ مودئل اوسولو ایله دئییشیک‌لیک‌لرده وئردیگیمیز قان‌لار موقابیلینده، هئچ نه قازاناماغیمیزین سبب‌لرینی آشاغی‌داکی کیمی سیرالاماق اولار.
- تورک کیم‌لیگی و آزربایجانچی‌لیق مفکوره‌سین‌دن اوزاق‌لیق.
- داخیلیمیزدکی مانقورت‌لار واسطه‌سی ایله آلداتیلا‌راق بعضی کیچیک وعده‌لره اینناماق.
- بل‌لی بیر جوغرافیادا بل‌لی بیر سیاسی ایده‌آلا ییلنمه مک.
- اوزدن ایراق سیاستچی‌لریمیزین، شخصی منافعی‌لرینه قوربان گئتمک.
- دوزگون بیر سیایسی تشکیلات‌دان یوخسون اولدوغوموزا گؤره فارس شووینیزمی‌نین هیلگرانه سیایست‌لرینه بویون ایمک.
بو سیرالاماغا داها چوخ ماده‌لر آرتیرماق اولسا دا، ییخیلماغیمیزین کؤکونده دوران‌لاری آنلاتماقلا یئتنک و بوگونکو دورومو آزجاجیق آچیقلایا‌راق گله‌جک دئییشیک‌لیکده باشاری یول‌لارینی آخدا‌راق.
شوبهه یوخ‌دور کی، دونیا و چئوره‌میزدکی گئدیشاتا تابی اولا‌راق گونئی آذربایجاندا بوگون فرق‌لی دوروم سرگیلنمکده‌دیر. آذربایجان میللی حرکاتی‌نین عمومی آخیشی‌نین تورکلوک مئهوری اطرافیندا فیرلانان آزربایجانچی‌لیق مفکورسی‌نین تشکیل ائتدیگی کیمسه‌یه سیر دئییل. او اؤلکه‌ده گله‌جکده هر هانسی بیر سبب اوزوندون باش وئره‌جک دئییشیک‌لیکده بیزی باشارییا آپارا‌جاق بو خطین اوستونده، میللی حرکاتیمیزین آذربایجانین تاریخی توپ‌راق‌لارینا ییلنمه‌سی ده ایکینجی بؤیوک آددیم اولا‌راق دیرلندیریلمه‌لی‌دیر. بوندا دا شوبهه یوخ‌دور کی، آزادلیق یولوندا باشاریمیزین تامینی اوچون قئید ائدیلن مفکوره‌لرین تکجه میللی حرکته قوشولان‌لارلا کیفایتلنمه‌ییب، بوتون میللتیمیزین ایچینی دولدورماسی ان واجیب مسئله‌دیر. بوندا دا شوبهه یوخ‌دور کی، بوگون یوزده ییرمی‌سی اویانمیش اولان ۳۰ میلیون میللتیمیزین اویانیش ایشلمی آرتدیقجا، دوشمن چئشیت‌لی واسطه‌لرله اونو اؤنلمه‌یه چالیشماقدا و دوز یولون‌دان آزدیرماق ایستمکده‌دیر. آسدی – کسدی سیایستی آچیق آیدین گؤروندوگونه گؤره اونون قارشیسیندا دایانماق و حتی اوندان ایستیفاده ائدیب میللی دیرچلیشی گوجلن‌دیرمک منتیقی گؤروش‌دور. آنجاق، گئچمیشده اولدوغو کیمی بوگونده دوام ائدن آلداتیجی سیایست‌لر، میللی حرکاتیمیزین یؤنونو دئییشه‌رک یولسوزلوغا سوروتلمک ان قورخولو مانیه‌دیر. آدی بیزیم اؤزو اؤزگه‌نین اولان میللی حرکاتیمیزا نفوذ ائتمیش، فارس تبلیقاتین‌دان نجات تاپامامیش بعضی سویداش‌لاریمیزدان سویستیفاده ائده‌رک، میللی حرکاتیمیزی رئژیم داواسینا آپارماق ایسته‌ین‌لر، بئیانییه‌لرینده حرکاتیمیزی ایراندا گئدن اومومی حرکته باغلییا‌راق دوغرو یول‌دان آزدیرماق ایسته‌ین‌لرین تهلوکه‌سی ان بؤیوک مانیه کیمی قارشیمیزدا‌دیر. بوگونکو حاکیمیته اؤزلرینی آلتئرناتیو سایان آشیری فارسچی‌لارین آلداتما‌لاری‌نین یانیندا، حاکیمیتده اولان‌لارین دا چئشیت‌لی آنتی آذربایجان، آنتی تورک سیایاسترینه دقت ائدیلمه‌لی‌دیر. بونون ان باریز نومونه‌سی آذربایجانلیلاری گونئی آذربایجان پروبلمین‌دن سیگیریب، حاکیمیتین اوموم ایران سیایستینه سوروتلمک اوچون آدینی سئچگی قویدوق‌لاری اویون‌دان شدتله فایدا‌لانیرلار. اونون اوچون فیرستی موناسیب گؤروب، گئچمیش‌دکی بئیانییه‌لریمیزده ده بیلدیردیگیمیز کیمی بو سئچگی‌لرده ده اورمو و اونا تای شهرلرین خاریجینده خالقیمیزین سئچگیده ایشتیراکی فارسچی‌لیق سیستمینه خیدمت‌دن باشقا بیر ایفاده داشیمییا‌جاق‌دیر. حتی اگر، خالقین حؤرمت ائتدیگی اینسان‌لاری سیریتلاماق ایسته‌سه‌لر ده بیزیم میللتیمیزه هئچ بیر فایداسی اولمویا‌جاق‌دیر.
میللی سؤزلر دانیشا‌راق، میللی قوه‌لری ووروب میدان‌دان چیخارماق ایسته‌ین‌لر، میللی حرکاتا آیداتی اولمویان‌لاری میللتین بوینونا مین‌دیرن‌لرین هدفی ایستر پاخیل‌لیق، شخصی منافع ویا هر هانسی بیر خاریجی قوه‌نین تلیماتی ایله اولسون ان بؤیوک انگل کیمی قارشیمیزدا‌دیر. اینسان‌لارا ده یر بیچرکن دانیشدیق‌لاری سؤزلرله یاناشی، عملی سیایست‌لری و داورانیش‌لاری ایله ده اؤلچمک، حرکاتیمیزین تحریفینی اؤنلر، انگل‌لری سیلر.
بوتون میللتیمیز اویانمیش اولسا داهی، بیر سیستئم ایچری‌سینده موتشککیل اولمادیغی حالدا باشاریلی اولاجاغی اینانیلمازدیر. اؤزل‌لیکله چئشیت‌لی قروپ و دسته‌لری بیر بیری‌نین جانینا سالا‌راق، بولان‌لیق سودان بالیق توتان آریاچی‌لارین اویون‌لاری هامیمیزا آیدین‌دیر. میللی حرکاتیمیزی، اونون دورمونو، اؤزل‌لیکله قارشیمیزدا اولان مانیه‌لری درین‌دن اینجه‌لییه‌رک “آذربایجان مرکزلی دوشونجه سیستمینه” اینانان‌لارین “شورا” فورماسیندا بیر قورومون ایچینده بیرلشمه‌سی‌نین ده اورتایا آتیلماسی اصلینده “پارچالا حاکم اول” سیایستی‌نین قارشیسیندا آتیلان بیر آددیم‌دیر. گوج مرکزینه دؤنوشمک اوچون ۱۰-۱۲ ایل اؤنجه اورتایا آتیلان بو فیکرین قارشیسیندا چئشیت‌لی مانیه تؤره‌دن‌لرین یانیندا، میللی هرکتچی‌لریمیزین حادثه‌لردن و سیاست‌لردن آز معلومات آلماسی دا اوزوجودور. بو خبرسیزلر بیلمه‌لی‌دیر کی، بو مدت عرضینده، بعضی‌لری ۷- ۸ دفعه بیرلیک یاراتماق ایسته‌سه‌لرده، آنجاق بیرلییه آلتئرناتیو یاراتماقلا انگل اولموش‌لار. بو اینسان‌لارین هدفی نه اولورسا اولسون، عمل‌لری‌نین نتیجهی میللی حرکاتیمیزین ضیانینا اولموش‌دور.
اونون اوچون‌دور کی، %۹۹- او تمیز اورک‌لی و فداکار اولان میللی هرکتچی‌لریمیزین یوز اؤلچوب بیر بیچمه‌لری باشاریمیزین قارانتی‌سی اولا بیلر. او اؤلکه‌ده بیر دئییشیکلیین اورتایا چیخاجاغی ار- گئج قاچینیلمازدیر. هازیرلاشماساق، گئنه اودوزاجاغیمیزدا اینکار ائدیلمزدیر.
گونئی آذربایجان میللی بیرلیک شوراسی - تبلیقات کومیته‌سی
16 فوریه 2012
قایناق : تبریز سسی
هیچ نظری موجود نیست:
ارسال یک نظر