اوره ییمین پارچاسی، گؤزه ل آرازیم بوگون سنین ایچین اؤنملی
گؤنلردن بیری دیر، همده منیم اوچون. سنی ایلک اوخولا گئتمه یه هیجانلی گؤرنده
ایچیمده غریبه دویغولار دویورام. اؤزوم ده بو هیجانلاری آرخادا قویدوغومدان اوزون
زمان کئچمیر... یایین سون گونلری گلنده تبریزین سازاقلی گئجه لری باشلاییب پاییزین
عطرین هر یئره داغیلداردی. سون باهار! اوزمانلار چوخ سئودیییم فصل. اؤزونه عایید
رنگلر، اؤزونه عایید قوخولار و اؤزونه عایید مئیوه لر ایله. بونا باخمایاراق کی،
ایندی هئچ گؤز فصلینی سئومیرم. آیریلیق فصلی، یاپراقلارا، گول لره تومورجوقلارا
یازیق...
گئجه لر اوقدر قورخموشام بیردن- بیره ناخوشلایاسان، اوندا نه
ائدردیم؟
یولداشلارین، یاشیدلارین لا اوینایاندا اوقدر قورخموشام سنه
ایسته مه دیییم بیر سوز دئسین لر اوندا نه ائدردیم؟
بیری مسافرته گئدنده او قدر قورخموشام سنده ایسته یه سن بیزده
مسافرته گئده ک، اوندا نه ائدردیم؟
اما هامیدان چتین سنین بیر کسی اؤزله مه یین ایدی. اوندا حیس
لریمی سندن گیزلتمه دیم. سنه یالان یئره اومود وئرمه دیم.دئمه دیم آزجادا بویو،
بیزده گئده جاغیق!سیزه ده آلاجاغام! بیزیم ده اولاجاق! داها بو دولانماق ده ییل
دیر. بو هئچ اله گتیرمه لی بیر شئی ده ییل دیر. اوندا سنله منده آغلامیشام، سن
دئیه نده : "آنا داریخیرام" آغلاییب: "منده! منده!" دئمیشم.
آرازیم! بوگون سنه و منه اؤنملی گون دیر. اولا بیلردی سن آیری
بیر یئرده، آیری بیر اولکه ده، آیری بیر عائله ده دونیایا گله سن. اولا بیلردی سن
بیر آفریقالی یا هیندیستانلی اولاسان. اولا بیلردی قیزیل دری یا گؤی گؤز اولاسان.
حتی اولا بیلردی استرالیا دا گؤز آچیب هر گون هامیدان اونجه گونشین ساچماسین گؤره
سن. اما سن بوردا سن، آذربایجاندا! دئوریم لر و فیرتینالاردا دونیایا گلن بیر
بالا. سن منیم اوغلومسان، بیر تبریزلی تؤرک عائله نین بالاسی.
بو سنین سویون دور. یاخشیسی دا سنین دیر، پیسی ده.
اگر اینساندا اؤزونو سئومک، اؤز یوردونا، اؤز ائلینه
باغلیلیغی اولماسا او اینسان یاشایا بیلمز. هر کس اؤز یارانیب، یاشادیغی
دوروموسئویب، اونون ایفتخارلارین آراییب تاپار. سنده نیسگیل لر اوجاغی
آذربایجانیمیزی سئومه لی سن.
آراز بالام! اؤز سویونو سئویب، اؤز اصلینه ده یر وئرمک بیر
اینسانین اوستونلویو و یاراشیغی دیر. بو خصیصه اینسانی، حئیوانلاردان آییریر، اما
اوغلوم بو خصیصه نین حد دن آرتیق اولماسی آداملاری چاشیردار. اونلاری ظالیم و داش
اؤره ک ائدر. اؤز اصلین اونودماییب، اونا ده یر وئرمک باشقالاری ازیب، تحقیر
ائدیب، و آدام بیلمه مک معناسینا ده ییل. بیلمیرسن نه چوخ اینسانلار بئله آلچاق
دؤشونجه لرین فداسی اولوب؟!
یسلمیرسن تاریخ نه قدر زورلو- زورسوز ساواشی ایله دولودور.
البته من بونا زورلو- زورسوز ساواشی دئمه رم... آخی من سنه نه جور آچیقلاییم؟ سن
او قدر کیچیک اوقدر معصوم سان کی! تانری بویوروب: ایسته سیدیم سیزین هامینیزی بیر
سویدان، بیر دیلده، بیر رنگیده یارالداردیم، اما من بو چئشیدلی لییی قویموشام
یاخشی- پیس بللنسین. اوغلوم سن یاخچیلیقدا چالیش. تاریخ بونو دئیه جک. ایل لرین
گلیب اؤتوشمه سی هئچ زمان یاخچی نی ده ییشیب پیس ائده بیلمه ییب. هر کس گلیب اؤز
حیاتی بویوجا یاشاییب، اؤز ایزینی قویاجاق، سونرا قضاوت گله جک لرین دیر.
آرازیم سن بو گوندن ایلک اوخولا گئدیرسن و رسمی اولاراق
ائیتیمه باشلاییرسان. بیز یاشادیغیمیز اؤلکه ده اوخول لار اؤز دیلیمیزده ده ییل.
سن اوخولا گئدن گوندن آیری بیر دیلده یازیب اوخوماغی اؤره نه جک سن. ایکی ایله
یاخین دیر اینگیلیز دیلین ده اؤیره نیرسن. اما یئتدی ایل دیر تورکجه دانیشیب،
دوشونورسن. سن تبریز ده دانیشیلان تورکجه دن ساوای گونئی آذربایجانین اوبیری
شهرلرینین ده دئییم لرین باشاریرسان اؤرنک اوچون اردبیل، زنجان و اورمو دا
دانیشیلان تورکجه نی، هم ده قوزئی آذربایجان تورکجه سین همده تورکییه ده دانیشیلان
تورکجه نی دانیشیب دوشونه بیلیرسن. بو سنین اوزونون تؤرک اولدوغونا سبب دیر البته
منده بونا چالیشمیشام. بلکه سنین یاشیدلارین اوخول دا سندن یاخشی بو یئنی اؤره
ندیگین دیلی باشارالار. بیز یاشادیغیمیز یئرده چالیشیبلار هر کسی اؤزلویوندن
اوتاندیریب، اوساندیرسینلار.آخی بونو من سنه نئجه آچیقلاییم؟ سن اوقدر خیرداجا
یاشلی سان کی!
هر حالدا بو یئنی دیلی ده اؤیره ن، اما ساقین اؤز دیلینی نه
اونود، نه ده حیس لرینی اوندان ساوای باشقا بیر دیل ایله پایلاشما!
چوخ دیل بیلمک یاخشی دیر اما اؤز دیلینی بیلمه مک فاجعه دیر،
فلاکت دیر. دیلینی الیندن وئرسن اوزونده زوالا محکوم اولاجاقسان اوغلوم!
آرازیم! چوخ ایستیرم اوغلوم ادبلی یاراشیقلی بیر اینسان
اولسون. بونو هانسی آنا ایسته مز کی؟!
ایستیرم هر زمان بیرینه یاردیمین گرکیرسه اؤزونو
قاچیرمایاسان.
ایستیرم اؤره نیب، اؤرتمک دن ساقینمایاسان.
ایستیرم ارین گن، لیر، اؤز ایشینی اؤزگه لرین باشینا سالان
اولمایاسان.
ایستیرم یالانچی، گوپچو، اوزونو اؤیوب یالاندان- یالانا گؤرمه
دییین ایشدن دم وورمایاسان.
ایستیرم هئچ زمان بیرینین حققین یئمه ییب و کیمسه یه ده سنه
ظلم ائتمک ایمکانی وئرمه یه سن.
ایستیرم هر زمان قادینلارا حرمت لن یاناشاسان.
ایستیرم دوشمانا آرخا چئویرمه یه سن.
ایستیرم یئرسیز اؤزونو تهلوکه یه سالمایاسان.
ایستیرم یولداشین آز اما دوز اولسون.
ایستیرم تانییانین چوخ اما تمیز آد- سانینا گؤره اولسون.
ایستیرم اؤز اوره یینین دالیسیجا گئدیب سؤزونه باخاسان.
ایستیرم هرزمان بیلدین اوره یین سنی یالنیش یولا آپاریب
قولاغین بوراسان.
ایستیرم هر شئیی اوزون تجربه ائتمه یه سن. بیر آز دقتلی
اولسان سندن اؤنجه تجربه ائدیب یاخشی – پیسین دنه ین لر اولوبلار.تجربه لر اوجوز
اله گلمیر. یاخین لارینین تجربه لریندن فایدالانسان وقت و انرژی ده قناعت ائدیبسن.
بو ایکیسی اقتصادین موئلفه لریندن دیر.
ایستیرم گول- چیچک ساخلاماغا ماراقلی اولاسان. بیر کسی بیر
گولو یا بیر حئیوانی ساخلاماق انسانین روحون ساغلام لادار.
ایستیرم ائرکن یوخودان قالخان اولاسان. عؤمرونون آز زمانین
اویغودا کئچیره سن.
ایستیرم ده یرلی کیتابلاری اوخویوب اونلاردا اولان سؤزلری
یادیندا ساخلاییب اؤیودلرینه عمل ائده سن.
ایستیرم منطق لی، آبریلی و عائله یه حرمت ائدن اولاسان.
ایستیرم " قلبی قره" اولمایاسان.
ایستیرم قلمه- کاغیذا اوغراشیب یازماق ایله مشغول اولاسان.
ایستیرم کلمه لرین، سؤزجوک لرین چوخ اولسون. آتا- آنا سؤزلرین
اؤره نیب دانیشیغیندا ایشله ده سن.
ایستیرم وجدانلی و غئیرتلی اولاسان.
ایستیرم ایش گؤره ن و اؤز معاشینی تأمین ائده ن اولاسان.
ایستیرم وارلیقلارینی قورویوب اما اونلارین اسیری اولمایاسان.
و یئری گلدیکجه الی آچیق اولاسان. قیتمیرلیق و گؤزو دارلیق هئچ سئومه دیییم خصلت
لردیر .
ایستیرم قیسقانج و گیجیک لی اولمایاسان. کیمسه نین یاشامینا
باخیب حسرتینی چکمه یه سن.
ایستیرم ایسته دیکلرینه یئتیشمک ده چالیشاسان، راحات یوللاری
دا دوشون، اما کسه یول گئتمک ده دقت لی اول. هر کسه یول یولجونو تئز مقصده
یئتیرمیر.
ایستیرم یاشامیندا اولان ایری اسکیک لر چوخ اؤزمه سین سنی. تک
سن بئله یاشامیرسان. بعضی فرصت لرین الدن وئرمه سی اؤز اوزوموزدن دیر. او زمان کی
بیر فرصتی الدن وئردین اوزونو قینا، دانلا، اما نقشین اولمادیغی فرصتین الدن وئرمه
یینده چوخ اندیشه ائتمه.بیردن- بیره بیر فرصت الینه دوشسه اوندا سئویندیییندن
یالنیش یول گئدرسن...
ایستیرم هر زمان من و باجینا مهریبان و صمیمی اولاسان.
ایستیرم عائله میزین بئله اولماسی سنی چوخ اینجیتمه سین. چون
سن بو دونیادا اولان ایلکین و سونونجو شخص ده ییل سن کی بو دورومدادیر. هامی بیر
گون بو دونیادان کؤچمه لی و یاشامین سونونا یئتیشمه لی دیر.
اؤز ائوینده، اؤز یاتاغیندا یاشامی قورتارماغا نه وار کی؟!
اما آرازیم! بو دونیادا گؤزه ل آد قویوب گئتمک هامینین ایشی ده ییل. سن
"آتا" نی چوخ تئز الدن وئردین. ایرمی بیر آیلیق اولاندا. بیز یالنیز بیر
ایل آد گونونو آتانلا بیرلیکده قئید ائتدیک.
اما نه ائده بیله ریک. بیز بو دورومو ده ییشدیره بیلمه یه جه
ییک. سنین آتان یادلاردان چیخمایان بیر ایگید ایدی. همان تاریخ ده یاخشی ایز قویان
بیری لردن. ایستیرم اونون کیمی اولاسان. هئچ ده اؤزومه گؤره یوخ! ائشیدنده
"آراز بویویوب آتاسینین بوش یئرین سنه دولدوراجاق" داریخیرام،
قیسقانیرام.
او باشقا بیر اینسان ایدی، بام- باشقا بیر اینسان. منه هئچ کس
آتان اولا بیلمز حتی سن! ایستیرم بویویوب اوزون اولاسان.
آتان و من ایسته دیییم بیر اینسان.
گونش امانی 31/6/1392
هیچ نظری موجود نیست:
ارسال یک نظر