آمئریکانین سسی یئنی گاموح لیدئری دکتر لطیف حسنی نین خانیمی اعظم پیری ایله موصاحیبه ائدیب

هر بیری دوقوز ایل حبس جزاسینا محکوم ائدیلمیش یئنی گونئی آذربایجان ملی اویانیش حرکاتی (یئنی گاموح) تشکیلاتینین عوضولری لطیف حسنی، محمود فضلی، یوروش مهرعلی بیلی (آیت) ، شهرام رادمهر و بهبود قلیزاده اییولون 13-دن تبریز زیندانیندا آجلیق آکسییاسینا باشلاییبلار. تشکیلاتین باشقانی لطیف حسنین خانیمی اعظم پیری حیات یولداشی و دیگر دؤرد محبوسون دورومو حاقدا آمئریکانین سسینه موصاحیبه وئریب.

 اعظم پیرینین سؤزلرینه گؤره، یئنی گاموح عوضولری توتولما، سورغو-سوال و موحاکیمه پروسئسلرینده باش وئرەن قانونسوزلوقلار، اونلارا قارشی چیخاریلان آغیر حبس جزاسی، هابئله آپئلیاسییا (تجدید نظر) محکمەسینده حوقوقی پروسئدورون پوزولماسینا ائعتیراض اولاراق آجلیق ائدیرلر.

 شرقی آذربایجان ولایتی تجدید نظر محکمەسینین حاکیمی محمد ایمانی بئش ملی فعالین وکیلی طرفیندن حاضیرلانان آپئلیاسییا عریضەسینی رد ائده رک، تبریز اینقیلاب محکمەسینین اونلارین هر بیرینه قارشی چیخاردیغی دوقوز حبس حؤکمونو تصدیق ائدیب.

“سند آپئلیاسییا محکەمەسینه گئتدیکدن آز مودت سونرا حاکیم ایمانی 1500 صحیفەلیک سندی اوخومادان داها اول وئریلن قراری تصدیق ائدیب. آپئلیاسییا محکمەسینده پروکورورون (دادستان) نومایندەسینین حاضیر اولماماسی کیمی قئیری-قانونی مقاملار اولوب،” دئیه لطیف حسنینین حیات یولداشی سؤیلییب.

 اؤتن آیلاردا تبریز محکمەلری ایله باغلی آمئریکانین سسینه موصاحیبه وئرەن وکیل موسی برزین ده حاکیم ایمانی ایله باغلی عئینی فیکیرلری ایرەلی سورموشدو.”آپئللیاسییا محکمەسینین حاکیمی ایمانی اونا گەلن عریضەلری اوخومادان، اینقیلاب محکمەسی طرفیندن وئریلن حؤکمو عئینن تصدیقلییر،” دئیه گونئیلی وکیل بیلدیرمیشدی.

 آمئریکانین سسینه ایرانین کرج شهریندن موصاحیبه وئرەن خانیم پیری حیات یولداشی جناب حسنی، ائلەجه ده شهرام رادمهر و محمود فضلی نین ساغلیق دورومونون یاخشی اولمادیغینی بیلدیریب. اونون فیکرینجه، آجلیق آکسییاسی اونلارین صحتینی داها دا پیسلەشدیره بیلر.

 محبوسون خانیمی حیات یولداشینین اینسان حاقلاری، دئموکراتییا و ”گونئی آذربایجانین اؤز موقەدراتینی موعین ائتمک” حاقینی الده ائتمەسی ایستیقامتینده فعالییت گؤستردییینی قئید ائدیب.

 علیرضا قولونجو

http://www.amerikaninsesi.org/content/article/1701945.html