ساوالان پورت : بو گون اون دوققوز اردیبهشت گونئی آزربایجان اؤیرنجی گونودور. اون یئددی ایل قاباق تبریز بیلیم یوردو اؤیرنجی لری، ایران حاکیمییتی نین شوونیستی سییاست لرینه قارشی، تبریز خییاوانلارینا تؤکولوب گونئی آزربایجان تورکلرینی آشاغیلایان سورغو بلانکئتینی پروتئست ائتدی لر. بو آیاقلانما چاغداش آزربایجان اولوسچولوغوندا، اؤیرنجی لرین بیرینجی چیخیشی کیمی یوروملانا بیلر. اؤنجه لر چئشیدلی نده ن لر اوزوندن تورک اؤیرنجی لری باشقا سؤیلملرله اؤز اعتراضلارینی دیله گتیریردیلر. آنجاق بو آیاقلانما تام آنلامی ایله اولوسال بیر ایچریک داشیییردی. بو آیاقلانما سونوجوندا، گونئی آزربایجان اؤیرنجی حرکتی، آزربایجان میللی منافعینی تمل آنلاییش اولاراق منیمسه ییب و بو گونو آزربایجان تورکچولویونده اونودولماز بیر گونه چئویردی.
بو گون اون یئددی ایل او گوندن کئچیر. آنجاق یئنه گونئی آزربایجانلی اؤیرنجی لر وطن قایغی سی چکمک سوچو ایله چئشیدلی تضییق لره معروض قالیرلار؛ اؤزه للیکله تبریز بیلی یوردو اؤیرنجی لریندن؛ روزبه سعادتی، محمد احدی، افشین شهبازی و مهرداد کرمی آیلاردیر یالنیز آنا دیللرینی سئودیکلری اوچون دوستاقدادیرلار. بونلارلا بیرلیکده آیری وطن سئور آکتیویست لر، اؤزللیکله؛ سعید متین پور، ابراهیم رشیدی، رسول بدلی، سالار طوری، وحید حبیب چشمه، محمدرضا هادی و فردین مرادپور دوستاق گونلرینی کئچیرمک ده دیرلر. بو توتساقلارین تک سوچو، شوونیسم اؤنونده باش قالدیرماقلا گونئی آزربایجان گرچگینی ساوونماق دیر.
بو آرادا گونئی آزربایجان اؤیرنجی حرکتی نین اؤنملی گؤروی، آزربایجانین میللی منافعینی قوروماقلا یاناشی، زامانین دورومونا اویغون ساواشی ایره لی آپارماق دیر. بوندان دولایی اؤیرنجی حرکتی، چاغداش گونئی آزربایجان میللی حرکتی نین باشلانغیج ایللری، اؤزللیکله 1370-ینجی ایللرده کی چابالارلا، بوگونون آیریمینی گؤز اؤنونه آلاراق داها ائوریملی بیر بیچیمده ایره لی لمه کده دیر. او گونلرده، گونئی آزربایجان اؤیرنجی حرکتی نین اؤنملی آماجی، ایران اؤیرنجی حرکتی و دیگر سؤیلملردن باغیمسیز اولماق اولسایدی، بو گون بو سورون چؤزولرک یئنی بیر آماجلار تانیملامالیدیر. بو آماجلارین ان اؤنملی سی تشکیلاتلار چاپیندا چابا گؤسترمکدیر. گونئی آزربایجانلی اؤیرنجی لر، تشکیلاتلاردا چابا گؤسترمکله جمعی ایشی دئنه یه رک میللی حرکتین اؤلوم-دیریم ساواشی ساییلان تشکیلاتلانما ائوره سینی داها ساغلامجا کئچه بیلمکده یاردیمجی اولا بیلرلر. بونونلا یاناشی آزربایجان اولوسونون گله جه یینی گوجلو سییاسال آکتیویستلردن بوش بوراخمازلار.
آزربایجان میللی دیرنیش تشکیلاتی بو آماجا اولاشماغی داها قولایلاشدیرماق اوچون اولوسچو اؤیرنجی لردن بیر کمیته یاراداراق گونئی آزربایجانین چئشیدلی بیلیم یوردلاریندا دیرنیش هسته لرینی اولوشدوروبدور. آزربایجان میللی دیرنیش تشکیلاتی نین اؤیرنجی کمیته سینده چابا گؤسته رن اؤیرنجی لر، گونئی آزربایجان اؤیرنجی حرکتی آکتیویست لرله بیرلیکده چالیشاراق تشکیلاتی بیچیمده فعالیتی ده دئنه ییرلر. آزربایجان میللی دیرنیش تشکیلاتی اؤیرنجی کمیته سینین اؤنملی آماجی؛ تشکیلاتلانما گره کلیلیگینی فعاللار ایچره یایماقلا، گونئی آزربایجانین بحرانی گونلری اوچون تجروبه لی کادرلار یئتیشدیرمکدیر. تشکیلات بیچیمینده چابا گؤسته ره رک گلیشن اولوسچو بیرئی لریمیز، داها آرتیق جمعی ایشین اؤنمینی حیس ائدرلر. جمعی عمل ایسه گرک دویدوغوموز، ان اؤنملی آراج دیر.
سون گونلرده میللی فعاللار ساریندان ایران دؤولتینین اورمو گؤلونو قوروتما سییاستلرینه قارشی 1385-ینجی ایل خورداد قییامی نین ایل دؤنومونه بیر چاغیریش وئریلیبدیر. بو چاغیریشدا غئیرتلی اولوسوموزدان ایسته نیلیبدیر کی اورمو و تبریز خییاوانلاریندا حاضیر اولماقلا اؤز اعتراضلارینی بیلدیرسینلر. آزربایجان میللی دیرنیش تشکیلاتی نین اؤیرنجی کمیته سی اولاراق بو چاغیریشی دستکله ییب بوتون اؤیرنجی لرین بو اعتراضلارا قاتیلماسینی ایسته ییریک.
سوندا آزربایجان میللی دیرنیش تشکیلاتی نین اؤیرنجی کمیته سی اولاراق اون دوققوز اردیبهشت، گونئی آزربایجان اؤیرنجی گونونو، بوتون آزربایجانلی- تورک اؤیرنجی لره، اؤزه للیکله اولوسچو اؤیرنجیلریمیزه قوتلو اولسون دئییب تئزلیکله دوستاقدا اولان گونئی آزربایجانلی اؤیرنجی لرین اؤزگور بوراخیلماسینی آرزو ائدیریک.
آزربایجان میلی دیرنیش تشکیلاتی
اؤیرنجی کمیته سی
گونئی آزربایجان
18-02-1391
هیچ نظری موجود نیست:
ارسال یک نظر