بیر بوجاغی
چیرپینیر « آذرِبایجان » اوره یی
***
هر وطن داش یا کی دیلداش
گؤره وین بیلمه لی دیر
***
بیلمه دیک خالقیمیزین
ائوله ری ویران اولاجاق
***
بیز موصیبه ت گؤره نین
گؤز یاشینی سیلمه لی ییک
***
دوققوز اینسان ایتیره ن خیردا قیزین
اوجا سس له هایینا
های وئریب
یاردیمینا گئتمه لی ییک
***
آی وطن داش ! باجی ! قارداش!
دیلی باغلی ، گؤزو یاشلی اوشاغین
جان یاخان گؤز یاشینی
کیم سیله جه ک؟!!
بو درین فاجیعه نی کیم دوشونوب
کیم بیله جه ک ؟!!
یارالی « آذرِبایجان » وطنیم «اود یوردو»
سنی گؤزلور، سنی گؤزلور ، سنی گؤزلور ...
***
دونیا حئیران دی بوگون !!!
گووه نیر «تورک» اولوسون بیر لییی نه
خالقیمیز چون کی دایاقدیر هامیسی بیر بیرینه
***
کیم بیلیردی بو اولای بیر «آن»دا
اهر-ی، ورزیقان-ی هم هئریس-ی
قاراداغ بؤلگه سینی
تیتره دیب ، ائو له ری ، آلت- اوست ائده جه ک؟!!
***
اونودولماز قاراداغ فاجیعه سی
ورزیقان حادیثه سی
اهر ایله هئریس-ین زلزله سی
***
وای سسی توتدو بو گون اؤلکه میزی
قاراباغ لا قاراداغ هر ایکیسی قان آغلیر
تورک اولوس دردله ره سون وئرمه یه ایلقار باغلیر
خالق ثابیت ائله دی « ائل گوجو تام سئل گوجودور»
سوز قالیب دیر آتالاردان کی « ائل ایله قارا گون بایرام دیر»
***
گل درین باخ
آنادان آیری دوشوب دور بالاسی
ایندی هر آذربایجان قادینی
آناسیز قونچالاری
باغرینا باسمالی دیر
***
قملی لای لای لا بو گون
آناسیز کؤرپه له ری
آنا تک دیزله ری نین اوستون ده
دینج یئر سالمالی دیر
***
بیلمیریک بیز کیمه گؤز یاشی تؤکه ک؟
آتالار یا آنالار؟
قوجالار یا کی جاوان لار؟
بالاجا خیردا اوشاق لار؟
سود امه ر کؤرپه فیدان لار؟
هانسی نا؟ هانسی لارا؟
بیز کیمه ؟ کیم له ره ؟ گؤز یاشی تؤکه ک؟
***
قان اولوبدور اوره یی اؤلکه میزین
گئنیش عالم ده بو گون
زلزله سئچدی بیزی
آما بیلسین بو جفا کار فلک
بو وفاسیز دونیا
آدی باتمیش دئپره م
حددی یوخ اؤفکه میزین
دورومو چوخلو پریشاندی نئچه بؤلگه میزین
آما چوخدور دؤزومو اؤلکه میزین
***
دار باخیش لا بیزی تحقیر ائلییه ن له ر
حاققی پامال ائده ن له ر
میلله تی پاک اونودان لاردا گره ک بیلسین له ر
باش اوجا تورک اولوسو
اوجامان اود یوردون
داغیدانماز دئپره م
سیندیرانماز بو جفا کار فلک
آییریب ، محو ائده بیلمه ز
بیزی مین له ر جه اولای
زلزله ، سئل یا توفان
***
اوجامان خالق لارا یوخدور اؤلوم
دونیا بیلسین دیری دیر میلله تیمیز
چون کی دار گونده جوشور قئیره تیمیز
آذرِبایجانا عیززه ت یارادیر هیممه تیمیز
دونیا وار کن اونودولماز آدیمیز
اوجالار فریادیمیز
***
آز زامان دا
اوچولان ائو له ریمیز
خالق الی ایله
یئنه آباد اولاجاق
یاردیما موحتاج اولان یوردلارا
ان گوزه ل شکلیده ایمداد اولاجاق
***
قاراداغ دا یاشایان دیلداشیمیز
باجی میز ، قارداشیمیز
جان – جییار قانداشیمیز ، سیرداشیمیز
قم- کده ر ، قوصصه له ری گئتدیکجه
اونودوب شاد اولاجاق
دار گونون عؤمرو چوخ آزدیر
حاق وئریب وعده کی بیر گون
«کؤتولوک له ر کؤکو بر باد اولاجاق »
***
ایندی بیز نئیله مه لی؟
نه دیر اینسان گؤره وی؟
بو آغیر فاجیعه ده
جان یاخان حادیثه ده
بوللو دردله ر یارادان زلزله ده
هر وطنداش یا کی دیلداش گؤره وی
بللی دیر آیدین دیر
او کی پروانه کیمی
اؤلکه عشقینده یانیر
یا وطن دردی قانیر
یا او اینسان کی سئویر اینسانی
بیر بیر ایله بیر اولوب یول بیر اولوب
خالقا قارداش یا باجی اولمالی دیر
***
دیلداشیم گل بو آغیر فاجیعه ده
بیر اولاق ، یول بیر اولاق
« ائل گوجو ، سئل گوجودور »
آپار سولدوز لو07/06/1391
هیچ نظری موجود نیست:
ارسال یک نظر