«دوكتور زهتابي دن يئني بير كيتاب»

كلاسيك ديوان ادبياتي نين قاليبجه و سبكجه اؤزولونو و بلكه ده بوتون يؤنونو قا‍‍‍پسايان عروضون منشأجه هارالي اولماسي ادبياتچي لارين و عروض علمي اوزمانلاري نين دارتيشما مئيداني اولموشدور. بؤيوك اكثريتين زعمينجه عروضون عرب كؤكلو بعضن ده فارسجا غزل لر، مثنوي لر و ...اعتيباري ايله بو علمين فارس منشألي اولماسي -البته علمي اثباتدان اوزاق- هر زامان دارتيشما موعضوسو اولموشدور. هله اونو هيندوستانا و هيندجه يه باغلايانلاردا وار.

عروض عربجه ده ائله جه ده فارسجادا عصيرلر بويو دويغو حيكمت و سئوگي نين داشييجي سي اولموشدورو. مؤحتشم آذربايجان ادبياتيندا گلديكده ايسه عزالدين حسن اوغلو: "نه دلبر، دلبر شاهد.......نه شاهد، شاهد قمري" دئيه سئودا اودوندا قوورولدوغونو غزللندي و سانكي گؤي گورولتوسو ايميش او يانغي. نسيمي لر، سولطان ولدلر، مولانا محمد فضولي لر و ... شيديرغي شيديرغي ياغماقا باشلاديلار بيردن. بينلي بركتلي لر بير عوممان دالغالاندي سؤزدن، طبيعي كي فورم باخيميندان عربجه لر و فارسجالار كلاسيك لريميزين گؤز قاباغيندا اولموشدور. و سونرالار عصرلر سوره سينده تورك، عرب و فارس ادبياتچي لاري آراسيندا بللي بليرسيز ائتكينمه لر اولموشدور آمما بؤيوك تاريخچيميز و فخريميز ساييلان رحمتليك پروفوسور محمدتقي زهتابي چاپي يوبانميش «عروضون تورك فولكولوروندا كؤكلري» كيتابيندا بو اساطيري سؤز وادي سينده يئني اسين لر اسذيرمه يه باشلاميشدير. آرا سيرا "سانكي عروضون كؤكلري بيزيم مدنيتين تورپاغيندادير" علمي شوبهه نين گئرچك اولدوغونو اثبات ائتمك اوچون علمي تاريخي ندن لر، رئفرئنس لر و قايناقلار سرگيله ييب و بو 460 صحيفه ليك سانباللي كيتابدا همين حاقلي ادعاني علمي آراشديرمالار ايله ثبوت ائتمه يه چاليشاراق بير تك آذربايجان دئييل هم ده باشقا تورك ديللي خالقلاريميزين اورتاق پينارلي فولكولوروندان شاهيد ميثاللار گتيرميشدير. ماراقليدير وورغولاديغينيز همين شيفاهي خالق ادبياتي نمونه لري عروض اؤلچولري اساسيندا تقطيع ائله ميشدير بئي پروفوسور زهتابي. و افاعيل ايله توتوشدورموشدور اونلاري يورولماز كيشي. و همين نمونه لردن يول آلاراق فضولي، نسيمي، صابير و باشقالارينادا باش وورموشدور.
دوكتور م.ح«گونئيلي»نين چاپا حاضيرلاديقي بو كيتاب علمي ادبي باخيمدان اؤنملي بير اولاي ديرسا بؤيوك اوستاديميز پروفوسور زهتابي نين سون ياديگاري كيمي گؤزله ريميزين ببه يينده قيرپيلاجاق.
بو كيتابدان اؤزلليكله ده ادبيات تاريخي مبحث لري ايله ماراقلانانلار داها آرتيق يارارلاناجاقدير.
«گونئيلي نين الي قولو وار اولسون»

"آتيلا كيشي زاده"