بهروز علیزاده: «گونئي آذربايجاندا هر کس اؤزونو تورک بيلير، بو آد ميلت اولاراق وارليغيميزدادير»
«ايران حاکيميتينين هر جور سياسي و ميللي تزييقلرينه باخماياراق، گونئي آذربايجان آنا ديليني قورويوب ساخلايير»
«آذربايجان رئسپوبلکاسي بيزيم اوچون جان آتديغيميز، هر زامان ماراق گؤسترديگيميز و حسرت دويدوغوموز وطنيميزدير»
ايراندا اؤز تاريخي تورپاقلاريندا ياشايان 35 ميليوندان چوخ آذربايجان تورکو وار. اونلار دا فارسلار کيمي اؤلکه وطنداشي حساب اولونسالار دا، حاکيم ميلتدن فرقلي اولاراق بير چوخ حوقوقلاردان محرومدورلار. بو اؤلکه‌نين اهاليسينين اهميتلي حيصه سيني تشکيل ائدن آذربايجانليلارا هله ده آنا ديلينده مکتب آچماغا، ميللي مدنيتيني اينکيشاف ائتديرمه‌يه، اؤولادلارينا تورک آدلاري قويماغا، حتّي فوتبول ياريشلاريندا تورک ديلينده شوعار يازماغا ايجازه وئريلمير. حالبوکي ايراندا ميللي آزليق حساب اولونان ائرمنيلرين آنا ديلينده مکتبلري وار. اؤلکه‌ده قوندارما ائرمني سويقيريمينا «خاطيره بوستو» قويولدوغو حالدا، آذربايجانلي طلبه‌لره خوجالي سويقيريميني آنماق بئله قاداغان اولونوب. بو و ديگر حوقوق پوزونتوسونا معروض قالان آذربايجانليلار رئژيمين يوروتدويو سيياسته قارشي دئموکراتيک يوللارلا موباريزه آپارير، اعتيراضلاريني شعيرلرله، آکسييالارلا و باشقا سيويل اوصوللارلا بيلديريرلر.
سويداشلاريميزين موجاديله‌سيني رئژيم چوخ سرت قارشيلايير، ميللي فعاللار تعقيب اولونور، حبس ائديلير. گونئي آذربايجاندا باش وئرن حاديثه لري، اورادا ياشايان سويداشلاريميزين سياسي و سوسيال وضعيتي ايله ياخيندان تانيش اولماق مقصديله بو دفعه اصلا آذربايجانين تاريخي مملکتي اردبيل شهريندن اولان بهروز علیزاده ايله هم صؤحبت اولدوق. چوخ ائرکن ياشلاريندان ميللي موباريزه‌يه قوشولان، حاضيردا تورکييه‌ده سياسي موهاجير حياتي ياشايان سويداشيميزلا ياخيندان تانيش اولاق.
- بير آز اؤزونوزله باغلي معلومات وئرردينيز.
- 1987-جي ايلده گونئي آذربايجانين شيروان شهرينده دوغولموشام. قيسا مودت سونرا عاييله م اردبيل شهرينه کؤچوب. بيزيم ائله اصليميز اردبيلدندير. ايراني ترک ائدنه قدر اورادا ياشاميشام.
- اورتا مکتبي ده اردبيلده بيتيردينيز؟
- بلي. ايراندا اورتا تحصيل مودتي 12 ايلدير. اونونجو صينفه‌ده ک شهر مکتبينده اوخودوم. حبس اولوندوغوم اوچون قالان ايکي ايلي زينداندا تحصيل آلديم. آما حبسخانادان چيخاندان قيسا مودت سونرا ايراني ترک ائتديگيمه گؤره اورتا مکتب آتتئستاتيمي آلا بيلمه‌ديم.
- ايراندا زينداندا تحصيل آلماق اوچون ايمکان وار؟
- اگر حبس ائديلن مکتبليديرسه، زينداندا تحصيليني داوام ائتديره بيلر. بونا اوزاقدان تحصيل دئييرلر. من ده بو ايمکاندان ايستيفاده ائتديم.
- نئچه ياشينيزدان ميللي موباريزه‌يه قوشولدونوز؟
- 16 ياشيم اولاردي. منيم خالام اوغلو ميللي فعال ايدي. هر دفعه بيزه گلنده ميللي موباريزه‌دن دانيشاردي. دئييردي کي، فارسلار آذربايجانين يئرالتي و يئر اوستو سروتلريني تالايير، آنا ديليندن تحصيل آلا بيلميريک، ميللي، سياسي و ديگر بوتون حوقوقلاردان محروم ياشاييريق و س. من ده ماراقلانماغا باشلاديم و ديقت يئتيرديکجه ده هر آدديمدا ميلت اولاراق تهقيرلره معروض قالديغيميزي گؤردوم. اودور کي، بو موجاديله‌ده من ده ايشتيراک ائتمک ايسته‌ديم. بئلجه 16 ياشيمدان ايستيقلال يولونا قوشولدوم.
- بس عاييله نيز ميللي موباريزه‌يه قوشولماغينيزي نئجه قارشيلادي؟ اعتيراض ائتمه‌ديلر؟
- عاييله م زيندانا دوشدويوم گونه قدر اعتيراض ائتميردي. آنام ياشلي قاديندير. اونا گؤره ده فعاليتيمله چوخ دا ياخيندان ماراقلانميردي. آما گئجه‌لر ميللي موباريزه ايله باغلي بيلديريش لر پايلاياندا ناراحات اولوردو. منه ديقتلي اولماغيمي تاپشيريردي. هميشه دئيردي کي، احتياطلي اول، چاليش زيندانا دوشمه و س. گونئيده آذربايجان دوشونجه‌سي هر کسده وار. آما آکتيو اولانلار آزدير. بيزه گؤره بو دوشونجه‌ني داشايان دئييل، فعاليتده اولانلار ميللي فعاللاردير.
- اردبيلده آسسيملياسييا اولونموش، يعني فارسلاشميش آذربايجانليلار وار؟
- اردبيلده يوخدور. هامي آنا ديلينده دانيشير. آما گونئي آذربايجانين زنجان، قزوين و همدان شهرلرينده فارس حاکيميتينين داواملي سيياستي نتيجه‌سينده آسسيميلياسييا اولونانلار وار. اونلار فارس ديلينده دانيشيرلار. لاکين اردبيل، تبريز و باشقا بير چوخ شهرلر ميللي کيملييه داها چوخ صاحيب چيخماغي باجاريرلار. عوموميتل، گونئي آذربايجان هر گون فارس حاکيميتينين آسسيميلياسييا سيياستينه معروض قالير. بو هر ساحه ده اؤزونو گؤسترير. مثلا، ايراندا دا اوشاقلار مکتبدن اول ايکي اوشاق باغچاسينا گئديرلر. آزياشيلارا باغچادان باشلاياراق فارس ديلي اؤيره‌ديلير. آما ايران حاکيميتينين هر جور سياسي و ميللي تزييقلرينه باخماياراق، گونئيليلر آنا ديليني قورويوب ساخلايير. هئچ بير قوووه ديليميزي اونوتدورا بيلمز.
- اردبيلده ايلک قارشيميزا چيخان آذربايجانليدان «کيمسن؟» دئيه سوروشساق، هانسي جاوابي آلاريق؟
- تورکم. سيزه بو جاوابي وئررلر. گونئي آذربايجاندا هر کس اؤزونو تورک بيلير. بو آد بيزيم حياتيميزين هر آدديميندا قارشيميزا چيخير. گونئي آذربايجان ميلت اولاراق بو آدلا وار. حتّي فارسلارين آذربايجانليلاري آشاغيلاماق اوچون بيزه دئديکلري «ائششک تورک» تهقيرينين داخيلينده ده تورکچولوک آنلاييشي اولوب. تورک آدي بيزيم وارليغيميزدادير.
- ايران پاسپورتونوزدا ميلت اولاراق نه يازيليب؟
- ايرانلي. حالبوکي ايرانلي يئر آدي بيلديرن ايفاده‌دير، ميلت آدي دئييل. يئري گلميشکن، من ميللي دوشونجه‌ني تئهراندا ياشايان بوتون آذربايجانليلارا عاييد ائتمزديم. اونلارين بير چوخو فارسلاشميش تورکلردير. حتّي او قدر آسسيميلياسييا اولونوبلار کي، اؤز ميللي کيمليکلريني دانير، آذربايجانلي اولماقدان اوتانيرلار. بو دا طبيعي کي، اوزون ايللر ايران دؤولتينين آپارديغي آنتي-آذربايجان سيياستينين نتيجه‌سيدير. مقصدلي شکيلده آذربايجانليلاري او قدر پيسله‌ييب گؤزدن سالماغا چاليشيرلار کي، اؤزوموز اؤزوموزدن اوتاناق و ميللي کيمليگيميزدن ايمتيناع ائدک. تئهراندا ياشايان آسسيميلياسييا اولونموش آذربايجانليلار بيزيم طرفلره گلنده اؤزلرينه تورک دئييرلر. آما تئهرانا قاييداندا ائله لهجه‌سيز فارسجا دانيشيرلار کي، فارسلاردان سئچيلميرلر. اوتانيرلار ميللي کيمليکلرينين بيلينمه‌سينه.
- تئهراندا اولان زامان آذربايجان ديلينده دانيشماغينيز نئجه قارشيلانير؟
- تصوور ائدين کي، حتّي آوتوبوس سوروجوسوندن توتموش ماغازا ساتيجيسينادک هر کسدن سرت رئاکسييا آليرسان. مثلا، سوروجويه آذربايجان ديلينده سؤز دئينده حقارتله جاواب وئرير. بئله جاوابلاري تئهرانين هر آدديميندا ائشيتمک اولار.
- ايراندا ياشاديغين مودتده قوزئي آذربايجان، يني آذربايجان رئسپوبليکاسي حاقيندا هانسي تصوورون وار ايدي؟
- بيزيم قوزئي آذربايجانين وارليغي حاقيندا معلوماتيميز واردي. آما يئني معلوماتلار آلا بيلميرديک. ايراندا بوتون مئديا واسيطه‌لري دؤولتين نزارتينده‌دير. اودور کي، يالنيز رئژيمه خئيير ائدن معلوماتلار وئريلير. معلوماتسيزليق قوزئيله داها ياخيندان تانيش اولماغيميزا ايمکان وئرميردي. آما بيزيم اوچون قوزئي آذربايجان جان آتديغيميز، هر زامان ماراق گؤسترديگيميز، حسرت بسله‌ديگيميز وته‌نيميزين ديگر پارچاسي اولوب. غريبهده اولسا، من هئچ زامان گؤرمه‌ديگيم قاراباغ، گنجه و ديگر شهرلر اوچون داريخيرام. سانکي اوزون ايللر اورادا ياشاميشام. بيزيم اوچون هئچ بير فرقي يوخدور. وتن وطندير. آذربايجانين هر قاريشي بيزيم اوچون موقدسدير.
- بس تاريخ درسليکلرينده ده قوزئي آذربايجانلا، عوموميتل، آذربايجانليلارلا باغلي معلومات وئريلمير؟
- آذربايجان رئسپوبليکاسي ايله ايرانين سرحدينده ياشايان آذربايجانليلار قوزئيين تئلئويزييالاريني ايزله‌يه بيليرلر. اودور کي، او تايلا باغلي داها چوخ معلوماتلي اولورلار. تاريخ درسليکلرينه گلينجه ايسه آذربايجان تاريخي حاقيندا چوخ اؤتري معلوماتلار وئريلير. مثلا، يازيليب کي، قوزئي آذربايجان ايراندان آيري دوشوب. شاه او تايي روسييايا وئريب. بوتون تاريخله باغلي کيتابلاردا قوزئي ايرانين تاريخي اراضيسي کيمي گؤستريليب. آذربايجانليلار حاقيندا ايسه «نؤکر تورکلر» ايفاده‌سيني ايشله‌ديرلر. من اوخودوغوم تارخ درسليکلرينده بئله قئيد ائديلميشدي کي، بو اراضيلرده ياشايان تورکلر، يني آذربايجانليلار «نؤکر تروکلر»دير. تاريخ بويو شاهين قاپيسيندا نؤکرليک ائديبلر. ميلتيميز حاقيندا بو آشاغيلاييجي معلوماتدان باشقا بيلگيلر وئريلمه‌ييب. ايراندا هر بير آذربايجانلي طلبه اورتا مکتبده بونو اوخويور: «نؤکر تورکلر». بو قدر ميلت اولاراق تهقير ائديليريک. و ياخود دا تاريخ کيتابلاريندا بيزه ايستينادن بئله يازيلير: «وحشي تورکلر». درسليکلرده آذربايجانليلار حاقيندا آنجاق آشاغيلاييجي و تهقير مضمونلو معلوماتلار وئريلير.
- بو جور تهقيرئديجي ايفاده‌لري يالنيز آذربايجانليلار، يوخسا عوموميتله تورکلر اوچون ايستيفاده ائديرلر؟
- ايرانين درسليکلرينده تورکلر بو جور تهقير اولونسا دا، بيزه دئييرلر کي، سيز تورک دئييلسينيز. سيز فارسسينيز، چينگيز خان سيزي گوجله تورکلشديريب. بو فيکيرلري ساده آداملار دئمير. تئلئويزييا پروقراملاريندا اونلارين ضياليلاري، تاريخچيلري دانيشير. 35 ميليون خالقين گؤزونون ايچينه باخا-باخا تهقير ائديرلر.
- بس شاه ايسماييل ختاي، صفويلر دؤولتي حاقيندا تاريخ درسليکلرينده نه يازيليب؟
- کيتابلاردا مومکون قدر آذربايجانلا باغلي معلوماتلار وئريلمير. اولسا دا تهريف ائديلميش و چوخ سطحي بيلگيلر يازيليب. مثلا، صفويلرله باغلي ائله يازيبلار کي، سانکي ائله شاه ايسماييل ختاي ده فارس اولوب و يا فارسلارا باغليليغي اولوب. اولاني دا اؤزلرينه خئيير ائدن شکيلده تقديم ائديرلر. اونلارا آذربايجانين شانلي تاريخيني اؤيرتمک خئيير ائتمير. چونکي دايم نؤکر، فارسين قاپيسينين قوللوقچوسو کيمي بيزي اؤزوموزه تقديم ائتمه‌يه چاليشيرلار. اودور کي، فارسلار تک بيزي يوخ، اؤزلريني ده آلداديرلار. آذربايجانليلاري نؤکر، ائششک کيمي، اؤزلريني ايسه دونيادا ان عالي عيرقين نوماينده‌سي کيمي تانيديرلار. فارسين چوباني دا اؤزونو آذربايجانلي پروفئسسوردان داها اوستون سايير. اونلاردا بو قدر عيرقچيليک وار.
- بس آذربايجان اراضيلريندن تاپيلان تاريخي آبيده‌لر و يا اشيالار نئجه ديرلنديريلير؟
- گونئي آذربايجاندا تاپيلان تاريخي آبيده‌لر و يا اشيالار آپاريليب موزهلرده فارسلارا عاييد نومونه‌لر کيمي نوماييش ائتديريلير. تاريخي بو جور ده تهريف ائديرلر. فارسلار بيزيم هئچ نييميزه رحم ائتمه‌ييبلر. اليميزد، ياشاميميزدا، مدنيتيميزد، تاريخيميزده نه وارسا هاميسيني تالان ائديبلر.
- اردبيلده آذربايجان ديلينده قزئت و يا تئلئويزييا وار؟
- فورمال اولاراق وار. اردبيلده گويا آذربايجان ديلينده قزئت نشر ائديلير. آما قزئتين دئيک کي، 8 صحيفه سيندن يئدديسي فارس ديلينده چيخير، يالنيز بير صحيفهوه يا بير کيچيک يازي آذربايجان ديلينده وئريلير. اردبيلده گويا آذربايجان ديلينده تئلئويزييا وار. آما تئلئويزييادا دئييلن هر جومله‌نين 9 سؤزوندن يالنيز بيري-ايکيسي آذربايجان ديليند، قالانلاري فارسجا اولور. قزئتده ده بئله‌دير. يازيداکي هر جومله‌نين 70-80 فايزي ده فارس سؤزلريندن عيبارتدير. آدي اولور آذربايجان ديلينده قزئت و تئلئويزييا، اصلينده ايسه ائله فارس ديلينده نشر ائديلير و فعاليت گؤسترير.
رئال جعفرلي
هیچ نظری موجود نیست:
ارسال یک نظر