میللی حرکت، چیخمازلار و یئنی ايستراتئژیلریمیز (ایکینجی بؤلوم) - تایماز اورمولو

ساوالان پورت : مئدیا   قو رولوشلاری و مئدیا بوشلوق لاریمیز :

اساسیندا میللی حرکت سانال و مجازی دونیادا دونیا اوزه رینده باشچیلیق ائدن بیر حرکت دیر. هئچ اولماسا ایران آدلانان اولکه  گنه لینده بو قونودا اونملی باشاریلار گوزلر اونونه سرگیله نمیشدیر .

2006 خورداد قیامیندا  ، وطنداش (شهروند )خبرنگار دیه بیر قاورام چوخ اونملی بیچیمده نوماییشه قویولدو و بیر حالدا کی توم دونیا و فارس کوکنلی مئدیا قوروم و قورولوش لارآزه ربایجان میللی حرکتین بایکوت اتمیشدیلر ائلیه بیلدی یوزلرجه فوتوگراف و اون لارجا فیلم یورویوش لر ونمایش لردن دونیانین گوزو اونونه سرگیله سین . بو گون  بونلارا رغمن ،حالا یئته رینجه گوجلو گورسه ل مئدیایا صاحیب دییلیق . 

گوناذ تلوزیونو بو قونودا تکجه قورولوش دور. یقین یئنی رادیو و تلوزیون لارین قورولماسی فایدالی اولاجاق و اگر سالیم رقابت اورتامی بو قورولوش لار آراسیندا ایجاد اولونسا داها دا کیفی اولاراق حرکتیمیزین فایداسینا اولاجاقدیر. آمما نه دن بیز بیردن چوخ گورسه ل مئدیا یارادا بیلمه میشیق و یارادیلان تلوزیون لاردا ساده جه اینترنت اوزرینده چالیشا بیلیر لر و یوغون بیر کیتلیه تاثیر بیراخا بیلمیرلر البته مالی قایناقلاریمیزین قیسیتلی اولماسی اولا بیلر.

هر کس بیلیر ، سانال اولاراق اینترنت اوزرینده بیر چوخ شخصی وبلاگ ، بیرنچه خبری سیته و بلاگ ، قورولوش لار ، تشکیلات لار و حیزب لریمیزین رسمی سیته لری وظیفه باشیندا دیلار و خبر آلیب پایلاشماقا مشغول دولار. 

بو سیته لر بیرده میلتیمیزین مخصوص گونلرده بیر آرایا توپلانیب و اعتراض اتمه لرین ساغلاییب و حاکمیتین باسقی و سرکوب سیستمینین افشا و پاسیو اتمه سینه ده چالیشیرلارو گرچه ک دن بویوک اوغورلار قازانیب لار. 

بو گون انسانی حاق لارین پوزولماسی و بو قانون سیزلیق لاری عکس اتمه ک دونیا اوزرینده ان بویوک اونمی داشییر و بیزیم خبری و غیر خبری سانال اورگانلاریمیز بونو باشارا بیلیب لر. لاکین (خصوصن )خبری سیته لری ایداره ائدن میللی فعال لاریمیز چوخلو چتینلیک لردن عذاب دادیلار. تحصیل لی و حرفه ای کادر چوخ آزدیر. 

خبر قایناقلاری محدود و گاهدان اعتمادا شایان دئیل لر. و ان اونملیسی مالی قایناق لارین اولماما سیدیر. سیته لری اداره ائدن دوسلار یا ایش سیز و یا آز گلیرلی  اولان اینسان لاریمیز دیلار . حتی خاریجی اولکه لر ده مولتجی اولاراق یاشییر و درین پروبلم لرله ال به یاخادیلار. بو قوروم و قورولوش لاردان کیمسه حمایت اتمه ییب و ان کیچیک مالی پروبلم گونلرجه بو سیته لرین فعالیه تین اتگیلیر. حتی اینترنت باغلانتیلارینین قورولما پاراسی بو فعال لارین ییب ایچمه یه آیریلان پارالاریندان تامین اولونور. میللی حرکت ، خصوصن حیزب و قورولوش لاریمیز گره کیر بو قونودا یول بولوب و هر مشروع یول دان اولمالی اولسا ، بو پروبلم لره چوزوم بولسونلار. بو چتین لیک لره رغمن گره کیر توم خبر ساحه سینده چالیشان سیته لریمیز آلتدا گچه ن نوکته لره توجوه اتسینلر :

1.     پروفشیونه ل اخلاق (اخلاق حرفه ای) قاورامین جیددی اولاراق رعایت اتمه لییک.

2.   خبر قایناقلاری ساغلام اولمالی و هر خبر خصوصن میللی فعال لار و تشکیلات و حیزب لر رابیطه سینده دقیق و صحیح اولمالیدیر.

3.   دوغرو اولمیان و یا یالان اولدوغو اثبات اولان خبر لر در حال گوتورمه لی و تکذیبیه و یا اصلاحیه ورمه لییک.

4.   خبر لر گرک صحیح ایملا و انشائیله یازیلیب نشر اولونسون . بو قونودا بیر چوخ زامان عفو ادیلمه ز یالنیش لیق لار گورو نور.

5.   خبری سیته لرین تولید اتدیگی خبرلر، قایناقلاریلا درج اولونمالیدیر . هر تورلو ایستیفاده خبر ، فوتوراف و فیلم لردن خبرین منبعینین درج اولونماسیلا مومکون دور یوخسا درین کدورت و سوء تفاهوم لارا یول آچا بیلر.

6.   هر تورلو تخریب و آژیتاسیونی رقیب و یا دوست قورولوش لار ، شخصیت لر و تانینمیش اینسان لاریمیزا قارشی در حال دوردورمالییق . راسیستی یا عیرق چی سویلم لره یر ورمک سوز قونوسو دئییل. تنقید لر ادب چرچیوسینده چیخمامالی و تورک دیلینده یازیلمالیدیر(فارسجا یازیلان تنقید لر دوشمان قورولوشلار طرفینده استثمار اولونور بیزی سئومیه نلره مالزمه یاراتماقی در حال دوردورمالییق ).

7.   خبر سیته لری  ، وظیفه دن چکیلدیک لری زامان بیان نامه و ایضاحات وریب و فعالیت دن چکیلمه ک لری قونودا لازیم اولان ایضاحاتی ورمه لیدیلر. بو قونودا گچمیش ده بیر چوخ کز ایضاح سیز ایش دن آیریل مالار اولوب دور. و بوجور ایریلیق لار موخاطب لرین اعتماد و دویقولارین زده له میشدیر.

8.   گاهدان گورونور سیته لر درج اتدیک لری مقاله لر و بیان نامه لری اوخومادان و تله سیک درج ائدیب ، سونرادان قالدیرماق مجبوریه تینده قالیرلار. بو یالنیشلیق لار خصوصن اعتراض لار زمانی  ایتیفاق دوشور. گره کیر بیان نامه لر و یازیلان یازیلار اینجه لیک له ایرده له نییب و حرکته ضرر ورمه ک ایسته یه ن مجهول قورولوش لارین آژیتاسیون دولو یازیلاری یاییملانماسین .

9.   سرورلر و هاست لارین ایران خاریجیدن انتخاب اولماسی گره کیر و بلاگ لار قونوسون دا ،  دوغرو بودور بلاگر و بنزه ری خارجی و ساغلام هوست لار انتخاب اولونسون لار. بلاگفا ، میهن بلاگ و بنزه ری سرورلر کسینلیک له قونالیلماسین .  ایمیل لر ساغلام شیفره لر له ایستیفاده اولونسون ، بله لیک له امنیت داها گوجلو ساغلانا بیله ر.
هر حال دا اگر الیه بیلسه ک الیمیزده اولان ایمکان لاری داها دوغرو و صحیح مو دیریت اتسه ک بوندان آرتیق موفقیت بیزیم اینتیظاریمیزدا اولا بیلر.