ساوالان پورت : هئیکل سیز گونلر
...
12 یاشلی ایدیم
رساملیق ائدردیم
شکیل‌لر چکردیم
...
12 یاشلی ایدیم
رساملیق ائدردیم
شکیل‌لر چکردیم
همیشه "لالا"
آما ندنسه لالام
بنز مزدی کندیمیزین لالاسینا
بنزردی کیتاب لالاسینا
کئشکه دوشونجه‌می کندیمدن آلاردیم
کیتابدان یوخ[1]
اوزاق ایل‌لری خاطیرلاییرام. 12 یاشلی گونلریمی. اوخولدا اؤز صینیفداشلاریملا اؤزگور قوش کیمی اوچدوغوم گونلریمی. اوخولون سون ساهاتی آزادلیق زنگینین چالینماسینی گؤزلردیک. بوراخیلیب کوچهیه قاچاردیق. آتیلمیش داش کیمی، قاناد چالاردیق بوراخیلمیش قوش کیمی. بو ائوه چاتماق سئوینجی دئییل، اوخولدان بوراخیلما سئوینجی ایدی. ائوه چاتدیقدا بیر داها کدر بیزی بورویردی.
موعللیمی گؤزله دیکجه داریخمامیز آرتاردی بعضن. موبصور « بو ساهات آغامیز گلمهیهجک » دئیردی؛ اؤزگورلوک، راحاتلیق، دینجلیک. بیری یاریمچیق قالان مشقینی یازاردی، بیری یان – یؤرهسینده‌کی‌لرله دانیشیب گولردی. بیردن آغیر بیر سوکوت کیلاسی بوغاردی؛ ناظیم پنجرهدن باخیر ... . سانمایین بو سئیرائدن باخیشلار یالنیز دانیشیب – گولنلری ائتکیلهییردی. یوخ، مشقینی یازان، درسینی راوانلایان و هر کیمسه بو ناظیر باخیشلاردان راحاتسیز اولوب، اؤزگورلویونو ایتیرردی ...
نه وار بیزی سئیر ائدن بو گؤزلرده، نه وار شهرلریمیزین مئیدانلاریندا باخان اؤلو هئیکللرده ...
-----------------------------
...
گؤز آچاندا حایا تا من باخیب گولدون اوزومه سن
دئدیم وطن وطن/ وطن آنا یوردوم آذربایجان
حایاتا گؤز آچدیغی اون یئددی گون ایدی. آناسی‌نین قوجاغیندا آباسی‌لا بیرلیکده اوزاق ائل‌لره سورگون ائدیلدی. آتاسی نئچه گون اؤنجه بیرکز اولاراق اونو باغرینا باسمیشدی. آباسی « من کی اسیر اولمامیشام نه دیر بو اسارتیم » دئیه سورگونون اوزاق یول‌لاریندا حایاتا گؤز یومدو؛
ندن اینسان ایلک دؤنه
تورپاغا باش ووراندا
فرق ائله‌میر هایاندا
ندنسه سون نفسده
تورپاغا اوز قویاندا
فرق ائله‌ییر بو تورپاق
او تورپاق اولمایاندا
سورما بو قریبه حیس
تورپاق اوچون ندن‌دیر
تورپاق واردیرکی ایستی
تورپاق وار اوشدون‌دیر
تورپاق واردیرکی قوربت
تورپاق وارکی وطن‌دیر[2]
یئتمیش ایلدن آرتیق یاشاسادا آذربایجانی یاخیندان گؤرمه‌دی، آما کؤنلونده یاشاتماغی اؤیرندی. تاری سینه سینه باسدی. سورگون وطنداش لاری نی توپلاییب اونلارین روحونو اوخشادی.
دئییرلر آذربایجانی گؤرن‌لردن آذربایجان حاقدا اوقدر اطرافلی بیلگی توپلامیشدی سانکی ایل‌لر اوردا یاشاییب، هر یانی‌نی یاخیندان تانیرمیش. دینله‌ینلری خیال قانادلارینا قوناقلاییب، یوردوموزون گزمه‌سینه گؤند‌رمیش؛ ایندی باکی ساحیل‌لرینده‌ییک، ایندی کوردن آرازا دیزین – دیزین گئدیریک. او خیال عالمینده ده راحاتلیغی حیس ائتمیردی. باکی‌نی دولاناندا مئیداندا گؤی‌لره قالدیرمیش روس حاکیمی‌نین باخیش آغیرلیغی‌نی قانادلاریندا حیس ائدیردی ...
نه وار بیزی سئیر ائدن بو گؤزلرده، نه وار شهرلریمیزین مئیدانلاریندا باخان اؤلو هئیکللرده ...
"محمد امین رسولزاده‌نین یادیگاری آذرین یاشامیندان بیر پارچا"
-------------------------------
...
اختیار الینه آلاندا تبریز
باشیم آغارسادا بیر اوغلان کیمی
باشیما گلنی ارمغان کیمی
ارکدن خلقیمه سپه‌جه‌یم من
1325 گونش ایلی، اردیبهشت آیی‌نین 27-سی، تبریزده بیر هئیکل ائنیب، باشقاسی اونون یئرینه دیکه‌لیر. یئنن رضاخان، قالخان ایسه ستارخان ـین هئیکلی‌دیر. 5 ایل اؤنجه‌سی رضاخان تاختدان دوشوب، شاهلیقدان الی اوزولموشدورسه ده، هله میللتیمیز تام شکیلده آزادلیغی‌نی الده ائتمه‌میشدیر.
داشدان یونولموش، بئتوندان تؤکولموش. اونلار اؤلو اولسالاردا، هئچ بیر ایراده‌یه مالیک اولماسالار دا، اینسان‌لارین یالنیز روح‌لاری‌نی، ایراده‌لری‌نی ائتکی‌له‌ییرلر. بیرینی گؤردوکده فرهله‌نیب، شعف دویوروق. باشقاسی ایسه کؤنول‌لریمیزی اینجیدیر. بعضن میللی دویغولار دیرچلسین دئیه بوداپئست ده آتیلا هئیکلی دیکه‌لیر[3]. بعضن میللی مفکوره پوزولسون دئیه طوبی باغی بوشالیر[4].
نه وار شهرلریمیزین مئیدانلاریندا باخان اؤلو هئیکل لرده... اونلار اوجالدیقجا، یئکلدیکجه، کیچیله‌جک دونیامیز. آلچالاجاق دوشونجه‌میز. ییخیلدیق‌لاری گون؛ اؤزگورلوک، راحاتلیق، دینجلیک. عوصیان روحو قاباریق. بونا گؤره‌ده دئوریم‌لرده بیرینجی ایش حاکیم هئیکلی‌نی ائندیرمک‌دیر.
اردیبهشت آیی نین 27-سی؛ تبریزده بیر هئیکل ائنیب، باشقاسی اونون یئرینه دیکه‌لیر. ائندیرن‌لرین نظرینده، ایرقچی هئیکلی مئیدان‌لاردان اونلاری سئیر ائتدییی زامانا کیمی، هله آزادلیق نیسکیلینده، کؤنول‌لر دینج اولمایاجاق. او گون اوز وئرمیش بو بؤیوک ایش، آذربایجاندا سورن «میللی نیهیلیسم»-ه سون قویما اوغروندا ایدی. میللی حوکومتین عؤمرو آز اولسادا، میللتیمیز بؤیوک سوی قیریما معروض قالسادا، نئچه آیلیق هئیکل‌سیز، ناظیم‌سیز یاشادیق او گونلر.
[1] شئعر ابراهیم رشیدی‌‌دندیر.
[2] شئعرکریم گل اندام‌داندیر.
[3] ایکینجی دونیا ساواشیندا روس حاکیمی ماجار میللتین ساواشا داها یؤنلتسین دئیه اونلاری آتیلا سولاله‌سیندن اولدوقلاری ایفاده‌سی‌له آلداتماقدایدی.
[4] سون ایل‌لرده آذربایجان ـ ین مفاخیر پارکی اولان طوبی باغی بوتون میللی ایزلردن بوشالماقدادی!
روزبه سعادتی، تبریز مرکزی زیندانی 1391/02/24
هیچ نظری موجود نیست:
ارسال یک نظر